Rɔmfuɛ Mun 8 - Nyanmien nde Ufle

Bé nga Nyanmien Wawe'n sié bé'n

¹ O man sien'n bé nga bé nin Christ-Jésus ba katyi swran wunmuan'n, bé wun sa lie'n wa wié.

² Afin Nyanmien Wawe'n klé sa ufle b'o man bé bo bé nin Christ-Jésus ba katyi swran wunmuan'n béh nyanh nguan. O man man nyan n ti sa te'n nin wié'n bé sa nun.

³ Liké nga Moïse mmla'n kwle'e i yô'n klo swran i nzuen'n ti'n, Nyanmien bobo yôli. Ke o man i bobo Wa'n katyi ke klo swran b'o yô sa te'n sa, b'o sunmenniin ke o yô te nnen'n, o klé ke sa te b'o ti klo swran nzuen'n ti te, o man se o wié'n, o ti su.

⁴ Nyanmien yôé so nan é bo é fa'a swran'm bé nzuen'n su kun'n, bo é yô sa nga Nyanmien Wawe'n klé é ke é yô'n, é yô sa kpa nga bé klee mmla'n nun ke é yô'n.

⁵ Afin bé nga klo swran nzuen'n te yô bé fe'n, klo swran ninngé'n ye o lô béo, sannge bé nga bé ti Nyanmien Wawe'n lie'n, i ninngé'n ye o lô béo.

⁶ Bé nga klo swran ninngé'n lô bé'n, béh wuh, sannge bé nga Nyanmien Wawe'n ninngé'n lô bé'n, béh nyanh nguan nin aladyé.

⁷ Afin bé nga klo swran ninngé'n lô bé'n, bé kpo Nyanmien, bé klô'a ke bé fa Nyanmien mmla'n su, ye kusu bé kwla fa'a su bobo.

⁸ Ye bé nga bé nzuen'n ti klo swran lie'n, Nyanmien klun dyo'a bé wun.

⁹ Sannge amun lie'n, se Nyanmien Wawe'n tran amun nun ke i awlô sa'n, amun nzuen'n ti'a klo swran lie kun, liké ng'o klé amun ke an yô'n, ye an yôo. Swran ng'o le'a Christ i Wawe'n o ti'e i lie.

¹⁰ Se an ti Christ i awlô'n, é wun i bué kun ke sa te'n ti, amuan wu, i bué kun kusu é wun ke, amun swran kpa b'o katyii amun'n ti, i Wawe'n o man amuan nyan nguan.

¹¹ Se Nyanmien b'o tyennin Jésus'n i Wawe'n tran amun nun ke i awlô sa'n, i b'o tyennin Christ-Jésus so'n o man amun kusu bo amun wu'n, amunh yôh dyuédyué i Wawe b'o tran amun nun so'n ti.

¹² I so'n ti, aniaan mun, é ti mianfue, sannge é ti'a mianfue ke é yô klo swran nzuen ngba kun.

¹³ Afin se an yô sa ng'o ti klo swran nzuen'n, amunh wuh. Sannge se Nyanmien Wawe'n i fanngan nun an wla amun nyôlie tete'm bé asé'n, amunh nyanh nguan.

¹⁴ Bé kwlaa nga bé fa atin nga Nyanmien Wawe'n klé bé'n su'n, bé ti Nyanmien wa.

¹⁵ Afin Nyanmien i Wawe'n b'o fa mannin amun'n, i lie'n o fa'a amun katyi'a kanga, o wla'a amun sre, sannge o fa amun katyi ke Nyanmien klun ba sa. I so'n ti, é kwla kpan fle Nyanmien ke: Baba!

¹⁶ Nyanmien Wawe'n klé é wéiin kpa é awlen'n nun ke é ti Nyanmien wa sakpa.

¹⁷ É ti i wa, o man liké ng'o sé ke oh fah men i swran mun'n, éh nyanh wié, ye kusu liké ng'o sé ke oh fah Christ'n, béh bôh é dunman nun wié, sannge san nyrennen kunngba ng'o wunniin'n, éh wunh wié, nan é nin i ya nyan nyrun.

¹⁸ Ke m bu anyrunnyan liké nga Nyanmien wa yi i nglô klé yé'n i akunndan'n, m bu'a nyrennen nga é wuin nde'n, i liké fi.

¹⁹ Liké kwlaa nga Nyanmien yii bé'n, bé wun blibli bé, bé minnde tyen nga Nyanmien wa yi i mma'm bé nglô'n.

