JÉSUS-CHRIST I DYASIN FE'N BO LUC KLELI'N 15 - Nyanmien nde Ufle

Bua b'o mlinnin'n i wun nyanndra

¹ Lé kun guabô sika défue nin sa tete yôfue'n kwlaa bé baa Jésus wun le ke béh tiéh i nde'n.

² Pharisifue'm (*f4*) bé nin mmla kléfue mun bé tretrelii ke: Bian nga so sa tete yôfue'm bé nun, o nin bé di liké.

³ Nan i kusu wa bu bé nyanndra nga, ke:

⁴ ?Amun nun ônin ye se o le bua ya, nan se kun mlin'n, o yatyi'a ablangwlan-nin-ngwlan nga mun blô lo o kunndeman kun ng'o mlinnin'n lélé san oh wunh io?

⁵ Ke o kô wuin'n, i klun dyoh dan kpa, oh feh bô i komin su.

⁶ Ke o dyu awlô lo'n, oh yieh i dyanvue nin i tranfue mun oh séh bé ke: An man é si ablé, afin m bua'n b'o mlinnin'n, man wuin.

⁷ O man nh séh amun ke, se sa te yôfue kun kusu katyi i nzuen'n, bé klun ng'o dyo nyanmien su lo i ti'n, i dan tra bé klun ng'o dyo swran nanwlefue ablangwlan-nin-ngwlan bo bé klô'a ke bé katyi bé nzuen'n bé ti'n.

Sika b'o mlinnin'n i wun nyanndra

⁸ ?Ye bla ônin ye se o le dyete mma blu, nan kun mlin'n, o so'a kannin o kuanman sua lo, o kunndemen bleble lélé san oh wunh io?

⁹ Ke o kô wuin'n, oh yieh i dyanvue nin i tranfue mun oh séh bé ke: An man é si ablé, afin n sika b'o mlinnin'n, man wuin.

¹⁰ O man nh séh amun ke, sa te yôfue kun b'o katyi i nzuen'n ti, Nyanmien i ange'm bé klun dyo.

Ba wannzôfue'n

¹¹ O kan klé bé ékun ke: Bian kun le ba yasua nnyon.

¹² Lé kun kasienfue'n séé i si ke: Baba, fa o liké nga tyen wié o kô yô n lie'n man min. Ye bé si bu i ninngé'm bé nun maan béo.

¹³ Ke o dii lé nnyon kun'n, ba kasien so'n yô liké ng'o nyennin'n i ate. O fe i sika'n o oo nvlé wié nun mmuamua kpa, o yôô sika so'n kwlaa wannzô, nan wa wié.

¹⁴ Ke o wiéé i kwlaa satyi'n, awé dan kpa o wa kpen men so'n nun, kpekuun i sa mian.

¹⁵ O fe i wun man men so'n nunfue kun, nan wa sunmen i fié su lo ke o kô nien i kokoti'm bé su.

¹⁶ O klô ke oh dih alie nga kokoti'm bé di'n wié, sannge swran fi a menmen.

¹⁷ Ke o tran bu akunndan bo i nyin kpeen i laa'n nun'n, o sé ke: Nian n si awlô lo dyunman difue kpanngban bo bé di'a alie yale, ye min, min ye n su wu awé nun wa'n!

¹⁸ M ma dyaô ko n si sin, nan nh séh i ke:

¹⁹ Baba, man yô te nyanmien'n bô, ye man yô o te. Ke bé sé ke n ti o wa'n, o nin i so fataman kun. Fa min yô ke o dyunman difue'm bé nun kun sa.

²⁰ O dyaô oo i si sin. Ke oh koh b'o wa dyu lo bo i si wunniin mmua lo'n, o yô i annvo, nan wa wanndi a kô to i nun.

²¹ Ba'n séé i si ke: Baba, man yô te nyanmien'n bô, ye man yô o te. Ke bé sé ke n ti o wa'n, o nin i so fataman kun.

²² Sannge i si séé i swran'm bé ke: Anh fa trale klaan kpafue'n bla ndende fa wle i wun, anh fa sama ti nga kun wle i sa, ye anh wle i ngbabua.

²³ Anh fa nannin nga wa lô kpafue'n bla, anh kuin man é fa di tyen,

²⁴ afin n wa ng'o ô ye'n, o wuli, ye wa nyan nguan ékun, o mlinnin, man wuin ékun. Ye bé bôô tyen dile so'n bôo.

²⁵ Ke oh yôh so'n, wuun ba kpenngbenfue'n wô fié su lo. Ke oh bah b'o mantaan awlô le'n, o ti dyué'n nin klen'n.

²⁶ O flee i si i swran'm bé nun kun, nan wa use sa nga ti ye bé bô klen'n.

²⁷ Ye o sé i ke: O niaan bian ye o balio, ke o si wunniin b'o ti dyuédyué wa kun nannin nga wa lô kpafue'n wa wle i trô nun.

²⁸ Ye o faa yaa, o klô'a ke o wlu awlô lo.

²⁹ I si fité kô kpetelii, ye o séé i si ke: Nian, sule nga n fa su o lélé fa dyu nde'n, n nian kpeman wo atisre lé, sannge a nian ma'an min bôli ba bo kun lé, bo min nin n dyanvue mun é fa di tyeon.

³⁰ Sannge ke o wa ng'o kô satyi o ninngé'n kwlaa téklé mmla'm bé su'n bali'n, a kun nannin nga wa lô kpafue'n, a wle i trô nun!

³¹ Nan i si a sé i ke: N wa, o lie'n, min nin wo ye é ô wa titio, liké kwlaa ng'o ti n lie'n, o ti o lie.

³² Yele ke o niaan ng'o ô ye'n, o wuli, ye wa nyan nguan ékun, o mlinnin bo ya wuin ékun'n, o man tyen dile nin aunbliblie so'n o ti i su.