Sa nga bé yôli'n 2 - Nyanmien nde Ufle

Nyanmien Wawe'n i bale

¹ Ke Pentecôte'n (*f32*) dyuli'n, bé kwlaa bé yiali lika kun.

² Ke bé ti le'n, kpekuun bé ti liké kun ngan, o fin nyanmien su lo o kpla ke aunngban sa, o wluu sua nga bé ô nun'n, i nun.

³ Béh niaanh… liké wié bo bé ti ke sin taaman sa'n bé ye, bé kpatyikpatyii nun bé trantran bé kwlaa bé ti su.

⁴ Nyanmien Wawe'n too bé su, o fa bé katyi i lie mlonmlon, kpekuun bé su kan anien ufle wié bo Wawe'n fa wla bé nuan ke bé kan'n.

⁵ I nun so'n nun, Juif'm bo bé srô Nyanmien'n bo bé fin menmen'n kwlaa bo bé ô asie'n su wa'n bé nun'n, bé ô Jérusalem le.

⁶ Ngannien so'n ti swran kpanngban kpa bé wa yiaa le, ke bé kwlaa bé tii nde nga bé kan'n bé bobo bé anien'n nun'n, bé wun blibli bé.

⁷ O fu bé nun, o bô bé nuan ye bé séé ke: ?Ai! bé kwlaa nga bé idyo ye'n, nanh Galiléefue muon?

⁸ ?O yô se ye man é kwlaa é ti é bobo é anien'n bé nuan nuon?

⁹ Afin é wié fin Parthes, Mèdes, Élam, Mésopotamie, Judée, Cappadoce, Pont, Asie,

¹⁰ Phrygie, Pamphyile, Égypte, Libye i bué ng'o mantan Cyrène lo'n, ye Rome. É wié ti Juif, ye é wié kusu ti swran bo bé katyii Juif.

¹¹ É wié fin Crète, ye Arabie, sannge kusu Nyanmien i abônuan sa b'o yôli'n bo bé su kan'n, é kwlaa é ti é bobo é anien'n nun!

¹² O bôô bé kwlaa bé nuan, bé wu'an sa nga bé yôo, ye bé usa bé wiéngu ke: ?Nzu sa yele nga?

¹³ Sannge wié'm bé yô bé finfin bé sé ke: Nzan ye ba non bé ku a yio.

Nde nga Pierre keen Pentecôte nun'n

¹⁴ Ye Pierre nin i wiéngu blu-nin-kun'n bé dyaôlio, o sé bé ke: Amun Juif mun, nin amun kwlaa bo an tran Jérusalem wa'n, anh sié amun su tié min nde'n kpa, nan amuan wun i wle!

¹⁵ É bo é ô ye'n, é ti'a nzanbôefue ke an bui'n sa, afin lika'n te yô nglemun.

¹⁶ Sannge sa nga Nyanmien nuan idyofue Joël kannin'n ye wa yô ye'n, o sé ke:

¹⁷ «Nyanmien waan: Anh nian, sa nga tyen wié lélé ke men'n oh koh i bué nuan'n, m ma yô'n ye: Nh fah n Wawe'n man swran'n kwlaa, Amun wa yasua nin amun mma mmla'm bé idyoh n nuan, Amun mma gbanflen'm béh wunh liké aôlia nun, Ye amun si ngbenngben'm bé tyenh lalie.

¹⁸ Ye tyen so'n nun nh fah n Wawe'n man N swran mma mun, yasua ô, bla ô, Béh idyoh n nuan.

¹⁹ Nh yôh abônuan sa nyanmien'n su lo, Ye nh yih atre asie'n su wa, Béh wunh mmôdya nin sin nin sin wensren dan.

²⁰ Wia'n katyih blé tuun, Ye anglô'n, kusu oh katyih ke mmôdya sa, I sin nan amun Min'n i tyen dan [bo bé ken i nde'n], wa dyu.

²¹ Ble so'n nun swran kwlaa ng'o fle I min'n ke o déé'n, oh fitéh nun.»

²² Israëlfue mun, anh tié nde nga kpa! Amun bobo an si ke Jésus b'o fin Nazareth'n, o ti swran kun bo Nyanmien man o yô sa kéklééklé nin abônuan sa, ye o yi atre amun nyrun wa b'o klé ke o dyin i sin.

²³ Ke Nyanmien bobo dun mmua buu i akunndan b'o sié i ke bé fa bian so'n man swran mun'n, amun man bé bo bé sro'a Nyanmien'n bé bôbôlii waka'n su, bé kunniin.

