Jean 5 - Nyanmien nde Ufle

Jésus yôô Béthesda tukpatyefue'n i dyuédyué

¹ I sin, Juif'm bé tyen kun dyuli, o man Jésus oo Jérusalem.

² Jérusalem klo'n i anuan nga bé flee Bua'm bé Anuan'n, gblé kun ô le, bé fle i hébreu nun Béthesda, be bôô akpa nnun le.

³ Tukpatyefue kpanngban kpa bé lala akpa so'm bé bô, anyansifue, nin tyetyewafue, nin bé bo bé sa annze bé dya ti uwa'n, [bé minnde nzué'n i kédyéle,

⁴ afin tyen wié ange kun wa dyra nzué so'n nun, o kédyé nun. Ke o kô kédyé'n, swran ng'o dun mmua dyra nun'n, ke i tukpatye'n ti'n, o wié.]

⁵ Bian kun la le, ke o too tukpatye'n wa di afue ablasan-nin-motyue.

⁶ Jésus wunniin, o la le. Ke o si ke o la le wa tye kpa'n, o usee i ke: ?A klô ke ah yôh dyuédyué?

⁷ Tukpatyefue'n sé i ke: Ndya, n le'a swran bo ke nzué'n kô kédyé'n, o fa min yi nzué'n nuon. Ke nzué'n kô kédyé'n bo n waan nh koh'n, swran ufle dun mmua dyra nun.

⁸ Jésus sé i ke: Dyaô fo o be'n nan nanti.

⁹ Kpekuun bian so'n wa yô dyuédyué, wa fe i be'n o su nanti.

¹⁰ Sabbat b'o ti Juif'm bé tyen te'n ye o yôli sa so nion. O man Juif'm bé sé bian ng'o yôô dyuédyué'n ke: Nde ti sabbat, nanh suo o be'n.

¹¹ O sé bé ke: Swran ng'o yôô n dyuédyué'n o sé n ke n fa m be'n nan n nanti.

¹² Bé use i ke: ?Wan ye o sé o ke a fo o be'n nan a nantio?

¹³ Sannge bian ng'o yôô dyuédyué'n o si'a swran ng'o yôé dyuédyué'n, afin swran'm bo bé soon le'n ti, Jésus oli.

¹⁴ I sin, Jésus kô wuun bian'n Nyanmien sua dan'n nun lo, o sé i ke: Nian, w'a yô dyuédyué sien'n, nanh yô sa te kun man liké nga i te'n tra nga'n, o yô o.

¹⁵ Bian so'n woli kô sé Juif'm bé ke Jésus ye o yôlii dyuédyuéo.

¹⁶ Sabbat tyen ye Jésus yôô sa so nion, i so'n ti, Juif'm bé sue nganzua.

¹⁷ Sannge Jésus sé bé ke: Tyen kwlakwlakwla n Si di dyunman, n kusu n di dyunman.

¹⁸ Nde so'n ti Juif'm bé sue nganzua kpa tra laa'n ke béh kuinh, nanh sabbat b'o satyii'n ngunmin tio, sannge séle b'o séé ke Nyanmien ti i Si b'o fe i wun sunnzuin'n tio.

Atin'n bo Nyanmien Wa'n le'n

¹⁹ O man Jésus keen i bobo nde, o sé bé ke: Nanwle, liké nga Ba'n wun ke i Si yô'n, ye o nian su yôo. Ba'n bobo kwla kpe'e i ti nun yô'a liké fi. Liké kwlaa nga i Si'n yô'n, ye i kusu yôo.

²⁰ Afin i Si'n klôé, ye o klé i liké kwlaa ng'o yô'n. O wa klé i liké nga o yô'n bo i dan'n tra nga nan o bô amun nuan.

²¹ Ke i Si'n tyen swran b'o man bé nyan nguan'n, Ba'n kusu man swran ng'o klô ke o nyan nguan'n, o nyen.

