Jean 2 - Nyanmien nde Ufle

Cana lo atonvle fale'n

¹ Ke o yô so b'o dii lé nsan'n, swran wié waan o su fa atonvle Cana Galilée men'n nun. Jésus nin'n wô le wié.

² Bé yiaa Jésus nin i sonnzonfue mun atonvle so'n bô wié.

³ Ke bé du vin'n wiéli'n, Jésus nin'n sé i ke: Bé du vin'n wa wié.

⁴ Jésus sé i ke: ?Mmô, nzu ti ye a kan klé mion? O nian dyu'a n liké yôle ka.

⁵ Ye i nin séé alie isafue'm bé ke: Liké kwlaa ng'o sé amun ke an yô'n, anh yô.

⁶ Yebue se nsien ô le bo kun kwla dyu litre ablaotyue annze ya-ablaon, Juif'm bé fa wunnzin, afin o ti bé nzuen.

⁷ Jésus sé alie isafue'm bé ke: Anh gua se nga'm bé nun nzué man bé yi, ye bé gua bé nun lélé bé yilio.

⁸ Ye o sé bé ékun ke: Anh sa wié fa kô man swran ng'o nian alie'n su'n, ye bé sa fa kô meen io.

⁹ Ke alie i sunianfue'n wo nzué b'o katyii du vin'n su'n, o si'a kan o fin'n, sannge alie isafue'm bo bé ye bé sali'n, bé si kan o fin'n.

¹⁰ Alie i sunianfue'n flee atonvle fafue'n, o sé i ke: Nian, swran kwlaa bé dun mmua fa du vin kpafue'n su swran mun. Ke ba non bo bé ku a yi'n ye bé fa ng'o yô'a fe kpa'n su béo. Sannge o lie'n, a fa du vin kpafue'n a sié lélé ye wa fa dyu ye'n.

¹¹ Sa so'n yôô Cana Galilée men'n nun. Ye o ti atre bo Jésus yii bé'n bé nun kliklio. O yili i wun nglô, nan i sonnzonfue'm ba lafi i su.

¹² Ke o yôô so'n, o nin i nin, nin i niaan, nin i sonnzonfue mun bé oo Capernaüm, sannge ba tye'a lo.

Aata difue'm bé Nyanmien sua dan'n nun fuanle

¹³ Ke Juif'm bé Pâque'n (*f17*) wa dyu'n, Jésus oo Jérusalem.

¹⁴ O tôô bé nga bé su yô nannin, nin bua, nin ôkunmômô ate'n Nyanmien sua dan'n nun lo, o nin sika katyifue'm bo bé titi le'n bé le.

¹⁵ O fa nyanman woo ngblé, o fa kaan bé kwlaa bé nin bé bua nin bé nannin'm bé bô, o gua sika katyifue'm bé sika'n i asé, o su bé table'm bé bô guali.

¹⁶ Ye o sé ôkunmômô ate yôfue'm bé ke: Anh yi ninngé nga'm bé wa! Nanh an fan Si i sua'n katyi aata diwle.

¹⁷ Ke o yôô so'n, i sonnzonfue'm bé wla kpeen nde nga bé klee ke: «O sua'n i klôle'n wa kun n kpô'n» su.

¹⁸ Juif'm bé use i ke: ?Nzu atre ye a wa yi klé é ti ye a yô soo?

¹⁹ Ye Jésus sé bé ke: Se an satyi Nyanmien sua dan nga'n, i lé nsan su'n nh kplenh ékun.

²⁰ Juif'm bé sé ke: Ke bé soo i kplanle su'n, i afue ablanan-nin-nsien ye. ?Ye o lie su, ah fah lé nsan kplaan?

²¹ Sannge i wunnen b'o fa sunnzun Nyanmien sua dan'n i nde ye o ken soo.

²² O man ke o tyennin'n, i sonnzonfue'm bé wla kpennin su ke o séli bé so, nan ba lafi Nyanmien Nde nga bé kleli'n nin nde ng'o kan kléé bé'n su.

Jésus si swran klun lo akunndan'n

²³ Ke Jésus ô Jérusalem lo Pâque (*f17*) nun'n bo bé wun atre b'o yii bé'n, swran kpanngban bé lafili i su.

²⁴ Sannge wa yi'e i wun asé a ma'an bé, yele ke o si bé kwlaa bé klun akunndan'n,

²⁵ o man o klô'a ke bé kan swran wun nde kléé. Afin i bobo si swran klun lo akunndan'n ngba.