Jean 4 - Nyanmien nde Ufle

Jésus nin Samarie bla'n

¹ Pharisifue'm (*f4*) bé tii ke é Min'n nyan swran kpanngban tra Jean o yô bé baptême.

² Sannge nenh i bobo ye o yô bé baptême so nion, i sonnzonfue mun ye bé yôo.

³ Ke Jésus tii ke ba ti'n, o dyaô Judée o oo Galilée men'n nun ékun.

⁴ Ke béh koh lo'n, san béh sinh Samarie men'n nun.

⁵ O dyuu Samarie klo kun bo bé flee Sychar'n su, klo so'n mantan lika kun bo Jacob fa meen i wa Joseph'n le.

⁶ Jacob i nzué kunman kun ô le. Ke Jésus nantili b'o feli'n, o traan asé nzué kunman so'n su le. Wuun wia'n wa dyran.

⁷ Samarie bla kun baa nzué sale. Jésus sé i ke: Mmô, man min nzué kan man n non.

⁸ Ke oh yôh so'n, wuun i sonnzonfue'm ba o klo lo ninngé diwa tôle.

⁹ Juif'm bé nin Samariefue mun diman. I son'n ti, bla'n use i ke: ?O yô se ye a sre min nzuéo?

¹⁰ Jésus sé i ke: Se a si liké nga Nyanmien fa man swran mun'n, o nin swran ng'o sé o ke a men nzué'n, wuun o bobo ah sreh i wié ye oh manh o nzué b'o sôndyi.

¹¹ Ye bla'n sé ke: Ndya, kunman'n ti kplôuun, a le'a liké bo a fa saa. ?Nin ye a nyan nzué so nion?

¹² É nannan Jacob ye o kpe kunman nga maan yéo. O nin i mma mun nin i nnen mun bé noon nga wié. ?A bu o wun ke a ti kpa tre?

¹³ Ye Jésus sé i ke: Swran kwlaa ng'o non nzué nga'n, nzué wé kuinh ékun,

¹⁴ sannge swran ng'o non nzué nga nh fah men'n, nzué wé su ku'en kun lé, afin nzué nga nh fah men'n oh katyih ke nzué ti sa i nun b'o nyren piaa lélé o man oh nyanh anannganman nguan.

¹⁵ Bla'n sé i ke: Ndya, man min nzué so'n wié nan nzué wé a ku'an n kun, nan man ba'a nzué so'n wié nan nzué wé a ku'an n kun, nan man ba'a nzué nun wa kun.

¹⁶ O sé i ke: Kô fle o wun nan anh bla.

¹⁷ Bla'n sé i ke: N le'a bian. Jésus sé i ke: Ke a sé ke a le'a bian'n, o ti nanwle,

¹⁸ afin w'a dya bian nnun, ye nga a nin i ô nun ke é sé ye'n, o ti'o o wun. O man nde nga a kan'n ti nanwle.

¹⁹ Bla'n sé i ke: Ndya, man wun ke a ti Nyanmien nuan idyofue.

²⁰ É nannan'm bé so Nyanmien ôka nga su wa, sannge amun Juif mun amun waan, san Jérusalem ye béh soh Nyanmieon.

²¹ Ye Jésus sé i ke: Mmô, lafi n su, tyen wié lélé nanh ôka nga su wa nin Jérusalem ye amunh kôtôh é Si'n bô amunh menmenh io.

²² Amun Samariefue mun, an si'a swran nga an kôtô i bô an menmen'n, sannge é lie'n, é si swran nga é kôtô i bô é menmen'n, afin swran'm bé ti nyanle'n fin Juif mun.

²³ Sannge tyen wié lélé — tyen so'n wa dyu bobo — bé bo bé kôtô é Si'n bô bé menmen sakpa'n, béh kôtôh i bô béh menmenh bé akunndan'n nun nanwle su, afin bé nga bé manman é Si'n so'n, bé sofue mun ye o kunnde béo.

²⁴ Nyanmien ti aôlia nun swran, o man bé nga bé waan béh kôtôh i bô béh menmenh'n, man bé yô i so bé akunndan'n nun nanwle su.

²⁵ Bla'n sé i ke: N si ke Messie bo bé flee Christ'n (*f1*) oh bah. Se o ba'n, oh kanh nde'n kwlaa klé é.

²⁶ Jésus kusu sé i ke: Yele min, i ye o su kan nde klé o ye'n.

²⁷ Ke oh yôh so'n ye i sonnzonfue'm bé dyuu leo. Ke bé wuun ke o nin bla kun su idyo'n, o bô bé nuan. Sannge bé nun kun sa wa use'e i ke: ?Nzu ye a kunnde bla'n sa nuon? annze: ?Nzu nde ye a nin i bé kaan?

