JÉSUS-CHRIST I DYASIN FE'N BO LUC KLELI'N 9 - Nyanmien nde Ufle

Swran blu-nin-nnyon bo Jésus sunmaan bé'n

¹ Jésus flee i sonnzonfue blu-nin-nnyon'n, o sé bé ke oh dyranh bé sin, o man asie usu'n kwlaa béh srôh bé, o man béh yôh tukpatyefue'm bé dyuédyué.

² Ke o nin bé wiéé ngalie so'n di'n, o sé bé ke bé kô kan Nyanmien siéle'n i nde, bé dyaô tukpatyefue mun.

³ O sé bé ékun ke, ke béh koh'n, nanh man bé fa liké fi tra nun, kponman ô, tro ô, liké diwa ô, sika ô, ye nanh man bé fa trale nnyonnyon.

⁴ Awlô kwlaa nga bé wlu nun'n, bé tran le lélé san bé kole a dyu.

⁵ Ye klo kwlaa nga bé so'a bé nun'n, ke béh tuh bé bô klo so'n su'n, bé kpukpu bé dya wun ndutré'n gue klo so'n su, mon o yô bé lalôfue.

⁶ Bé oli, bé wlan klo'm bé su, bé kan dyasin fe'n, bé yô tukpatyefue'm bé dyuédyué lika kwlaa.

Jean baptême yôfue'n i kunle

⁷ Hérode b'o sié nvlé'n i bué'n, o ti sa kwlaa nga bé yô'n, o man o wu'an akunndan kun ng'o buo, afin swran wié'm bé waan, Jean ye wa tyeon.

⁸ Wié'm bé waan, Élie ye wa fitéo, ye wié'm bé kusu bé waan, Nyanmien nuan idyofue laa'm bé nun kun ye wa tyeon.

⁹ Sannge Hérode sé ke: M man bé kpee Jean ti'n. ?Ye swran nga bé ken i nde ye'n, wuun waan? I so'n ti, o klô ke oh wunh Jésus.

Kpaun i kpanngban katyile

¹⁰ Ke bé bo Jésus sunmaan bé'n bé bali'n, bé kan liké kwlaa nga bé yôli'n klélii. O fa bé, nan ba o bé ngunmin klo bo bé flee Bethsaïda'n su.

¹¹ Ke swran'm bé tii i ke wa o lo'n, bé su i su. O soo bé nun, o kan Nyanmien siéle nde'n klé bé, o yô bé nga kusu bo bé ti'a dyuédyué, bé dyuédyué.

¹² Ke lika'n wa dyo'n, i sonnzonfue blu-nin-nnyon'n bé bee i wun le, bé sé i ke: Sé swran mun man bé o klo nin nanmué nga bé mantan wa'n bé nun, bé kunnde sikéwle nin liké diwa, afin kan é ô wa'n ti blô.

¹³ Jésus séé bé ke: An bobo anh man bé liké man bé di. Ye bé waan: Kpaun nnun nin kpatra nnyon ye o ô é sa nuon, wuun san é bobo éh kôh tô liké ye é fa ble minnien nga'm bé ngbaa.

¹⁴ Yasua nga bé ô le'n, bé dyu bo akpi-nnun kun. Ye Jésus séé i sonnzonfue'm bé ke: Anh sé bé man bé tran asé nyanmannyanman ablénunablénun.

¹⁵ Bé kô séé bé, nan ba tran asé.

¹⁶ Jésus faa kpaun nun'n nin kpatra nnyon'n, o men i nyin su nyanmien su lo, o la Nyanmien asé. Ye o bubuu nun, o fa men i sonnzonfue mun ke bé fa tye swran so mun.

¹⁷ Bé kwlaa bé dili, bé ku yili, nan ba ise i ôngaônga'n gbôgbô blu-nin-nnyon.

Wafa nga Pierre bu ke Jésus ti b'o kannin'n

¹⁸ Lé kun ke Jésus nin i sonnzonfue'm bé ngunmin bé ô le b'oh kôkôh yale klé Nyanmien'n, o usa bé ke: ?Swran'm bé waan, wan yele min?

¹⁹ Ye bé sé ke: Swran wié'm bé waan, Jean baptême yôfue'n yele wo, wié kusu waan, Élie yele wo, wié'm bé kusu bé waan, Nyanmien nuan idyofue laa'm bé nun kun ye wa tyeon.

