JÉSUS-CHRIST I DYASIN FE'N BO LUC KLELI'N 18 - Nyanmien nde Ufle

Dyole difue b'o ti'a kpa'n i wun nyanndra

¹ Jésus bu nyanndra kun kléé bé ke bé nin Nyanmien bé kôkô yale titi, nanh man bé yatyi.

² O sé ke: Dyole difue kun ô klo kun su, o srô'a Nyanmien, o bu'a swran fi swran.

³ Bla kun kusu bo i wun wuli'n, o ô klo so'n su, o ko dyole difue so'n i sin tititi, o sé i ke o dyren i sin o di nde b'o ô o nin i kpofue'n bé afien'n.

⁴ O tye kpa o kpli'an su, sannge lé kun lie'n, o buu i akunndan o sé ke: Kannze n srô'a Nyanmien, m bu'a swran swran'n,

⁵ sannge yale bo bla so'n klé min'n ti, m ma dyren i sin di i dyole so'n, se man yô'e so'n, o su yatyi'a n yale kléle'n.

⁶ Ye é Min'n sé bé ékun ke: Anh nian nde nga dyole difue b'o ti'a kpa'n o kannion.

⁷ ?Ye bé nga Nyanmien kpaa bé bo bé sun flee kongue nin wia nun'n, o su dyra'an bé sin di'a bé nde'n? ?Oh sisih i bô nan wa di bé dyole'n?

⁸ Tyetye, oh dyranh bé sin di bé dyole so'n ndende kpa. ?Sannge ke m bo n katyii Swran'n m ba'n, nh wunh swran bo bé lafi n su asie'n su wa?

Pharisifue kun nin guabô sika défue kun

⁹ O bu nyanndra nga ékun kléé bé bo bé bu bé wun swran kpa, bo bé yô swran wié'm bé finfin'n.

¹⁰ O sé ke, swran nnyon bé oo Nyanmien sua dan'n nun ke bé kô kôkô yale klé Nyanmien, kun ti Pharisifue (*f4*), ye kun ti guabô sika défue.

¹¹ Pharisifue'n dyran nglô o kan ke i bobo ti'n klé Nyanmien, o sé ke: Nyanmien Kpli, kwla ô, afin n lie'n, n ti'a ke swran nga'm bé sa, bo bé dé swran liké wué kéklé su, bé di'a nanwle, bé kunnde bla bé yi bô nin bian bé wun bô'n bé lie'n sa, ye n ti'a ke guabô sika défue ng'o dyin ye'n sa.

¹² Lé motyue kwlaa n tyi nglemun kpe nnyon, ye liké kwlaa nga n nyen'n, n yi i blusu. (*f16*)

¹³ Guabô sika défue'n dyran mmua lo, wa kwla me'en i ti su bobo, sannge o fe i sa'n fin i wué nun, o sé ke: Éé Nyanmien, yatyi, n ti sa te yôfue, si min aunnvue.

¹⁴ Nanwle, ke guabô sika défue so'n koh i awlô'n, Nyanmien nin i bé afien a se, sannge o nin kun'n bé afien a seman. Afin swran kwlaa ng'o yô i wun dandan'n, Nyanmien gueh i nyin asé, sannge swran ng'o tu'e i wun'n, Nyanmien man oh nyanh nyrun.

Ba kanngan mun

¹⁵ Swran wié'm bé fa ba nonman mun bleli Jésus ke o kan bé. Ke i sonnzonfue'm bé wuun i so'n, bé idyoo bé.

¹⁶ Sannge Jésus fle ba kanngan mun ke bé ble i wun le, ye o sé ke: Anh yatyi ba kanngan'm bé nun man bé bla n sin, nanh an fuan bé, afin bé bo bé yô bé wun ke ba kanngan nga mun sa'n, bé ye Nyanmien sié béo.

¹⁷ Nanwle, swran ng'o yô'e i wun ke bakan sa, o fe'e i wun ma'an Nyanmien ke o siéé'n, o su yô'a men nga Nyanmien sié'n i nunfue mlonmlon.

Gbanflen anyanbéunfue'n

¹⁸ Juif'm bé kpen kun wa usa Jésus ke: ?Ndya, o bo a ti swran kpa'n, nzu ye n yô nan man nyan anannganman nguan nion?

