JÉSUS-CHRIST I DYASIN FE'N BO LUC KLELI'N 11 - Nyanmien nde Ufle

Swran nin Nyanmien bé yale kôkôle

¹ Lé kun Jésus ô lika kun, o nin Nyanmien bé su kôkô yale. Ke bé wiéé yale so'n kôkô'n, i sonnzonfue'm bé nun kun sé i ke: Nannan, klé é swran nin Nyanmien bé yale kôkôle'n ke Jean kléé i lie mun'n sa.

² O sé bé ke: Se amunh kôkôh yale klé Nyanmien'n, anh sé ke: É Si, man é bô o dunman fe, mon o siéle ble'n dyu.

³ Tyen kwlaa man é alie ng'o dyu yé'n.

⁴ Yatyi sa nga é yô wo'n tye é, afin é kusu, swran kwlaa nga bé yô é sa'n, é yatyi tye bé. Nanh yatyi é le man bé laka é.

⁵ O séé bé ékun ke: Anh bu i akunndan nian, se amun nun kun le i dyanvue b'o wa tôé kongue afien, o sé i ke:

⁶ Dyanvue, man min kpaun nsan nan o yôo, m ma sié i ôsu, n dyanvue kun fin lika wa'a tô n kongue'n, n le'a liké fi nan man fa men,

⁷ se i dyanvue so'n sé i ke: Nanh klé n yale, ba tô anuan'n nun, min nin m mma mun ya la, n kwla dyaôman nan man fa kpaun a man wo'n,

⁸ nanwle, nanh ke o ti i dyanvue'n ti ye man oh dyaôh fa men io, sannge i yale b'o kléé'n ti ye man oh dyaôh fa liké kwlaa ng'o mien i sa'n men io.

⁹ O man n kusu nh kanh klé amun ke, anh sre, béh fah man amun, anh kunnde, amunh nyenh, anh bôbô, béh tikéh amun anuan.

¹⁰ Afin swran kwlaa ng'o sre liké'n, bé men, swran ng'o kunnde liké'n, o nyen, ye swran ng'o bôbô anuan'n, bé tiké.

¹¹ ?Amun nun ônin ye se i wa sé i ke o men i kpatra'n, o yatyi fa wuô men io?

¹² ?Kusu se o sé i ke o men i klénzua'n, o fa nyannglan men io?

¹³ Se amun bo an ti swran te'n, an fa liké kpa tye amun mma mun'n, wuun é Si b'o ô nyanmien su lo'n kusu, oh feh i Wawe'n man bé nga bé sre i'n kpe blu.

Jésus nin Béelzébul

¹⁴ Jésus tuu asie usu bôbôfue kun b'o satyili bian kun'n. Ke asie usu so'n b'o yôô bian'n i bôbô'n dyaô i su b'o idyoli'n, o bôô swran'n kwlaa bé nuan.

¹⁵ Sannge bé wié'm bé waan: Béelzébul (*f7*) b'o sié mmusu'm bé kwlaa'n, i dunman nun ye o fuan asie usu muon.

¹⁶ Jésus kan nianle ti, swran wié'm bé sé i ke, o yi nyanmien su lo atre kun klé bé.

¹⁷ Ke o wuun bé akunndan'n, o sé bé ke: Se famien kun i swran b'o sié bé'n bé bu bé wun nun'n, i men so'n satyi, ye awlô nga bé bu nun'n o satyi.

¹⁸ ?I so'n ti, se Satan (*f6*) i minnien'm bé bu bé wun nun'n, oh yôh se ye i men'n kwlah yô kpaa? Afin amun waan, Béelzébul dunman nun ye n fuan asie usu muon.

¹⁹ ?Se n fuan asie usu mun Béelzébul dunman nun'n, wuun wan dunman nun ye amun mma'm bé kusu bé fuan béo? I so'n ti, bé bobo ye bé nin amunh kaanh.