²⁴ Wié'n feli, Nyanmien délii i sa nun, o tyenniin, yele ke wié'n kwle'e i sié.

²⁵ Afin David kennin i nde ke: «N wunnin ke min Min'n wô n nyrun le titi, Yele ke o ô n fama su o man min wun usu'a min.

²⁶ Sa nga ti ye n klun ti dyowa, bo nde nga n kan'n klé ke n klun ti dyowa nion. N wla'n b'o ô o su'n ti n di aladyé,

²⁷ Afin a su yatyi'a min blolo lo, Ye a su yatyi'a o Swran'n ke o kplo.

²⁸ A kléé min nguan atin'n, Se a ba min wun le'n, n klun dyoh dan kpa.»

²⁹ Nnya mun, amun kafle, anh sié amun su man n kan é nannan David nde wéiin n klé amun. O wuli, bé siélii, i ndia'n te ô wa lélé nde.

³⁰ Ke o ti Nyanmien nuan idyofue b'o si ke o te i nda ke, «o man i ôsufue'm bé nun kun wa tren i bia'n su'n,»

³¹ i so'n ti, ke oh kanh nde'n, o bôô Christ i tyenle nde'n su ke Nyanmien a yatyimen blolo lo, ye o men i fuen'n wa kploman.

³² Jésus so'n ye Nyanmien tyenniin nion, o yôô é kwlaa é nyrun.

³³ Ke i si Nyanmien men i su siéé i fama su'n, o fee i Wawe'n b'o séé ke oh fah man'n, o fa menniin, ye o faa liké nga amun wuin bo an ti'n maan swran muon.

³⁴ Afin David bobo a fu'a nyanmien su lo, sannge i waan: «É Min Nyanmien'n séli min Min lie'n ke: Tran asé n fama su,

³⁵ Lélé m man ah tioh o kpofue'm bé su.»

³⁶ I so'n ti man Israël ôsufue'n kwlaa bé si kpa ke Jésus so'n bo an bôbôlii waka'n su'n, i ye Nyanmien siéé ke o ti é Min nin Christ nion.

³⁷ Ke bé tii nde so'n o yô bé ya, nan ba usa Pierre nin i wiéngu mun ke: ?Nnya mun, éh yôéh se?

³⁸ Ye Pierre séé bé ke: Anh katyi amun nzuen'n man bé yô amun kwlakwlakwla amun baptême Jésus-Christ dunman nun, man Nyanmien yatyi sa nga an yôlii'n tye amun, ye o fe i Wawe'n man amun.

³⁹ Afin liké ng'o séé ke oh yôh'n, i waan oh yôh man amun, nin amun mma mun, nin bé kwlaa bo bé ô mmua bo é Min Nyanmien'n o wa fle bé'n.

⁴⁰ Ye Pierre kan nde fanunfanun kléé bé, o yiyi nun wéinwéin, o tu bé fo dan kpa ke, bé yi bé wun adyulisufue tete nga'm bé nun.

⁴¹ Bé bo bé fe i nde'n su'n, bé yôô bé baptême, tyen so'n nun swran bo bé dyu bo akpi-nsan kun bé ukaa bé su.

⁴² Bé fa bé bo Jésus sunmaan bé'n bé nde'n su kpa, bé tran aniaan tranle, bé di liké lika wle, bé nin Nyanmien bé kôkô yale tititi.

Sa nga Christfue'm bé yôli'n

⁴³ Abônuan sa bo bé bo Jésus sunmaan bé'n bé yô'n nin atre bo bé yi'n, o yô swran'n kwlaa bé srô.

⁴⁴ Bé kwlaa bo bé lafi Christ su'n, bé tran lika wle, bé gua bé ninngé'n kwlaa lika wle.

⁴⁵ Bé yô bé asie nin bé bô ninngé'm bé ate, bé fe i sika'n tye bé kwlakwlakwla, nan ba fa ti bé wun nyanman nun.

⁴⁶ Ye tyen kwlaa bé bô ti kun bé yia Nyanmien sua dan'n nun, bé yô aklunyé, bé ko awlô'm bé nun bé di liké lika wle. Ke béh dih bé alie so'n, bé klun ti dyowa dan kpa,

⁴⁷ bé manman Nyanmien, bé wun yô swran'n kwlaa bé fe ye tyen kwlaa é Min Nyanmien'n fa bé bo bé fité nun'n uka bé su.