JÉSUS-CHRIST I DYASIN FE'N BO LUC KLELI'N 13 - Nyanmien nde Ufle

Swran'm bé nzuen katyile nde

¹ Ke o yôô so'n, lé kun swran wié'm bé wa kan sa bo Pilate fa yôô Galiléefue wié b'o fa bé mmôdya'n sanngan nnen nga bé fa so Nyanmien'n i mmôdya nun'n, i nde kléé Jésus.

² O usa bé ke: ?An bu i ke Gailiéefue so'm bé sa te lie'n tra Galiléefue nga'm bé lie'n ti ye man bé wuun nyrennen dan soo?

³ Nenh i so tio, sannge se amuan katyi'a amun nzuen'n, nanwle, amun kwlaa amun wa wu ke bé lie'n sa.

⁴ ?Ye swran blu-nin-motyue bo Siloé akpa fléiin'n bu to bé su kuun bé'n, an bu i ke bé wun sa lie'n tra Jérusalemfue'n kwlaa bé lie'n?

⁵ Nenh i so tio, sannge se amuan katyi'a amun nzuen'n, nanwle, amun kwlaa amun wa wu ke bé lie'n sa.

Blofue aloma b'o suman'n i wun nyanndra

⁶ O bu nyanndra nga klé bé, o sé bé ke: Bian kun taa blofue aloma bô kun i raisin (*f12*) fié'n nun. I waan o wa nian se o sulio oh tih, sannge wa suman.

⁷ Ye o sé raisin fié sunianfue'n ke: Nian blofue aloma bô kun nga ke m be i nianle nan se mma ô suo, n ti, bo wa suman'n i afue nsan ye, i so'n ti, bu i bô. ?Nzu ye o dyin le yôo?

⁸ Sannge raisin fié sunianfue'n sé i ke: Baba, yatyi i le, man é nien afue nga ékun, m ma funfun i bô, n gue i bô nnen waka su.

⁹ Se é yô i soo wiénuon afue b'o ba lo'n oh suh, se é yô i so nan wa suman'n, a kô bu i bô.

Bla tyetyewafue kun i dyuédyué yôle

¹⁰ Sabbat b'o ti Juif'm bé tyen te'n kun Jésus klé liké Nyanmien sua kun nun.

¹¹ Ke oh yôh so'n, bla kun ô le, asie usu wié satyilii, ke o nanti'n, o klu, wa di afue blu-nin-motyue, o kwla tinnge'e i wun mlonmlon.

¹² Ke Jésus wuun bla so'n, o flelii, o sé i ke: Mmô, o tukpatye'n wa wié, a nyon o ti, ye o fe i sa fue i suo.

¹³ Bé dya ôsu kunngba'n nun le kpekuun wa tinnge, nan wa la Nyanmien asé.

¹⁴ Sannge bla i dyuédyué bo Jésus yôlii sabbat tyen'n, o yôô Nyanmien sua sukpen'n i ya, nan wa sé swran'm bé ke: Tyen nga bé fa di dyunman'n o ti tyen ba nsien, anh bla tyen so'm bé nun man bé yô amun dyuédyué, nanh an ba sabbat tyen'n kun.

¹⁵ Ye é Min'n sé ke: ?Amun dunman klôfue mun, amun nun ônin ye sabbat tyen o nyanndyimen i nnen b'o ô tuin'n nun'n, se nannin ô, se aflunmun ô, o kô me'en nzuéo?

¹⁶ ?Ye bla nga li b'o ti Abraham anunman bo Satan (*f6*) tyilii wa di afue lélé blu-nin-motyue'n, i ye se n nyanndyii sabbat tyen'n, o ti'e i suo?

¹⁷ Ke o kaan so'n, i kpofue'm bé kwlaa bé nyin guaa asé, ye abônuan sa kwlaa b'o yôô bé'n ti, swran'n kwlaa bé klun dyoli.

Moutarde'n i wun nyanndra

¹⁸ O sé bé ékun ke: ?Nyanmien siéle'n fa nzu, ye nzu ye n fa sunnzun io?

¹⁹ O fa moutarde (*f9*) mma bo swran kun fa lue i fié'n su'n, o fifi, o yô waka dan, anunman'm bé wa yô bé sua i sama'm bé su.

Kpaun ayré'n i wun nyanndra

²⁰ O sé bé ékun ke: ?Nzu ye nh fah Nyanmien siéle'n sunnzun io?

²¹ O fa kpaun ayré bo bla kun fa gua kpaun nzuen gla kun nin sin nun, nan i wunmuan'n wa wla'n.

Anuan fii'n

²² Ke Jésus koh Jérusalem'n, o sin klo dandan nin klo kanngan'm bé su o klé bé liké.

²³ Swran wié wa use i ke: ?Nannan, swran kaan sa ye béh fitéh nuon? O sé bé ke:

²⁴ Anh mian amun nyin anh sin anuan fii'n nun. Afin anh nian, swran kpanngban bé klô ke béh sinh nun, sannge bé su kwla sinman.

²⁵ Ke awlô bô kpen'n kô tô anuan'n nun'n, amun bo an ka gua su lo'n, amunh bôbôh anuan'n amunh séh ke: Ndya, tiké é anuan! ye oh séh amun ke: N si'a amun finwle.

²⁶ Ye amunh séh i ke: É nin wo é wla a sa, ye a klé liké é klo'n su.

²⁷ Ye i kusu oh séh amun ke: «Amun kwlaa bo an yô sa te'n, anh fa dyaô min wun le,» n si'a amun finwle.

²⁸ Ke an kô wun Abraham, nin Isaac, nin Jacob, nin Nyanmien nuan idyofue'n kwlaa Nyanmien men'n nun bo amun kusu béh kanh amun bô an ka guasu lo'n, amunh sunh, amunh dih amun dyé.

²⁹ Swran wié'm bé wa fin wia afilie, nin senze atolie, nin papla nun lo, nin bué kun ékun lo béh bah, bé wa di liké Nyanmien men'n nun.

³⁰ Anh nian, bé nga bé duun mmua'n bé wié'm bé wa ka sien, ye bé nga bé kaa sien'n, bé wié'm bé wa dun mmua.

Kôkôle nga Jésus kôkôé Jérusalem ti'n

³¹ Lé kunngba so'n, Pharisifue (*f4*) wié'm bé wa séé Jésus ke: Hérode waan o nyan oo oh kunh o, i so'n ti, dyaô wa.

³² Ye o sé bé ke: Anh kô sé wanga so'n ke, nde nin ainman nh fuanh asie usu mun, ye nh yôh swran'm bé dyuédyué, i lé nsan su ye nh wiéh n dyunman'n dio.

³³ Sannge san nh nantih nde, nin ainman, nin ainman sin, afin ke Nyanmien nuan idyofue kun yatyi Jérusalem le kô wu klo ufle su'n, o ti'e i nuan su.

³⁴ Oô Jérusalem! Jérusalemfue mun bo an kun Nyanmien nuan idyofue mun'n, bo an fin bé nga bé sunman bé amun sin'n bé yebue'n, ble sunman n klô ke nh fleh amun mma mun, ke ako ta kun fle i mma mun o utu bé su'n sa, sannge amuan kpli'an su!

³⁵ Anh nian, amun awlô'n o wa ka amun sa nun, ye nde kun bo nh kanh klé amun'n ye, an su wu'an min kun lélé san amunh séh ke: «Swran ng'o ba é Min Nyanmien'n i dunman nun'n, man i liké'n kwlaa yô yé.»