Marc 1 - Nyanmien nde Ufle

Jean baptême yôfue'n i Nyanmien nde kanle

¹ Jésus-Christ, [Nyanmien Wa'n] i dyasin fe'n i bôbôle'n ye.

² Bé klee Nyanmien nuan idyofue Ésaïe i fluwa'n nun ke: «Nian, nh sunmanh min ndôlô bôfue'n, oh dunh mmua o nyrun, Oh kôh yô wo atin'n kpa.

³ I ye o kpan blô lo nion, o sé ke: Anh siésié é Min'n i akpo'n, Anh yô i atin'm bé séiin, anh tréké su.»

⁴ I so'n su ye Jean baptême yôfue'n bali blô lo, o kan kléé bé ke bé katyi bé nzuen'n, ye bé yô baptême nzué'n nun, nan Nyanmien yatyi sa nga bé yôlii'n tye bé nion.

⁵ Judée men wunmuan'n nin Jérusalemfue'n kwlaa bé oo Jean wun lo. Ke bé kaan sa te nga bé yôli'n, o yô bé baptême Jourdain nzué ba'n nun.

⁶ Chameau ndre trale ô Jean wun, ye kplô kun tyi i afien. Lalô nin wema nzué ye o dio.

⁷ Ke oh kanh nde'n, o sé ke: Swran kun b'o le nyrun tra min'n o ô sien o su ba, ke n kan asé n nyanndyi i ngbabua nyanman'n, min nin i so yôle'n fataman.

⁸ N lie'n, n yôli amun baptême nzué'n nun, sannge i lie'n, o wa fa Nyanmien Wawe'n yô amun baptême.

Jésus i baptême yôle

⁹ I ble so'n nun Jésus fin Nazareth Galilée men'n nun bali, nan Jean wa yô i baptême Jourdain'n nun.

¹⁰ Ke Jésus fin nzué'n nun fitéh'n, i ôsu kunngba'n nun o wuun ke nyanmien su lo'n su ti muaan, ye Nyanmien Wawe'n dyre i su ke aublé sa.

¹¹ O tii swran kun nen nyanmien su lo, o sé ke: A ti min awlen su Ba, o su ye man fa n wla'n kwlaa a guaa.

Jésus i lakale

¹² Kpekuun Nyanmien Wawe'n fa Jésus oo blô lo.

¹³ O dii lé ablanan blô lo, Satan (*f6*) kô lekeleke. O nin blô nnen mun ye bé ô loo, ye ange'm bé sui.

Jésus i dyunman bôbôle Galilée lo

¹⁴ Ke bé wlaa Jean bisua'n, i sin Jésus oo Galilée men'n nun. O kan Nyanmien i dyasin fe'n,

¹⁵ o sé ke: Ble'n i nuan a yia, ye Nyanmien i siéle ble'n wa mantan. Anh katyi amun nzuen'n, anh lafi Nyanmien i dyasin fe'n su.

Dyué kunfue nnan bo Jésus bé'n

¹⁶ Ke oh sinh Galilée fete'n nuan'n, o wuun Simon nin i niaan André ke bé su gua bé lala'n fete'n nun, afin bé ti dyué kunfue.

¹⁷ Jésus sé bé ke: Anh bla'a su n su, nh fah amun katyi swran'm bé trafue ke dyué trafue sa.

¹⁸ Kpekuun bé yatyii bé lala'm bé le, ye bé suu i suo.

¹⁹ Ke o oli i nyrun louun kan'n, o wuun Zébédée i wa Jacques nin i niaan Jean, bé kusu bé ô bé alié'n nun bé su tanndan bé lala'm bé nun.

²⁰ O flee bé, kpekuun bé katyii bé si Zébédée nin dyunman difue mun alié'n nun, nan ba su i su.

Bian bo asie usu satyilii'n

²¹ Bé oo klo'n bo bé flee Capernaüm'n su. Sabbat b'o ti bé tyen te'n, Jésus wluu Nyanmien sua'n nun, o kléé liké. I liké b'o klé bé'n bô bé nuan, yele ke i nde b'o kan'n, o klé bé ke o le sin dyranfue,

²² o ti'a ke mmla kléfue'm bé lie'n sa.