¹⁹ Ye Jésus use i ke: ?Nzu ti ye a sé n ke n ti swran kpa nion? Swran fi ti'a kpa, san Nyanmien kunngba tye.

²⁰ A si mmla nga bé klee ke: «Nanh kunnde bla o yi bô, nanh kun swran, nanh wua, nanh ton swran suen, bu o si nin o nin bé swran'n.»

²¹ Ye o sé ke: Ke o fin m ba kaan nun'n, n fe i kwlaa so'n su.

²² Ke Jésus tii i nde so'n, o sé i ke: O te ka o liké kun yôle, yô o bô ninngé'n kwlaa ate, fe i sika'n man yalefue mun, ye a wa nyan ninngé kpakpa nyanmien su lo. Ke a kô yô i so'n, bla'a su n su.

²³ Ke o tii nde so'n, o yôô i ya kpa, afin o ti anyanbéunfue dan.

²⁴ Ke Jésus wuun ke i wla'n wa bô'n, o sé ke: Anh nian ke bé nga bé ti anyanbéunfue'n, ke bé fa bé wun man Nyanmien nan o sié bé'n, o ti kékléo!

²⁵ Ke chameau kun sin dolua bue nun'n, o ti popo tra ke anyanbéunfue kun fe i wun man Nyanmien nan o siéé'n.

²⁶ Bé nga bé tii nde so'n, bé sé ke: ?Se o ti so'n, wuun wan ye o kwla fité nuon?

²⁷ Ye Jésus sé ke: Liké nga swran kwle'e i yô'n, Nyanmien kwle i yô.

²⁸ Ye Pierre sé ke: Nian, ya yatyi é ninngé mun ya su o su.

²⁹ Ye Jésus sé bé ke: Nanwle, swran kwlaa ng'o yatyi se i awlô ô, i yi ô, i niaan mun ô, i si ô, i nin ô, i wa ô, ke Nyanmien siéé'n,

³⁰ oh nyanh bé wunsu kpe ya ke é sé ye'n, ye ble ng'o ba lo'n, oh nyanh anannganman nguan.

Jésus i kunle'n i su bôle kpe nsan su

³¹ Jésus flee i sonnzonfue blu-nin-nnyon'n bé aamien, o sé bé ke: Anh nian, é su ko Jérusalem, ye m bo n katyii Swran'n min wun nde kwlaa nga Nyanmien nuan idyofue'm bé kleli'n, o wa kpen su.

³² Béh fah min man bé bo bé ti'a Juif'n, béh yôh n finfin, béh yôh n tete, béh guah min wun ngosre.

³³ Béh bôh min, ye béh kunh min, sannge i lé nsan su nh tyenh.

³⁴ Sannge ba wu'an nde so'n b'o kannin'n wié fi wle, o ti'a wéiin bé nyrun, o man bé si'e i bô.

Jéricho anyansifue'n

³⁵ Ke Jésus dyuu Jéricho tiwa le'n, anyansifue kun ti atin nuan lo o sresre liké.

³⁶ Ke o tii swran'm bo bé sin'n bé ngan'n, o use ke: ?Nzu saa?

³⁷ Ye bé sé i ke: Jésus b'o fin Nazareth'n ye o su sion.

³⁸ O kpan sé ke: Jésus, David Anunman, si min aunnvue, yô n yé!

³⁹ Bé nga bé dun mmua'n, bé kpen i su ke o muen i nuan, sannge o kpan kéklé kpa tra laa lie'n, o sé ke: David Anunman, si min aunnvue, yô n yé!

⁴⁰ Jésus dyrannin, o sé bé ke: Anh fe ble min. Ke o tôé le'n, o use i ke: ?Nzu ye o waan n yô man o?

⁴¹ Ye i waan: Nannan, n waan, a tiké min nyin!

⁴² Jésus sé i ke: Nian! W'a wun asé, n su bo a lafi'n ti, a nyon o ti.

⁴³ Bé dya ôsu kunngba'n nun, kpekuun wa wun asé, o la Nyanmien asé, o su Jésus su. Ke swran'n kwlaa bé wuun sa so'n bé manmaan Nyanmien.