²⁸ Bla'n yatyi i se'n le o wanndi oo klo, o kô sé swran'm bé ke:

²⁹ Anh bla'a nian bian kun bo wa kan sa kwlaa nga n yôô bé'n wa klé min'n. Bian so'n, m bu i ke Christo (*f1*).

³⁰ Ye bé fin klo lo bé bee i wun leo.

³¹ Ke oh yôh so'n, wuun i sonnzonfue'm bé dyin i wun ke: Baba, di liké'n.

³² Sannge o sé bé ke: N le liké diwa kun bo an simen.

³³ I so'n ti, i sonnzonfue'm bé usa bé wiéngu ke: ?Swran wié li a ble i likéo?

³⁴ Jésus sé bé ke: Min alie'n yele swran ng'o sunmaan min'n i klun sa yôle, nin dyunman ng'o maan min'n i bô guaguale.

³⁵ Amun lie'n, amun waan, o te ka anglô nnan nan awié'n i kpele a dyu. Sannge anh nian ke awié'n wa blô bo wa dyu i kpeleo.

³⁶ Ba bô awié kpefue'n i kale tuale'n bô, ke oh tienh i nuan minnde anannganman nguan'n nan swran ng'o gua wié'n nin i kpefue'n bé nnyon'n bé klun dyo.

³⁷ Afin nde nga bé kan sé ke: Swran kun gua awié ye swran ufle kpe'n, o ti nanwle.

³⁸ N sunmaan amun ke an kô kpe awié lika nga amuan di'a dyunman le'n. Swran wié mun ye bé dii dyunman so'n, ye an fee i nun liké nion.

³⁹ Bla'n i nde b'o kan kléé bé ke Jésus kan sa kwlaa ng'o yôli'n klélii'n ti, klo so'n sufue kpanngban bé lafii i su.

⁴⁰ Ke Samariefue so'n bé bee i wun le'n, bé sre i ke o la bé wun le, nan wa di lé nnyon le.

⁴¹ Nde nga i bobo kannin'n ti swran kpanngban bé lafii i su tra bé nga bla'n i nde'n ti bé lafii i su'n,

⁴² ye bé sé bla'n ke: Nanh nde nga a kannin'n ngunmin ti ye ya lafi i suo, afin ya ti i bobo nuan nun nde, o man é si ke o ti men'n i Ti Défue sakpa.

Jésus yôô famien'n i swran kaklaka kun i wa'n i dyuédyué

⁴³ Ke Jésus dii lé nnyon le'n, o tu i bô le oo Galilée,

⁴⁴ afin laa o séé ke: «Nyanmien nuan idyofue fi le'a nyrun i bobo men'n nun.»

⁴⁵ Ke o dyuu Galilée lo'n, Galiléefue'm bé soo i nun kpa, afin bé bobo bé oo Jérusalem lo tyen dile'n wié, bé wuun sa kwlaa ng'o yô bé le'n.

⁴⁶ I sin, o oo Cana Galilée men'n nun ékun, le ye laa o fa nzué katyii du vin nion. Famien'n i swran kaklaka kun ô Capernaüm lo, i wa yasua'n too tukpatye.

⁴⁷ Ke o tii ke Jésus fin Judée wa ba Galilée'n o oo i sin, o kô sre i ke o wa yô i wa'n b'o la wié be su'n, i dyuédyué.

⁴⁸ Jésus sé i ke: Se amuan wu'an atre nin abônuan sa'n, an su lafi'a n su mlonmlon!

⁴⁹ Famien'n i swran'n sé i ke: Ndya, bla é wo, se a bamaan n wa kan'n wuh.

⁵⁰ Jésus sé i ke: Ko, o wa'n wa yô dyuédyué. Bian so'n lafii nde nga Jésus kan klélii'n su, nan wa o.

⁵¹ Ke oh koh'n, i swran'm bé bee i atin kpale, bé sé i ke, i wa'n wa yô dyuédyué.

⁵² O usa bé do nga i wunnen'n flunmaan wié'n, ye bé sé i ke: Anunman ke wia'n san bé ti wun kan'n ye i wunnen'n dyolio.

⁵³ Ke bé séé i so'n, ye o wuun i wle ke do kunngba so'n su ye Jésus séé i ke, i wa'n wa ô dyuédyuéo. O man o nin i awlôfue'n kwlaa bé lafii i su.

⁵⁴ Ke Jésus fin Judée baa Galilée'n i atre nnyon su b'o yi'n ye.