Sa nga bé yôli'n 4 - Nyanmien nde Ufle

Pierre nin Jean bé dyole difue dandan'm bé dyasu fa kole

¹ Ke Pierre nin Jean bé nuan te ô swran'm bé nde kan kléle'n su'n, Nyanmien nyrun dyranfue'm bé nin Nyanmien sua dan'n i sukpen'n nin Sadducéfue'm (*f5*) bé baa le.

² Ke bé wuun ke bé su klé swran'm bé liké'n, o yôô bé ya kpa yele ke, ke béh kanh Jésus nde'n, bé sé bé ke swran'm bé tyen.

³ Bé tra bé siéé bé bisua lo lélé alie tyennin, afin ke oh yôh so'n, wuun alie a san.

⁴ O nin i so'n ngba bé nga bé tili nde so'n bé sunman bé faa su, bé yasua'm bé dyu bo akpi-nnun kun.

⁵ Ke alie tyennin'n, Juif'm bé sukpen, nin kpenngben, nin mmla kléfue mun,

⁶ ye Anne b'o ti Nyanmien nyrun dyranfue dan'n, nin Caïphe, nin Jean, nin Alexandre, ye bé kwlaa bo bé fin Nyanmien nyrun dyranfue dandan'm bé ôsu nun'n, bé yiaa Jérusalem le.

⁷ Ke bé kô fa Pierre nin Jean bali'n, bé dyraan bé bé afien le, bé usa bé ke: ?O yô se ye an kwla yô sa ngaa? ?Ye wan dunman nun ye an yôlio?

⁸ Ye Pierre bo Nyanmien Wawe'n siéé'n, o sé bé ke:

⁹ Nvlé kpen nin awlô bô kpenngben mun, se nde amunh usah é sa kpa bo é yô maan bian folefue nga'n, o nin ke o yôli b'o man o yôô dyuédyué'n

¹⁰ man amun nin Israëlfue'n kwlaa an si kpa ke Jésus-Christ b'o fin Nazareth bo an bôbôé waka'n su bo Nyanmien tyenniin'n, i dunman nun ye bian nga a yô dyuédyué b'o dyin amun nyrun wa nion.

¹¹ Jésus so'n ye o ti: «Yebue bo amun sua kplanfue mun an yii blô nion, I ye wa katyi yebue kpa b'o tra sua'n i tyondyo'n i asé nion.»

¹² I kunngba tye ye o kwla dé swraan, yele ke Nyanmien a sié'a swran ufle fi men'n nun wa bo i dunman nun é kwla fité nuon.

¹³ Ke bé wuun ke Pierre nin Jean bé ti yakpa'n, o bôô bé nuan, afin bé si ke ba di'a l'école, bé ti ti blé nunfue, bé ti'a swran dan. Bé si ke bé nin Jésus ye bé trannion.

¹⁴ Ye ke bé wuun bian b'o yôô dyuédyué'n ke o dyin Pierre nin Jean bé wun le'n, ba nya'an nde fi a kanman.

¹⁵ Ke dyole difue'm bé maan bé atin ke bé dyaô kan'n, bé wuun bé wun,

¹⁶ bé sé ke: ?Éh yôh minnien nga'm bé se? Afin Jérusalemfue'n kwlaa bé si nun wéiin ke sa nga bé yôli'n ti dan kpa, o man é kwla fia'a su.

¹⁷ Sannge ke é klô'a ke nde so'n tru o i nyrun'n, man é idyo bé nan é sé bé ke, ke o fin nde'n, nanh man bé kan nde so'n klé swran fi dunman so'n nun kun.

¹⁸ Ye bé flee bé, nan ba sé bé ke, nanh man bé bô Jésus dunman'n kun, ye nanh man bé klé liké Jésus dunman nun kun mlonmlon.

¹⁹ Pierre nin Jean bé usa bé ke: ?Se Nyanmien wun ke é nyin yi amun bo é nyin yimen'n, o ti kpa? Anh bu nian,

²⁰ nanwle, é kwla yatyi'a liké nga é wunniin'n nin nde nga é tili'n i kanle.

²¹ Bé kannvuun bé ékun, nan ba yatyi bé nun. Swran'm bé ti bé si'a fo nga bé fa tu béo, yele ke bé kwlaa bé manman Nyanmien sa so'n ti.

²² Bian so'n i nantile'n yôô abônuan, afin wa di afue b'o tra ablanan.

Christfue'm bé sree Nyanmien ke o wla bé fanngan

²³ Ke bé yatyii bé nun'n, bé oo bé wiéngu'm bé sin, nan ba kan sa kwlaa nga Nyanmien nyrun dyranfue dandan nin kpenngben'm bé kan kléé bé'n ba klé bé.

²⁴ Ke bé tili'n, bé kwlaa bé maan bé nen'n su bé sé Nyanmien ke: É Si, o bo a yii nglô, nin asie, nin dyénvié'n, nin ninngé'n kwlaa b'o ô le'n,

²⁵ wo ye man o Wawe'n fo o nde'n wlaa é nannan David o swran'n i nuan b'o kenniin ke: «?Nzu ti ye nvlé wié nunfue'm bé plan soo, Ye swran'm bé bu sinnzin akunndan soo?

²⁶ Asie'n su famien'm bé dyaôli, Ye kpenngben'm bé yiali, bé bô yôô kun É Min Nyanmien'n nin i Christ'n (*f1*) bé wun.»

²⁷ Nanwle, Hérode nin Ponce Pilate nin bé bo bé ti'a Juif'n bé nin Israëlfue'm bé bô yôô kun o swran Jésus bo a guee i su ngô ke o yô famien'n, i wun klo nga su wa,

²⁸ ke béh yôh kwlaa nga o bobo Nyanmien Kpli'n a dun mmua buu i akunndan ke bé yô'n.

²⁹ Nannan Nyanmien Kpli, nian é wlanwlanle bo bé wlanwlan yéo, i so'n ti sien'n yô mon o swran'm bé kan o nde'n yakpa su.

³⁰ Tinnge o sa'n tukpatyefue'm bé wun, man bé yô dyuédyué, yi atre, ye yô abônuan sa o swran Jésus i dunman nun.

³¹ Ke bé kan nde so'n klé Nyanmien wiéli'n, lika nga bé yiaa nun'n kédyéli, Nyanmien Wawe'n fuu bé kwlaa, nan ba kan Nyanmien nde'n yakpa su.

Bé lika wle tranle

³² Swran kaka nga bé lafii Christ su'n, bé bô yôô kun, bé akunndan'n ti kun. Bé nun wié fi sé'a ke i ninngé'm bé ti i ngunmin lie, sannge liké ng'o ti swran kun lie'n, o ti bé kwlaa bé lie.

³³ Bé bo Jésus sunmaan bé'n bé kan é Min Jésus tyenle nde'n Nyanmien fanngan nun. Bé kwlaa bé yôô bé wun yé dan kpa.

³⁴ Afin bé nun wié fi mia'an liké fi wun, bé kwlaa nga bé le fié'n nin sua'n bé yô bé ate. Sika nga bé nyen'n,

³⁵ bé fa ble bé bo Jésus sunmaan bé'n. Sika nga swran kun sa mien i wun'n, o ba, bé fa men.

³⁶ Joseph, Lévi ôsufue kun b'o fin Chypre men'n nun'n, bo bé bo Jésus sunmaan bé'n bé toen Barnabas bo i bô yele Tyityi Wla'n,

³⁷ o le fié kun, o yôô i ate, o fe i sika'n blee bé bo Jésus sunmaan bé'n.