²⁰ Ye o usa bé ke: ?Amun kusu, amun waan, wan yele min? Pierre séé i ke: A ti Nyanmien i Christ. (*f1*)

Jésus i kunle bo bé wa kuin'n i su bôle

²¹ Jésus wlaa bé su nun kpa ke nanh man bé ken i so klé swran fi.

²² Ye o sé bé ékun ke: Kannze o yô se, san m bo n katyii Swran'n nh wunh nyrennen dan, kpenngben nin Nyanmien nyrun dyranfue dandan nin mmla kléfue'm bé su so'a min nun, béh kunh min, ye i lé nsan su nh tyenh.

²³ I sin, o sé bé kwlaa bé ke: Swran nga i waan oh suh n su'n, mon o klen i wun man min, ye o sue i waka'n tyen kwlaa o su n su.

²⁴ Afin swran nga i waan oh seseh i wun'n, oh kpeh i nguan'n sin, sannge swran ng'o kpe i nguan'n sin min ti'n, swran so'n o sese i nguan'n sakpa.

²⁵ ?Se swran kun nyan men wunmuan'n, nan se o satyi i wun annze se i nguan'n kpe sin'n, nzu ye o yô yé men io?

²⁶ M bo n katyii Swran'n mh bah, swran'm béh wunh ke min nin n Si nin n Si ange mun é nyrun ti nyannyan o yô srô. Swran nga bo min, nin min nde'n ti nyannzuen kuin'n, ke mh bah so'n, nyannzuen wa kun min swran so'n ti.

²⁷ Nanwle, bé nga bé ô wa ye'n, nanh bé ngba ye wié'n kunh bé nan Nyanmien a yi i famien nglô a klé béo.

Jésus wunnen'n i katyile

²⁸ Ke Jésus kaan nde so'n b'o di lé motyue kun'n, o faa Pierre nin Jean, ye Jacques, bé fu ôka kun su ke o nin Nyanmien bé kô kôkô yale.

²⁹ Ke béh kôkôh yale so'n, i nyrun'n katyili, i trale'n katyi ufué nyennyennyen.

³⁰ Kpekuun swran nnyon bé nin i su idyo, kun yele Moïse, kun yele Élie.

³¹ Bé nyrun'n ti nyannyan o yô srô. Bé su ken i awiélie b'o wa wié Jérusalem lo'n i nde.

³² Lafile'n faa Pierre nin i wiéngu mun. Ke bé tinngéli tye'n, bé wun Jésus bo i nyrun'n ti nyannyan o yô srô'n, o nin swran nnyon bo bé nin i ô le'n.

³³ Ke swran so'n bé katyi Jésus le béh koh'n, Pierre séé Jésus ke: Baba, ke é ô wa ye'n o ti kpa, man é kplan kpata nsan, o lie kun, Moïse lie kun, ye Élie lie kun. I wun b'o blii'n ti, o wu'an nde kun ng'o kaan.

³⁴ Ke i nuan te ô nde so'n su'n, béh niaanh… Nyanmien ufué kun su kata bé su. Ke oh katah bé su su'n, sre kuun i sonnzonfue mun.

³⁵ Bé tii swran kun nen nyanmien ufué so'n nun, o sé ke: N wa bo n yilii'n ye. Anh tié nde ng'o kan'n.

³⁶ Ke bé tii nen so'n, béh niaanh… Jésus kunngba tye ye o ô leo. I sonnzonfue'm ba bô'a liké nga bé wunniin'n i wié fi su a klé'a swran fi ble so'n nun.

Gbanflen kaan kun bo asie usu satyilii'n i dyuédyué yôle

³⁷ Ke alie tyennin'n bo bé fin ôka'n su lo bé dyrali'n, swran kpanngban kpa bé oo Jésus atin kpale.

³⁸ Kpekuun bé nun kun kpan sé ke: Ndya, nh sreh o, nian n wa yasua'n, o ti ba kunngba tye.

³⁹ Liké wié to i su, o kpan, o to, o kété kafiaa, i nuan nzué'n bô nglô, o fe dan kpa, ye i wun kplôkplô nan liké so'n wa tu i su.

⁴⁰ N sree o sonnzonfue mun ke bé tu liké so'n, ba kwla tumen.

⁴¹ Ye Jésus sé ke: ?Amun adyulisufue nyin kékléfue bo an lafi'a sa su'n, min nin amunh tranh lélé tyen ônin? ?N tra min awlen amun wun lélé tyen ônin? Fo o wa'n ble min.

