Matthieu 20 - Nyanmien nde Ufle

Swran bo bé fa bé ke bé kô di dyunman'n

¹ Nyanmien siéle'n fa awlô bô kpen kun bo lé kun o dyaô nglemun ke oh kôh kunnde dyunman difue, nan bé kô di dyunman i raisin (*f12*) fié'n su.

² Ke o nin dyunman difue'm bé nen see lé kun denier (*f10*) kun su'n, o fa bé oo i raisin fié'n su lo.

³ O fité nglemun wia nun, o wuun swran wié mun ékun, bé gua gua'n su bé le'a dyunman.

⁴ O sé bé ke: Amun kusu anh wo n raisin fié'n su lo wié, ye sika ng'o ti i nuan su'n, nh fah man amun.

⁵ Ye bé olio. O fité wia dyran o nin nnosua wia nun ékun o faa wié mun ékun.

⁶ O fité nnosua nun ékun, o wuun wié mun bo bé gua le bé le'a dyunman, nan wa usa bé ke: ?Nzu ti ye ke alie tyen lalaa'n an gua wa bo an di'a dyunman?

⁷ Ye bé waan: Swran fi a fa'a é. Ye o sé bé ke: Amun kusu, anh wo raisin fié'n su lo.

⁸ Ke alie dyoli'n, raisin fié ifue'n fle i dyunman difue'm bé sukpen'n, o sé i ke: Fle dyunman difue mun, tua bé kale, bô i bô kasienfue'm bé su fa ko kliklifue'm bé su.

⁹ Bé nga bé faa bé nnosua nun'n bé bali, bé tuaa bé denier (*f10*) kunngun.

¹⁰ I sin bé nga bé faa bé klikii'n bé bali, bé bu ke bé lie'n o wa tra bé nga'm bé lie'n, sannge bé kusu bé nyaan denier kunngun.

¹¹ Ke bé nyeen i so'n, bé idyoo awlô bô kpen'n,

¹² bé sé ke: Bé nga bé ba kasien bo bé dii do kun'n, ye é bo é dii tyen ba wunmuan kun'n bo wia'n bô é bo nvuflé tu yé'n, é kale'n se!

¹³ O sé bé nun kun ke: Dyanvue, man dimon o luflé mlonmlon. ?É nuan a se'a lé kun denier kun su?

¹⁴ Fo o sika'n, nan ko. Nh tuah kasienfue'n ke n fa tua wo'n sa.

¹⁵ ?N le'a atin ke n fa liké ng'o ti n lie'n yô o yaa? Ye Jésus sé ke:

¹⁶ Bé nga bé ka sien'n, bé wa dun mmua, ye bé nga bé dun mmua'n, bé kusu bé wa ka sien.

Jésus i kunle'n i su bôle kpe nsan su

¹⁷ Ke Jésus koh Jérusalem bo bé ô atin nun'n, o flee i sonnzonfue blu-nin-nnyon'n bé aamien, o sé bé ke:

¹⁸ Anh nian, é su ko Jérusalem, bé wa fa m bo n katyii Swran'n wla Nyanmien nyrun dyranfue dandan nin mmla kléfue'm bé sa nun.

¹⁹ Béh séh ke man di fo, nan bé kun min, béh fah min wla bé bo bé ti'a Juif'm bé sa nun ke bé yô n finfin, bé bô min nin ngblé, bé bôbô min waka'n su, ye i lé nsan su nh tyenh.

Liké bo Jacques nin Jean bé nin'n sreli'n

²⁰ Ke o yôô so'n, Zébédée wa yasua'm bé nin'n, o nin i mma'm bé baa Jésus wun le, bé kôtô i bô ke bé sre i liké.

²¹ Jésus use i ke: ?Nzu ye a klô ke ah sreoh? Bla'n sé i ke: Tyen nga ah dih o famien'n, yô man n wa yasua nnyon'n bo bé ô ye'n bé tran o wun le, kun tran o fama su ye kun tran o be su.

²² Ye Jésus waan: An si'a liké nga an sre'n. ?Klôwa (*f13*) nga m ma non nun'n, an kwla non nun wié? Bé waan: Een, é kwla non nun wié.

²³ Ye o sé bé ke: O ti nanwle ke amun wa non n klôwa'n (*f13*) nun wié, sannge n fama su nin m be su tranle lie'n, nanh min ye m maan, san bé nga n Si sié maan bé'n, bé ye bé tran leo.

²⁴ Ke bé blu nga'm bé tii nde so'n, bé faa ya aniaan nnyon so'm bé wun.

²⁵ Jésus flee bé, o sé bé ke: An si ke nvlé wié'm bé famien'm bé mianmian bé swran mun, ye swran dandan'm bé tin bé swran'm bé su.

²⁶ Amun lie'n su yô'a so, sannge amun nun swran ng'o klô ke oh yôh dan'n, mon o su wiéngu mun,

²⁷ ye amun nun swran ng'o klô ke oh yôh sukpen'n, mon o yô i wiéngu'm bé kanga.

²⁸ Ke m bo n katyii Swran'n m bale'n ke o ti soo, afin man baman ke bé su min, sannge m baa ke n su swran, nan n fa min wun kpo swran sunman bé ti.

Jésus yôô anyansifue nnyon bé dyuédyué

²⁹ Ke bé tu bé bô Jéricho le'n, swran kpanngban kpa bé suu Jésus su.

³⁰ Béh niaanh… anyansifue nnyon bé titi atin nuan le. Ke bé tii i ke Jésus su sin'n, be kpan sé ke: Nannan, David Anunman, si é aunnvue yô é yé!

³¹ Swran'm bé kpan bé su ke bé muan bé nuan, sannge bé kpaan kéklé tra laa lie'n ke: Nannan, David Anunman, si é aunnvue yô é yé!

³² Jésus dyrannin, o fle bé usa bé ke: ?Nzu ye an klô ke n yô man amuon?

³³ Bé sé i ke: Nannan, tiké é nyin.

³⁴ Bé yôô Jésus annvo, o kan bé nyinma'n, kpekuun ba wun asé, nan ba su i su.