JÉSUS-CHRIST I DYASIN FE'N BO LUC KLELI'N 2 - Nyanmien nde Ufle

Jésus i awulie

¹ Ble so'n nun, famien César Auguste waan bé kle swran'n kwlaa bo bé ô i men'n nun'n, bé dunman.

² Ke béh kleh swran'm bé dunman klikli so'n, wuun Quirinius ye o sié Syrie nion.

³ Bé kwlaa bé kô kle bé dunman bé bobo bé klo'm bé su.

⁴ Joseph kusu fin Nazareth, Galilée men'n nun o oo Judée men'n nun David i klo bo bé flee Bethléhem'n su, yele ke o ti David awlôfue, ye o ti i ôsufue,

⁵ nan o nin Marie b'o tree i asé bo wa wunnze'n, bé kô kle bé dunman.

⁶ Ke bé ô le'n, i ba wule'n dyuli, nan wa wu i talua ba'n i yasua sakpa.

⁷ O tyityi i wun lee nnen'm bé liké diwle'n nun, yele ke ba nya'an sikéwle hôtel lo.

Bua sunianfue'm bé nin ange mun

⁸ Men kunngba so'n nun bua sunianfue'm bé la blô lo bé nian bé bua'm bé su kongue.

⁹ É Min Nyanmien'n i ange kun fitéé bé nyrun, ye é Min Nyanmien yi i wun nglô nyannyannyan kléé bé, nan sre a kun bé dan kpa.

¹⁰ Sannge ange'n séé bé ke: Nanh sre kun amun mlonmlon, m ma bô dyasin fe kun klé amun b'o wa dyo swran'n kwlaa bé klun.

¹¹ Yele ke ndeken David klo lo ba wu Défue kun ba man amun b'o ti Christ (*f1*), o ti é Min.

¹² Nzolie nga amunh fah sii'n ye, amun wa wun ba nonman kun, ba tyityi i wun o la nnen'm bé liké diwle'n nun, io.

¹³ Kpekuun nyanmien su lo swran akpi-ngbingbi'n bé nun akpasua dan kun bé wa ukaa ange kun'n su, bé manman Nyanmien sé ke:

¹⁴ Man Nyanmien manmale'n te nyanmien su lo, Ye man swran bo Nyanmien klun dyo bé wun asie'n su wa'n, bé wun dyo bé.

¹⁵ Ke ange'm bé nin bé ti nun bo bé oo nyanmien su lo'n, bua sunianfue'm bé séé bé wiéngu ke: Man é wo Bethléhem lo trélélé, o é kô nian sa ng'o yô lo bo é Min Nyanmien'n kan kléé yé'n.

¹⁶ Bé o ndende kpa bé tôô Marie nin Joseph ye ba nonman'n b'o la nnen'm bé liké diwle nun'n, bé lo.

¹⁷ Ke bé wuun bakan'n, bé ken i wun nde nga ange'n kan kléé bé'n, kléé be.

¹⁸ Bé kwlaa nga bé tii nde nga bua sunianfue'm bé kan kléé bé'n, o bô bé nuan.

¹⁹ Marie fa nde so'n kwlaa siéé i klun, ye o bu i akunndan.

²⁰ Ke bua sunianfue'm béh sah bé sin'n, bé manman Nyanmien, bé yi i aye nde kwlaa nga bé tili, nin liké kwlaa nga bé wunniin, b'o nin nga bé kan kléé bé'n, yô kun'n ti.

Jésus i klen wlale

²¹ Ke bakan'n dii lé motyue'n, bé wa wle i klen, bé ton dunman Jésus, dunman nga ange'n dun mmua kléli nan i nin wa wunnzee'n.

Jésus i Nyanmien sa nun wlale

²² Ke bé wun asô bôle tyen bo bé klee Moïse mmla'n nun'n wiéli'n, bé fe oo Jérusalem é Min Nyanmien sa nun wlale, afin bé klee é Min Nyanmien mmla'n nun ke:

²³ «Se swran ô, se nnen ô, bé talua ba kwlaa b'o ti yasua'n, bé fe man é Min Nyanmien'n.»

²⁴ Ke béh koh'n, bé faa se abliésô nnyon ô annze ôkunmômô ba nnyon ô ke bé fa kpo ba'n ti, afin bé klee é Min Nyanmien mmla'n nun ke bé yôé so.

²⁵ Ke oh yôh so'n, bian kun ô Jérusalem, bé flee Siméon. Bian so'n ti swran nanwlefue, o srô Nyanmien kpa. O minnde Israël i wla tyityile'n, ye Nyanmien Wawe'n ye o sié io.