²⁰ Sannge se Nyanmien Kpli dunman nun ye n fuan asie usu mun'n, wuun Nyanmien siéle'n wa yô amun wa.

²¹ Se swran wunmienfue kun le ale ninngé b'o fa nien i awlô'n su'n, i ninngé'm bé satyiman.

²² Sannge se swran ufle b'o le wunmien tre'n, o wa to i su o kwle'n, oh déh i ninngé b'o fa kun ale b'o lafi su'n kwlaa'n, oh fenh i bô ninngé'n, oh fah tye.

²³ Swran ng'o nin min nu'an nun'n, o ti n kpofue, ye swran ng'o nin min tienmen i nuan'n, o trutru nun.

Asie usu'n i sin sale

²⁴ Ke asie usu b'o satyi swran'n, o kô dyaô swran su'n, o kô wlanwlan lika wié bo bé nyanman nzué nun'n, bé nun, o kunnde wunmien déwle. Ke o nyanmien wié mlonmlon'n, o sé ke: M ma sa n sin n sua nga n fin nun fitéli'n nun.

²⁵ Ke o se i sin b'o dyu le'n, o wuun ke ba kuan nun, ba siésié i nun ninngé mun.

²⁶ Kpekuun o kô fe i wiéngu asie usu nsô bo bé te lie'n tre i lie'n, bé wa wlu sua so'n nun bé tran nun, o man swran so'n i satyile b'o satyi sien'n, o yô te dan tra laa lie'n.

Bé nga bé lie su ti yé'n

²⁷ Ke Jésus nuan te ô nde'n su'n, bla kun kpan swran'm bé afien le, o sé i ke: Bla ng'o wunnzeli wo'n, nin nyonflen nga a nonnin'n, bé lie su ti yé!

²⁸ Jésus a kpli'an su, nan wa sé ke: Sé ke, swran ng'o tié Nyanmien nde'n b'o fa su'n, i lie su ti yé!

Atre bo Jésus a yiman'n

²⁹ Ke swran'm bé yiali kpanngban'n, Jésus sé bé ke: Adyulisufue nga'm bé ti te, bé waan bé yi atre klé bé, sannge bé su yi'a atre fi klé'a bé, san Jonas lie'n tye.

³⁰ Afin ke Nyanmien fa Jonas yii atre Ninivefue'm bé nyrun'n, i kunngba nion, o wa fa m bo n katyii Swran'n kusu yi atre adyulisufue nga'm bé nyrun.

³¹ Dyole dile tyen'n nun famien bla'n b'o fin Jérusalem papla nun mmua lo'n, o wa dyaô kan sa nga adyulisufue nga'm bé yôli'n, o man béh buh bé fo, afin bla so'n fin asie i awiélie lo ke o wa tié Salomon i ngwlele nde'n, ye nian, swran kun ô wa bo i dan tra Salomon.

³² Dyole dile tyen'n nun Ninivefue'm bé wa dyaô, béh kanh sa nga adyulisufue nga'm bé yôli'n, o man béh buh bé fo, afin ke Jonas kan Nyanmien nde kléli Ninivefue mun'n, bé katyii bé nzuen'n, ye nian, swran kun ô wa bo i dan tra Jonas.

Kannin b'o man bé wun asé'n

³³ Bé so'a kannin siémen liké wié bô, annze se bô, sannge bé fa sié liké su nglô, nan bé kwlaa nga béh wluh lo'n bé wuin.

³⁴ Bé wunnen'n i kannin yele bé nyinma, i so'n ti, se o nyinma'n ti kpa'n a wun asé wéiin, sannge se o nyinma'n ti'a kpa'n, a wu'an asé mlonmlon.

³⁵ I so'n ti, yô o nyinma b'o ti ke kannin sa'n, i tyetye, nanh mon o satyi, man a ka aôsin'n nun.

