Sa nga bé yôli'n 3 - Nyanmien nde Ufle

Bian folefue'n i dyuédyué yôle

¹ Lé kun Pierre nin Jean bé su ko Nyanmien sua dan'n nun nnosua wia'n nun bé nin Nyanmien bé yale kôkôle do'n su.

² Ke oh yôh so'n, bé su fa bian kun bo bé wulii folefue'n su ba. Tyen kwlaa bé fe wa sié Nyanmien sua dan'n i anuan bo bé flee Klaan'n nun ke o sre liké bé nga béh wluh Nyanmien sua dan'n nun'n bé sa nun.

³ Ke o wuun Pierre nin Jean ke bé su wlu lo'n, o sree bé liké.

⁴ Pierre nin Jean bé nieen siin ye Pierre sé i ke: Nian é kpa.

⁵ Ye o niaan bé siin, o bu i ke bé su wa men liké wié.

⁶ Sannge Pierre sé i ke: Dyete ufué'n nin sika okwle'n lie'n n le'a wié, sannge liké nga n le'n nh fah man o. Jésus-Christ b'o fin Nazareth'n i dunman nun, dyaô nanti!

⁷ O soo i sa fama'n, o meen i su. I ôsu kunngba'n nun kpekuun i dya ngbabua'n nin i dya komin'n ba yô kpa,

⁸ o dyaô waka nantili. O nin bé nanti wluu Nyanmien sua dan'n nun, o tu kpen, o manman Nyanmien.

⁹ Swran'n kwlaa bé wun ke o su nanti o manman Nyanmien.

¹⁰ Ke bé wuun i wle ke i ye o tran Nyanmien sua dan'n i anuan Klaan nun, o sre liké'n, i dyuédyué yôle'n bôô bé nuan, bé wun blibli bé.

Nde nga Pierre keen Nyanmien sua dan'n nun'n

¹¹ Ke o kpotyi'a Pierre nin Jean'n, swran'n kwlaa bé nuan bô bé wun, bé wanndi oo bé wun lo ala bo bé flee Salomon'n i bô lo.

¹² Ke Pierre wuun i so'n, o sé swran'm bé ke: ?Amun Israëlfue mun, nzu ti ye sa nga bô amun nuaan? ?Nzu ti ye an nian é siin soo, ke é bobo é fanngan nun annze é Nyanmien srôle ti ye man bian nga a nantio?

¹³ Abraham, nin Isaac, nin Jacob bé Nyanmien'n, é nannan'm bé Nyanmien'n, o man i Swran Jésus nyaan nyrun. I ye an fe maan swran mun, ye ke Pilate waan, oh yatyih i nun'n, amuan kpli'an su, an yii i blô nion.

¹⁴ An yili Nyanmien i Swran'n nin Nanwlefue'n i blô, an kpataa swran kunfue'n i ti ke bé yatyi i nun man amun.

¹⁵ An man bé kuun swran ng'o man nguan'n, sannge Nyanmien tyenniin. Sa so'n yôô é bobo é nyrun.

¹⁶ Jésus dunman nun o nin i su bo é lafi'n ye man bian nga an sii b'o dyin ye'n, o nyaan fanngaan. Jésus su bo é lafi'n ti ye man o kwla nantili amun kwlaa amun nyrun wa nion.

¹⁷ Aniaan mun, n si ke sa nga amun nin amun sukpen mun an yôli'n, an si'a nun ti ye an yôlio.

¹⁸ Sannge Nyanmien yôô i so nan nde ng'o man i nuan idyofue'n kwlaa bé dun mmua keen laa ke i Christ'n (*f1*) o wa wun nyrennen'n o kpen su.

¹⁹ O man anh katyi amun nzuen'n, ye anh sa amun sin Nyanmien wun, man o yatyi sa nga an yôlii'n tye amun mlonmlonmlon, nan ble ng'o ba lo'n é Min Nyanmien'n o man amun wla gua asé,

²⁰ ye oh sunmanh Christ (*f1*) b'o dun mmua séé ke oh fah man amun'n amun wun wa, yele Jésus.

²¹ Ke é ô ye'n lie'n, béh treh i nun lélé san oh dyuh ble nga Nyanmien yôh ninngé'n kwlaa bé ufle ékun'n. O men i nuan idyofue'm bé dun mmua keen i so laa.

²² Moïse séé ke: «Amun Min Nyanmien'n o wa fa amun niaan'm bé nun kun sié i nuan idyofue ke o siéé min'n sa man amun'n, nde kwlaa ng'o kan klé amun'n, amunh fah su.

²³ Sannge swran ng'o fa'a Nyanmien nuan idyofue so'n i nde'n, béh kuinh, oh dyaôh le.»

²⁴ Ke o fin Samuel ble su'n Nyanmien nuan idyofue'n kwlaa bo bé kannin nde'n, bé kaan tyen ng'o ô ye'n i nde.

²⁵ An ti Nyanmien nuan idyofue'm bé anunman, ye sa nga Nyanmien séé ke oh yôh man é nannan mun'n, bo i ti o séé Abraham ke, «i ôsufue'm bé ti o wa yô asie'n sufue'n kwlaa bé yé'n,» an wô nun wié.

²⁶ Ke Nyanmien fe i swran'n siélii so'n, amun sin ye o sunmeen kliklio, ke o yô amun yé, nan amun kwlaklwaklwa an yatyi amun nzuen tete'n.