²³ Ke oh yôh so'n, bian kun bo asie usu b'o satyi swran'n wa satyii'n, o ô Nyanmien sua'n nun le,

²⁴ o kpan sé ke: ?Jésus bo a fin Nazareth, nzu sa ye o ô é nin wo yé afieon? A baa é nunnunle. N si o kpa, a ti Nyanmien i Swran.

²⁵ Jésus idyolii, o sé i ke: Muon nuan le, dyaô bian nga su.

²⁶ Asie usu'n tee bian so'n i asé, o kplili, o kpaan kéklé, o dyaôô i su.

²⁷ Swran'n kwlaa bé nuan bôô bé wun, i so'n ti, bé usaa bé wun ke: ?Nzu sa yele nga? ?Liké ufle ye o su kléo? O kwla asie usu bo bé satyi swran'n, bé srôé!

²⁸ Kpekuun i dunman'n fuu Galilée men'n kwlaa nun.

Jésus yôô Pierre sia bla'n i dyuédyué

²⁹ Ke bé fin Nyanmien sua le fitéli'n, bé nin Jacques nin Jean bé oo Simon nin André bé awlô lo.

³⁰ Ayre guaa Simon sia bla'n i wun, nan wa la. Bé ken i nde kléé Jésus.

³¹ O wunngéé i wun le, o utii i sa'n nun, o meen i su. Ayre'n tuu i wun ye o kunnde liké maan béo.

Jésus yôô tukpatyefue kpanngban bé dyuédyué

³² Nnosua ke wia'n toli'n, bé faa tukpatyefue nin swran bo asie usu a satyi bé'n kwlaa blelii.

³³ Klo'n sufue'n kwlaa bé yiaa anuan'n nun le.

³⁴ O yôô tukpatyefue kpanngban bo bé tukpatye'n ti fanunfanun'n bé dyuédyué. O man asie usu kpanngban kusu bé dyaôô swran'm bé su, sannge o ma'an bé atin ke bé idyo, afin bé sii.

Jésus i Galilée lo Nyanmien nde kanle

³⁵ Nglemun nde kpa'n ke lika'n te dun'n, o dyaô fitéli, o oo blô lo lika kun b'o ti diin'n nun, o nin Nyanmien bé kô kôkô yale.

³⁶ Simon nin bé nga bé nin i ô le'n, bé kunndee.

³⁷ Ke bé wunniin'n, bé sé i ke: Swran'n kwlaa bé su kunnde o.

³⁸ O sé bé ke: Anh man é o klo nga bé mantanmantan wa'n bé su, nan n kan nde lo wié, afin i so'n ti ye m balio.

³⁹ Ye o oo Galilée men'n i lika'n kwlaa, o kan nde Nyanmien sua'm bé nun, o man asie usu'm bé dyaô swran'm bé su.

Jésus yôô kôkôwéfue kun dyuédyué

⁴⁰ Kôkôwéfue kun bee i wun le, o kôtô i bô, o sre i aunnvue su, o sé i ke: Yatyi, yô man n kôkôwé'n wié wéiin.

⁴¹ O yôô Jésus annvo, o tinnge i sa'n kenniin, o sé i ke: Man ti, mon o kôkôwé'n wié wéiin.

⁴² Kpekuun kôkôwé'n wa wié i wun, ye i wunnen'n yôô trékétrékéo.

⁴³ I ôsu kunngba'n nun Jésus séé i ke o o, o wle i su nun kpa ke,

⁴⁴ o nien i wun kpa nanh mon o kan nde so'n klé swran fi, sannge o fe i wun kô klé Nyanmien nyrun dyranfue'n, ye o fe i wun asô bôle liké bo Moïse kléli'n fa man, man bé wun ke wa yô dyuédyué.

⁴⁵ Sannge ke bian so'n fitéli tye'n, ye o too nde so'n dyo bôle su truu lika'n kwlaa nuon, lélé Jésus wa kwla yi'e i wun nglô klo fi su kun. O ka klo nuan tiwa le, ye swran'm bé fin lika'n kwlaa bé bee i wun le.