JÉSUS-CHRIST I DYASIN FE'N BO LUC KLELI'N 21 - Nyanmien nde Ufle

Angbôti bla kun i Nyanmien sika yile

¹ Ye Jésus men i nyin su o wuun anyanbéunfue'm bo bé su yi bé sika nga bé fa man Nyanmien'n gue sika guawle'n nun.

² O wun angbôti bla yalefue kun kusu b'o fa dyete mma kanngan nnyon guaa nun.

³ Ye o sé ke: Nanwle, angbôti bla yalefue nga i sika lie'n b'o yili'n, o tra bé kwlaa bé lie'n,

⁴ afin bé nga'm bé lie nga bé yi guaa sika guawle'n nun'n, o bu'a bé kple, sannge bla nga lie'n o yi i yale lie kan'n, i kwlaa ng'o le b'o fa di liké'n, ye o fa mannion.

Jésus kaan Nyanmien sua dan'n i satyile nde

⁵ Ke swran wié'm béh kanh yebue nglaan nin ninngé bo swran'm bé fa maan Nyanmien bo bé fa yôô Nyanmien sua dan'n i klaan'n i nde'n, Jésus sé ke:

⁶ Tyen wié liké nga an wun bé ye'n, yebue fi su ke'e i wiéngu yebue su b'o su kan guamaan.

Sa nzolie nin yale kléle

⁷ Bé use i ke: ?Ndya, ble ônin ye sa so'm béh yôoh? ?Ye liké ônin ye o klé ke sa so'm bé su wa yôo?

⁸ Ye o sé bé ke: Anh sasa amun wun, nanh man bé laka amun, afin swran kpanngban bé wa fa n dunman'n béh séh ke bé ye bé ti Christ nion, ye béh séh ke, ble'n wa mantan. Nanh an fa su.

⁹ Ke amunh tih ale nin kpenngben'm bé wun dyaôle nde'n, nanh sre kun amun, afin kannze o yô se… san sa so'm béh yôh, sannge men'n su ka'a le wiéman.

¹⁰ Ye o sé bé ékun ke: «Nvlé kun wa dyaô nvlé kun wun, ye famien kun wa dyaô i wiéngu famien kun wun.»

¹¹ Asie'n wa kédyé dan kpa, ye lika wié'm bé nun tukpatye tete'n o wa son, awé wa kpen. Bé wa wun liké srôesrôé nin abônuan sa dandan nyanmien su lo.

¹² Sannge béh dunh mmua tra amun klé amun yale, béh fah amun ko Nyanmien sua'm bé nun, béh wlah amun bisua, béh fah amun ko famien nin kpenngben'm bé dyasu min ti, i sin nan sa so'm ba yô.

¹³ Ke béh yôh amun so'n, o man amunh kwlah kan min nde'n klé bé.

¹⁴ I so'n ti, anh fa sié amun klun kpa, nanh an dun mmua bu nde nga amunh kanh nan amuan nyan amun ti'n i akunndan.

¹⁵ Afin m bobo ye nh fah nde nga amunh kanh'n wla amun nuaan, ye nh kléh amun ngwlele, o man amun kpofue'm bé su kwla kpalôman amun nuan, ye bé su si'a amun akplôwa.

¹⁶ Amun si nin amun nin, nin amun niaan nin amun tranfue nin amun dyanvue mun bobo bé ye béh fah amun man swran muon, ye béh kunh amun nun wié.

¹⁷ Min ti swran'n kwlaa béh kpoh amun.

¹⁸ Sannge amun ti ndre kun sa su mlinman.

¹⁹ Se an tra amun awlen'n, amunh nyanh amun ti.

Jésus kaan Jérusalem i satyile nde

²⁰ Ke amunh wunh ke sôndya'm ba sin a yia Jérusalem'n, an si ke i satyile a dyu.

²¹ Man bé nga bé ô Judée men'n nun'n, bé wanndi o ôka'n su lo, ye bé nga bé ô Jérusalem klo'n su le'n, man bé dyaô le, nanh man bé nga bé ô blô'n bé sa bé sin klo le.

²² Ke o yô nan nde kwlaa nga bé kleli'n wa kpen su'n, ble so'n nun Nyanmien wa tu swran'm bé fo dan kpa.

²³ Ble so'n nun wunnzefue nin bla ta'm bé yakô! Afin nyrennen'n oh yôh dan men nga nun, ye Nyanmien fah ya swran nga'm bé wun.

²⁴ Béh fah kaka kun bé, béh trah bé lômuen ko nvlé'n kwlaa nun, bé bo bé ti'a Juif'n, béh satyih Jérusalem, lélé san bé ble lie'n i nuan dyuh.

Jésus b'o katyii Swran'n i bale

²⁵ Bé wa wun liké wié wia'n nin anglô'n, nin nzraama'm bé su, awlabôe'n yôh dan nvlé'm bé nun, dyénvié'n i bôle b'oh bôh b'oh teh'n ti, o man swran'm bé su si'a sa nga béh fah yô bé wuon.

²⁶ Sa srôésrôé ng'o wa dyu asie'n su'n ti, swran'm bé wawe'n toh blô, afin bé wa kédyé nyanmien su lo ninngé ngblingbli'm bé nun.

²⁷ Ye béh wunh «m bo n katyii Swran'n ke n wô nyanmien blé'n su n su ba,» mh bah yasua su, min nyrun nyannyan ke senze'n sa, o yô srô.

²⁸ Ke amunh wunh ke sa so'm bé su yô'n, anh dyaô dyran, anh man amun ti su, ke oh yôh so'n, wuun an su wa nyan amun ti.

Blofue aloma'n i su nde

²⁹ Ye o bu nyanndra kun klé bé o sé ke: Anh nian blofue aloma'n nin waka nga mun.

³⁰ Ke amunh wunh ke bé su fefe'n, amun bobo an si ke munngun'n su mantan.

³¹ I kunngba nion, amun kusu ke amunh wunh ke sa so'm bé su yô'n, an si ke Nyanmien siéle ble'n wa mantan.

³² Nanwle, swran nga bé ô le'n, bé su wiéman nan sa so'm ba yô.

³³ Nyanmien nin asie'n béh sinh, sannge min nde'n i ble'n su si'an lé.

Jésus séé bé ke bé tran minnde

³⁴ Anh sasa amun wun, nanh an yô alie safue nin nzan bôefue, nanh an kôkô ninngé'm bé ti, se an yô so'n, o tyeman nan tyen so'n wa fu amun nun.

³⁵ Afin tyen so'n o wa fu swran'n kwlaa bo bé ô men wunmuan'n nun'n bé nun ke aya sa.

³⁶ I so'n ti, anh tran minndee tyen kwlaa, anh sre Nyanmien man an kwla fité sa kwlaa b'o wa ba men'n nun'n i nun, nan amuan kwla dyran m bo n katyii Swran'n min nyrun.

³⁷ Ble so'n nun Jésus klé liké Nyanmien sua dan'n nun wia nun, ye kongue o ko Olive Ôka'n su lo.

³⁸ Ke alie kô tyen'n, nglemun swran'n kwlaa bé nin i yia Nyanmien sua dan'n nun bé wa tié i nde'n.