⁴² Ke bakan so'n o wa dyu Jésus wun le'n, liké so'n too i su, o te i asé, o kétéé kafiaa. Jésus idyoo liké b'o satyi bakan so'n, o yôé dyuédyué, nan wa fe i a men i si.

⁴³ O man bé kwlaa bé wun ke Nyanmien'n ti kpli sakpa. Ke liké kwlaa ng'o yô'n o bô bé nuan'n, o sé i sonnzonfue'm bé ke:

Jésus bôô i kunle'n su ékun

⁴⁴ Amun lie'n, nde nga m ma ken ye'n, anh fa sié amun klun kpa. Bé wa fa m bo n katyii Swran'n man swran mun.

⁴⁵ Sannge i sonnzonfue'm ba wu'an nde so'n i wle, afin o ti'a wéiin bé nyrun. O ken i so nan, nanh bé wun i wle. Sre kun bé ti, ba kwla usa'a nde so'n nun.

Swran ng'o ti dan tra bé kwlaa'n

⁴⁶ Akplôwa wié too i sonnzonfue'm bé afien ke béh wunh bé nun swran ng'o ti swran dan tra bé kwlaa'n.

⁴⁷ Ke Jésus wuun bé akunndan nga bé bu'n, o fa ba kaan kun dyren i wun le, o sé bé ke:

⁴⁸ Swran ng'o so bakan nga nun n dunman nun'n, wuun m bobo min ye wa so min nuon, ye swran ng'o so min nun'n, wuun swran b'o sunmaan min'n, i nun ye wa soo. Afin swran ng'o ti amun kwlaa amun nun kaan'n, i sofue'n ye o ti daan.

Bian b'o fuan asie usu'n

⁴⁹ Jean sé ke: Baba, é wuun bian kun b'o fo o dunman'n fuan asie usu, ye é séé i ke, nanh mon o fuan bé kun, yele ke o nu'an é bo é su o su'n é nun wié.

⁵⁰ Ye Jésus séé i ke: Nanh an sé i ke, nanh mon o fuan bé, afin swran ng'o nin amun lemen'n, o dyin amun sin.

Ba so'a Jésus nun Samarie lo

⁵¹ Ke tyen nga Nyanmien wa fa Jésus ko nyanmien su'n mantannin'n, i waan, san oh koh Jérusalem, nan wa sunman swran i nyrun lo.

⁵² Bé fa atin'n bé oli, bé dyuu Samarie klo kun su, bé wlu klo'n nun, bé waan béh kôh kunnde sikéwle man Jésus.

⁵³ Sannge o su ko Jérusalem ti, ba sikémen.

⁵⁴ Ke o yôô so'n, i sonnzonfue Jacques nin Jean bé sé ke: ?Nannan, é yô man sin fin nyanmien su lo o wa yra bé?

⁵⁵ O kpe i nyin bé wun lo o idyoo bé kpa. [O séé bé ke: An siman akunndan nga an bu'n, afin m bo n katyii Swran'n man baman swran'm bé satyile, bé déle ti ye m balio.]

⁵⁶ Nan ba o klo ufle su.

Liké nga bé yô nan ba su Jésus su'n

⁵⁷ Ke bé faa atin'n bo béh koh'n, swran kun sé Jésus ke: Lika kwlaa nga ah koh'n, min nin wo éh koh.

⁵⁸ Jésus séé i ke: Sôlôngbi'm bé le kunman la nun, ye anunman'm bo bé tu sin'n, bé le lawle, sannge m bo n katyii Swran'n n le'a lika bo n la nun dé wunmien bo kaan.

⁵⁹ O sé kun ékun ke: Su n su. Swran so'n sé Jésus ke: Man min atin man n kô sié n si ka.

⁶⁰ Ye Jésus séé i ke: Yatyi bé bo bé wu'n man bé sié bé swran mun, sannge o lie'n, kô kan Nyanmien siéle'n i nde'n.

⁶¹ Ye kun ékun séé ke: Ndya, nh suh o su wié, sannge man min atin man n kô kalé min awlôfue mun ka.

⁶² Ye Jésus sé i ke: Swran ng'o tra charrue (*f24*) nun nan o nien i sin'n, o kwla di'a Nyanmien siéle'n i dyunman'n wié.