²² Nenh i Si'n bobo ye o di dyole nion, sannge o fa nde'n kwlaa wlee Ba'n sa nun

²³ nan swran'n kwlaa bé bui swran ke bé bu i Si swran'n sa. Swran ng'o bu'e i Wa'n swran'n, wuun o bu'e i Si b'o sunmenniin'n, i swran.

²⁴ Nanwle, swran ng'o tié min nde'n b'o lafi swran ng'o sunmaan min'n su'n, o le anannganman nguan, bé su fe ko'a dyole difue'n i dyasu. Wa nyen i ti wié'n sa nun, wa nyan nguan.

²⁵ Nanwle, tyen wié lélé — tyen so'n wa dyu bobo — bo bé nga bé wuli'n béh tih Nyanmien Wa'n i nen. Bé nga bé kô ti'n, béh nyanh nguan.

²⁶ Ke nguan'n wô i Si sa nun'n, o man nguan so'n wô i Wa'n sa nun wié.

²⁷ Ye o fa dyole dile'n wlee i Wa'n sa nun, afin i ye o katyii Swraan.

²⁸ Nanh man nde so'n bô amun nuan, afin tyen wié lélé bé kwlaa nga bé ô ndia'n nun'n, béh tih i nen,

²⁹ béh fiah ndia'n nun fité. Bé nga bé yôô sa kpa'n, béh tyenh béh nyanh nguan, bé nga bé yôô sa te'n, béh tyenh, béh fah bé ko dyole difue'n i dyasu.

Bé nga bé kan Jésus nde'n

³⁰ M bobo n kpe'a n ti nun yô'a liké fi, dyole i wafa nga Nyanmien klé n ke n di su'n, ye n dio. O man dyole nga n di'n ti nanwle, afin nanh m bobo n klun sa ye n klô ke n yôo, sannge swran ng'o sunmaan min'n, i klun sa ye n yôo.

³¹ Se m bobo n yi min wun aye'n, bé su bu'e nanwle.

³² Swran ufle ye o yi min ayeo, ye n si ke aye so'n b'o yi min'n ti nanwle.

³³ An sunmaan swran Jean sin, ye o kan nde b'o ti nanwle'n i nde.

³⁴ N lie'n, n kunnde'a ke swran yi min aye, sannge n ken i so nan an nyan amun ti.

³⁵ Jean ti ke kannin b'o dyué b'o kpadya'n sa, ye i kpadyale so'n nun trale yôli amun fe kan.

³⁶ Lalôfue nga n le'n i nde b'o kan'n ti dan tra aye nga Jean yii min'n, afin liké nga n Si klé n ke n yô'n, bo n yô bé'n, o klé ke n Si ye o sunmaan mion.

³⁷ Ye n Si b'o sunmaan min'n, i bobo yi min aye. An nian tié'e i nen lé, an nian wu'en i nyrun lé.

³⁸ An fe'e i nde'n su, yele ke an lafi'a swran ng'o sunmenniin'n su.

³⁹ An suan Nyanmien Nde nga bé kleli'n, afin an bu ke i nun ye amunh nyanh anannganman nguan nion, ye nde so'n bé kan min nde.

⁴⁰ O nin i so'n ngba, an klô'a ke an bla n sin nan an nyan nguan!

⁴¹ N kunnde'a ke swran bô n dunman.

⁴² N si amun n si ke an klô'a Nyanmien.

⁴³ N Si ye man m balio, ye an so'a min nun. Sannge se swran wié bô i bobo i ti nun ba'n, amunh soh i nun!

⁴⁴ ?Amun bo an klô ke amun wiéngu bô amun dunman'n, bo an klô'a ke Nyanmien b'o ti kunngba tye'n ye o bô amun dunman'n, oh yôh se ye amunh kwlah lafi i suo?

⁴⁵ Nanh an bu i ke min ye nh kanh amunh wun nde klé n Sio, Moïse su sakpa'n, wuun amunh lafih n su wié,

⁴⁶ Se an lafi Moïse su sakpa'n, wuun amunh lafih n su wié, afin min nde ye o klelio.

⁴⁷ ?Ke an lafi'a nde ng'o kleli'n su'n, oh yôh se ye amunh lafih min nde lie'n suo?