²⁰ Afin liké kwlaa ng'o yii bé'n, o sié bé ke bé satyi. Bé satyile so'n fi'an bé bobo, o fin i b'o siéli bé so'n. Sannge bé wla te ô i su,

²¹ yele ke tyen kun liké so'n kwlaa béh nyanh bé ti, bé su satyi'a kun, ye bé dunman'n teh nyrun nga Nyanmien mma'm béh nyenh tyen nga béh nyanh aladyé'n i nun wié.

²² É si ke, ke o fin lalaa lélé o fa dyu nde'n, liké kwlaa nga Nyanmien yii bé'n, bé ôtô, bé wun nyrennen ke bla bo wa tran awulie sa.

²³ Nanh bé ngunmion, sannge é bo Nyanmien fe i Wawe'n b'o ti liké b'o wa fa man yé'n i nun klikli'n, é kusu é ôtô, é minnde tyen nga béh wunh ke é ti Nyanmien wa sakpa, b'o dé é, o katyi é wunnen nga'n.

²⁴ Nyanmien su bo é lafi'n ti ye é si ke wa dé yéo. Sannge se swran i nyin ô liké bo bé waan béh fah men'n i sin'n, se o nyen'n, i nyin tre'en i sin kun. ?Wan ye se o nyan liké ng'o kunnde'n, i nyin te ô liké so'n i sin ékuon?

²⁵ Se é nyin ô liké bo bé waan béh fah man é bo é nian wunmen'n, i sin'n, é tra é awlen é tran minnde.

²⁶ É le'a fanngan, o man Nyanmien Wawe'n dyran é sin o uka é, afin é si'a liké nga é sre Nyanmien ke o fa man é b'o ti su'n. I Wawe'n bobo ôtô, o dyran é nuan o sre i man é.

²⁷ Nyanmien b'o si swran'm bé awlen'n nun'n, o si akunndan ng'o ô i Wawe'n i klun'n, afin liké nga Nyanmien klô'n ye i Wawe'n sre man bé nga bé ti i lie muon.

É tra safunyren

²⁸ É si ke sa kwlaa nga b'o yô'n, é bo é klô Nyanmien b'o flee é yele ke o bu é akunndan siéé laa'n, é kpa yôle ti ye o man sa so'm bé yôo.

²⁹ Afin é bo Nyanmien dun mmua si yé'n, o siéé é ke é katyi ke i Wa'n ti'n sa, nan i Wa'n nyan niaan kpanngban, nan o yô bé nyrun kpen.

³⁰ Bé ng'o siéé bé so'n, o flee bé, ye bé ng'o flee bé'n, o buu bé swran kpa, ye bé nga o buu bé swran kpa'n, o man bé nyaan nyrun ke i lie'n sa.

³¹ ?Se o ti so'n, nzu nde ye é ken ékuon? ?Se Nyanmien yô é yé'n, wan ye o kwla yô é saa?

³² Nyanmien bo wa sié'e i sa i Wa'n su, b'o fe mannin é kwlaa é ti'n, oh fah liké'n kwlaa uka su man é i klun-ufué su.

³³ ?Wan ye o kwla satyi bé bo Nyanmien faa bé'n bé dunmaan? Nyanmien ye o bu bé swran kpaa.

³⁴ ?Wan ye o kwla sé ke ba di foo? Christ-Jésus ye o wulio, kusu o tyennin, o ô Nyanmien Kpli'n i fama su, o kpete man é.

³⁵ ?Klôle nga Christ fa klô yé'n, nzu liké ye man i nyin kwla tu é suo? se nyrennen ô, mianle ô, yale kléle ô, awé ô, se é wun kplen ô, se é dyin wié nuan ô, se béh kunh é ô.

³⁶ Afin bé klee ke: «O ti bé fa é dyran wié'n nuan nglemun lélé nnsoua. Bé bu é ke bua bo bé su kô kuin sa.»

³⁷ Kannze sa so'n kwlaa to é su'n, Jésus b'o klôô yé'n ti, é tra safunyren.

^38-39 Afin n si kpa ke klôle nga Nyanmien fa klô é b'o man Jésus-Christ yi i nglô klé yé'n, liké fi man i nyin kwla tu'a é su. Se wié ô, nguan ô, ange mun ô, mmusu mun ô, baé ô, ble nga nun ninngé mun ô, tyen wié ninngé mun ô, nglô lo nin asie'n su wa ninngé mun ô, liké fi nu'an le b'o man i nyin kwla tu é suo.