²⁶ Nyanmien man i Wawe'n bô su klélii ke o su wuman, san oh wunh é Min Nyanmien i Christ'n. (*f1*)

²⁷ Nyanmien Wawe'n fe oo Nyanmien sua dan'n nun. Ke Jésus i si nin i nin béh feh ko Nyanmien sua dan'n nun ke béh yôh nga bé klee mmla'n nun ke bé yô'n,

²⁸ Siméon fa bakan'n yii i sa su, o manman Nyanmien, o sé ke:

²⁹ Nannan, nde nga a kannin'n wa dyu, mon o swran'n i atin mon o o blelele sien'n.

³⁰ Afin m bobo man wun Ti Défue'n bo a fa maan yé'n nin n nyinma,

³¹ Ti Défue'n bo a fa sié swran'n kwlaa bé nyrun'n,

³² «O ti ke wia'n sa, o wa kpadya nvlé bo bé ti'a Juif'n, bé nyrun,» Ye o ti o swran Israël'm bé anyrunnyan liké.

³³ Ba i wun nde ng'o kan'n, o bô i si nin i nin bé nuan.

³⁴ Siméon yraa bé nguan, nan wa sé i nin Marie ke: Nian, ba ng'o ô ye'n, o ô le Israëlfue'm bé sunman bé asé finle nin bé sumanle'n ti. O wa yô ke liké kun bo bé wa ken i wun nde te sa,

³⁵ bo i ti swran kpanngban bé awlen'n nun akunndan'n oh fitéh su. Ye wo, wo awlen'n o wa kpe o klun.

³⁶ Nyanmien nuan idyofue bla kun kusu ô le, bé fle i Anne, Phanuel b'o fin Aser ôsu'n nun'n, i waa, wa yô ôké kpa. Ke bé wulii'n, wa si'a yasua fi san i wun b'o dyeli i'n. Bé traan afue nsô, i wun'n wuli,

³⁷ wa dya'a bian kun. Wa di afue ablaotyue-nin-nnan, o tu'e i bô Nyanmien sua dan'n nun, o su Nyanmien kongue nin wia nun, o kpe sre nun sre Nyanmien.

³⁸ Bla so'n kusu baa le do kunngba so'n su, o manman Nyanmien, ye o kan Jésus nde kléé bé kwlaa nga bé minnde ke Nyanmien dé Jérusalemfue'm bé ti'n.

Bé Nazareth kole

³⁹ Ke bé yôô kwlaa nga bé klee é Min Nyanmien mmla'n nun ke bé yô'n wiéli'n, bé oo bé klo Nazareth Galilée men'n nun.

⁴⁰ Bakan'n yôô kpa, o nyiin klanman. O si ngwlele dan kpa, ye Nyanmien man i liké'n kwlaa yô yé.

Sa nga Jésus yôé Nyanmien sua dan'n nun i bakan nun'n

⁴¹ Afue kwlaa Jésus si nin i nin bé ko Jérusalem Pâque (*f17*) dile.

⁴² Ke o dii afue blu-nin-nnyon'n, bé oo tyen'n i dile ke bé fa yôé titi'n sa.

⁴³ Ke bé wiéé tyen'n di bo béh sah bé sin'n, Jésus kaa Jérusalem lo, sannge i si nin i nin bé si'a so.

⁴⁴ Bé bu i ke o ô bé bo bé nin bé ko'n bé nun. Ke bé dii lé kun atin'n nun'n, bé kunndee béfue nin bé dyanvue'm bé nun,

⁴⁵ sannge ba wunmen. Bé saa bé sin Jérusalem i kunndele.

⁴⁶ Ke o dii lé nsan'n, bé kô wuin Nyanmien sua dan'n nun Juif'm bé ninngé kléfue'm bé afien, o su tié bé nde ye o usa bé sa.

⁴⁷ Bé kwlaa nga bé ti i nde'n, i ngwlele'n nin sa b'o te bé su'n, o bô bé nuan.

⁴⁸ Ke i si nin i nin bé wunniin'n, bé nuan bô bé wun, ye i nin sé i ke: ?N wa, nzu ti ye a yô é soo? Min nin o si ya kunnde o lélé, é nyin a blô dan kpa.

⁴⁹ Ye o sé bé ke: ?Nzu ti ye an kunnde mion? ?An si'a ke n Si ninngé'm bé mian n saa?

⁵⁰ Sannge ba wu'an nde so'n b'o kan kléé bé'n i wle.

⁵¹ Ke o yôô so'n, o nin bé oo Nazareth, i nyin yi bé. I nin fa sa so'n siéé i klun.

⁵² Ke Jésus nyinh'n, wuun i ngwlele'n ko i nyrun, ye i wun yô Nyanmien nin swran'm bé fe.