Galasifuɛ Mun 3 - Nyanmien nde Ufle

Mmla'n nin Nyanmien su lafile

¹ Galatiefue sinnglinfue mun! ?Amun bo bé kaan Jésus-Christ i wule nde'n wéiin klé amun b'o man o yô ke o yôli amun nyrun sa'n, wan ye o wa lakaa amuon?

² Sa kunngba nga n klô ke nh wusah amun'n yele ke: ?Mmla'n bo an fa su'n ti ye Nyanmien fe i Wawe'n maan amuon, annze dyasin fe'n bo an tili an fa su'n ti ye o fe maan amuon?

³ ?Ke an ti sinnzin sa? An bôô i bô Nyanmien Wawe'n i fanngan nun. ?An klô ke amunh gueh i bô amun bobo amun fanngan nun sien'n?

⁴ ?Sa kwlaa ng'o toli amun su ye'n, oh yôh ngben? Nanwle, o kwla yô'a ngben!

⁵ ?Nyanmien b'o fe i Wawe'n man amun b'o yô sa kéklééklé man amun'n, mmla'n bo an fa su'n ti ye o yôé soo, annze dyasin fe'n bo an tili an fa su'n tio?

⁶ Ke Abraham lie'n yôô soo, «o lafii Nyanmien su, i su b'o lafii so'n ti ye o bui swran kpa nion.»

⁷ I so'n ti, bé nga bé lafi Nyanmien su'n, bé ti Abraham wa.

⁸ Ye bé bôô su Nyanmien Nde nga bé kleli'n nun ke, tyen wié bé nga bé ti'a Juif bo bé lafi Nyanmien su'n, oh buh bé swran kpa, o man o bôô nde fe so'n su kléé Abraham, o sé ke: «O ti, nh yôh nvlénvlé'n kwlaa bé yé.»

⁹ I so'n ti, bé nga bé lafi Nyanmien su'n, o yô bé yé ke Abraham b'o lafii i su'n i lie'n sa.

¹⁰ Afin bé kwlaa nga bé fa bé wla gua mmla'n su fale'n su'n, bé wun su dyo'a bé le, afin bé klee ke, «Swran kwlaa ng'o faman nde kwlaa nga bé klee mmla fluwa'n nun'n su titi'n, i wun dyo'e lé.»

¹¹ É si wéiin ke, mmla'n ti Nyanmien su bu'a swran fi swran kpa, afin é kenngen ke: «Swran ng'o lafi Nyanmien su b'o man o katyi swran kpa'n, oh nyanh nguan.»

¹² Mmla'n fi'an Nyanmien su bo swran lafi'n mlonmlon, sannge é kenngen ke: «Swran ng'o fa mmla'n nun nde'm bé su'n, oh nyanh nguan.»

¹³ Ke Christ katyii swran bo Nyanmien bôé sannzan é ti'n, o fe i wun kpoo é ti sannzan nga Nyanmien bôô é mmla'n bo ya fa'a su'n ti, afin bé klee ke: «Swran kwlaa nga bé bô i komin'n, wuun Nyanmien bôlii sannzan.»

¹⁴ O yô so nan yé nga Nyanmien séé Abraham ke oh yôéh'n, Jésus-Christ ti oh yôh man bé nga bé ti'a Juif'n, nan é kusu, éh nyanh Nyanmien Wawe'n bo i waan oh fah man yé'n, i su bo é lafi'n ti.

Mmla'n nin sa nga Nyanmien waan oh yôh'n

¹⁵ Aniaan mun, m ma kan sa kun bo swran'm bé yôé titi'n klé amun. Se swran nnyon bé nuan se sa kun su'n, swran ufle kwla katyimen, o kwla uka'a su.

¹⁶ Nyanmien séé Abraham ke, oh yôh liké wié men i «nin i ôsufue kun.» Wa sé'e i ke oh yôh men i nin i ôsufue mun. Nanh swran kpanngban nde ye o kaan, sannge ke o sé ke, o «nin i ôsufue kun'n,» o kan swran kun nde, swran so'n yele Christ.

¹⁷ Anh nian nde nga n waan nh kanh klé amun'n ye: Sa nga Nyanmien séé ke oh yôh man swran'n, ke o dii afue ya-nnan afue ablasan bo mmla'n bali'n, o man bé kwla fa'a mmla'n katyi'a sa nga Nyanmien waan oh yôh'n ke bé fa nunnun su.

¹⁸ Se liké nga Nyanmien séé ke béh nyenh'n, bé nyen mmla'n ti'n, wuun nanh sa ng'o séé ke oh yôh man bé'n ti ye bé nyen io. Sannge sa nga o séé Abraham ke oh yôh men'n ti ye o yôli i yéo.

¹⁹ ?Se o ti so'n, mmla'n yô i lie nzu? Nyanmien siéé i kusu nan bé wun ke sa te'n ti te, ye bé di su lélé fa dyuu Abraham ôsufue nga ti ye Nyanmien séé ke oh yôh liké wié men'n i bale. Ange mun ye bé fa wla swran kun b'o dyran swran'm bé nuan'n i sa nun ye o fa balio.

²⁰ Se swran kun waan oh yôh liké man swran'n, o yi'a swran ke o kô séé nan bé nuan se su, ke Nyanmien kusu ti soo.

Sa ti bo mmla'n wô le'n

²¹ ?Liké nga Nyanmien waan oh yôh'n, mmla'n ti o yô'e kun? O ti'a so mlonmlon! Se Nyanmien kwla fa mmla kun man swran b'o man bé nyan nguan'n, wuun o mannin, ye mmla so'n su fale'n ti oh buh swran swran kpa.

²² Sannge é kenngen Nyanmien Nde nga bé kleli'n nun ke, sa te'n ti menmenfue'n kwlaa bé nzuen. O yô so nan liké nga Nyanmien waan oh yôh man swran'n, bé nga bé fa nde so'n su'n bé nyen Jésus-Christ bo bé lafi i su'n ti.

²³ Ke ble nga swran kwla lafi Christ su'n nian dyuman'n, é ti ke bisuafue bo bé nien i su kpa'n sa, mmla'n ti. É kaa le so lélé ke Nyanmien yi i sulafile so'n nglô klé é.

²⁴ O man mmla'n ti ke swran kun b'o klé é atin nga é fa su'n lélé Christ bali, nan Nyanmien a bu é swran kpa i su bo é lafi'n ti.

²⁵ Ke ble nga é kwla lafi Christ su'n dyuli'n, o man é nu'an swran b'o klé é atin'n i sa nun kun.

²⁶ Afin Christ-Jésus bo an lafi i su'n ti, amun kwlaa an ti Nyanmien wa.

²⁷ Amun kwlaa bo ke an yôô baptême'n amun nin Christ amuan katyi swran wunmuan'n, amun nzuen lie'n wa fe i lie'n.

²⁸ O man o le'a Juif nin Grec, o le'a kanga nin diéwa, o le'a yasua nin bla, afin amun kwlaa an ti kun, swran wunmuan bo amun nin Christ-Jésus amuan katyi'n ti.

²⁹ Se an ti Christ lie'n, wuun an ti Abraham anunman, o man liké nga Nyanmien waan oh fah men i swran mun'n, amunh nyanh wié.