³⁶ O man se a wun asé wéiin bo o nyin su dunmon kaan sa'n, a wun liké'n kwlaa wéiin, ke kannin'n kpadya b'o man a wun asé'n sa.

Jésus i mmla kléfue nin Pharisifue'm bé kputule

³⁷ Ke Jésus nuan ô nde'n su'n, Pharisifue (*f4*) kun flee i ke o wa di liké i awlô lo. O wluu lo o tran alie'n sin.

³⁸ Ke Pharisifue'n wuun ke wa wunnzi'en i sa nan wa di liké'n, o bô i nuan kpa.

³⁹ Ye é Min'n séé i ke: Amun Pharisifue mun, an wunnzin klôwa nin talié'm bé sin, sannge amun awlen'n nun ti sa tete, ye an dé swran'm bé liké wué kéklé su.

⁴⁰ Sinnglinfue mun! ?Swran ng'o wu ninngé'n, nenh i kunngba'n ye o yô i sin'n nin i klun'n kwlaa nion?

⁴¹ Se an fa amun klôwa nin talié nun ninngé fa tye yalefue amun klun-ufué su'n, o ti kpa, ye liké fi su yô'a fien amun nyrun kun.

⁴² Amun Pharisifue mun, an yakô! yele ke an yi menthe nin rue (*f25*) nin liké kwlaa bo an lua bé'n, bé blusu, (*f16*) sannge an yatyi nanwle dile'n nin Nyanmien klôle'n, bé ye bé yôle'n ti su nion, sannge nanh an yatyi wié'm bé yôle.

⁴³ Amun Pharisifue mun, an yakô! yele ke an klô Nyanmien sua nun bia kpakpa'm bé su tranle, ye an klô ke bé yô amun liké nzra nun.

⁴⁴ An yakô! yele ke an ti ke ndia bo ba siémen i nzolie bo bé si'a so bé nanti su'n sa.

⁴⁵ Mmla sifue'm bé nun kun sé i ke: Ndya, nde a ken le'n a lô é kusu é ngasi.

⁴⁶ Ye Jésus sé i ke: Amun mmla sifue mun kusu, an yakô! yele ke an fa tro bo bé kwla suaman'n dyin swran'm bé ti su, sannge amun bobo an fa'a amun sama bo kun kenmen.

⁴⁷ An yakô! yele ke Nyanmien nuan idyofue bo amun nannan'm bé kuun bé'n, an kplan bé ndia'm bé su sua!

⁴⁸ O klé ke an dyin amun nannan'm bé dya nun, ye sa nga bé yôli'n o yô amun fe, afin bé ye bé kuun Nyanmien nuan idyofue muon, ye amun kusu an kplan bé ndia'm bé su sua!

⁴⁹ I so'n ti, Nyanmien b'o si sa'n kwlaa'n, o sé ke: M ma sunman n nuan idyofue nin swran wié bo n yi bé ke n sunman bé'n, bé wun lo, béh kléh wié'm bé yale, béh kunh wié.

⁵⁰ O man Nyanmien nuan idyofue kwlaa bo ke o fin men'n i bôbôle nun'n bé kuun bé'n, bé wié nde'n kah adyulisufue nga'm bé su.

⁵¹ Ke o fin Abel lie'n su lélé fa dyu Zacharie bo bé kunniin Nyanmien sowle'n nin i sua dan'n bé afien i lie'n su'n, nanwle, bé wié nde'n adyulisufue nga'm bé su ye oh kaah.

⁵² Amun mmla sifue mun, an yakô! yele ke se ngwlele'n wô sua kun nun'n, wuun béh séh ke i la clef'n wô amun sa nun, an klô'a ke an wlu lo, ye bé nga bé waan béh wluh lo'n, an ma'an bé atin.

⁵³ Ke o fin le fitéli'n, mmla kléfue nin Pharisifue'm bé wa mien kéklé kpa ke o kan liké kpanngban nde klé bé.

⁵⁴ Bé kô tié i nuan bô.