Filipfuɛ Mun 1 - Nyanmien nde Ufle

Paul klee fluwa nga kô maan Philippes lo Christfue mun

¹ M Paul min nin Timothée bo é ti Christ-Jésus i swran'n, é ye éh kleh fluwa nga ble amun kwlaa bo an ti Nyanmien swran bo amun nin Christ-Jésus amuan katyi swran wunmuan'n, nin asonun i sunianfue nin asonunfue'm bé lika nianfue bo an wô Philippes lo muon.

² Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Nyanmien asénna nin i liké srele

³ Ble kwlaa nga n wla kpen amun su'n, n la min Nyanmien'n i asé.

⁴ Ble kwlaa nga nh sreh Nyanmien ke o dyran amun kwlaa amun sin'n, n klun dyo i srele so'n su,

⁵ ukale wafa nga an fa uka min dyasin fe bôle nun ke o fin i bôbôle nun lélé fa dyu nde'n ti.

⁶ N si wéiin kpa ke Nyanmien b'o bô liké nga b'o man an yô kpa'n i bô'n, oh yôh i so lélé oh gueh i bô Christ-Jésus i bale tyen'n nun.

⁷ Ke m bu amun kwlaa amun akunndan ke nga sa'n, o ti kpa, afin amun nde lô n kpa. Ke é sé ye'n bo n wô bisua'n nun'n, nin laa bo n nyan n ti n dyran dyasin fe'n su mon o taka kpa'n, yé nga Nyanmien yôô min'n o yô amun kwlaa amun wié.

⁸ Afin klôle dan nga Christ-Jésus fa klôô amun'n, ye n fa klô amuon, Nyanmien'n ti n lalôfue.

⁹ Ye n sre i ke an klô i nin swran mun kpa ye an si ngwlele, an wun sa'm bé wle kpa wéiin.

¹⁰ I so'n nun amunh wunh liké nga bé ti kpa'n bé wle, ye Christ bale tyen'n nun bé su wu'an sa te kaan sa amun wun, o man bé su kputu'a amun.

¹¹ Ye Jésus-Christ man amunh yôh sa kpakpa Nyanmien manmanle nin i komin su manle'n ti.

Christ ti ye n wô men'n nuon

¹² Aniaan mun, n klô ke an si ke sa b'o too n su'n, wa yô'a dyasin fe'n i satyile liké, sannge o man o tre oo i nyrun.

¹³ Sa so'n ti bé kwlaa nga bé nian famien'n i awlô'n su'n, nin swran wié'm bé si ke Christ ti ye bé wlaa m bisuaa.

¹⁴ Ke é niaan'm bé nun louun kpa bé tii i ke n wô bisua'n nun'n, bé fa bé wla gua é Min'n su kpa tra laa'n, o man bé tra bé awlen bé kan Nyanmien nde'n, sre ku'an bé.

¹⁵ Nanwle, bé nun wié'm bé nyin b'o tyi min'n nin akplôwa sile'n ti ye bé kan Christ nde nion, sannge wié'm bé akunndan bo bé fa kan'n ti kpa.

¹⁶ Bé sofue'm bé lie'n, bé yôé Nyanmien nin swran klôle'n ti, afin bé si ke Nyanmien siéé n ke n dyran dyasin fe'n su.

¹⁷ Sannge bé nga'm bé bu bé bobo bé wun akunndan ye bé kan Christ nde nion, bé klun akunndan'n ti'a kpa, bé waan béh yôéh so nan n wun min nyrun tra su bisua'n nun wa.

¹⁸ Min nde nu'an nun! Kannze bé akunndan'n ti te ô, o ti kpa ô, i wafa so'n kwlaa nun bé kan Christ nde'n o man n klun dyo, ye oh dyoh tititi.

¹⁹ Afin n si ke i kwlaa so'n o man nh nyanh n ti Nyanmien bo an sre i ke o dyran n sin nin Jésus-Christ i Wawe b'o dyin n sin'n ti.

²⁰ Liké nga n wla'n wô su, bo n kunndee kpa'n yele ke, nanh man liké fi kun min nyannzuen, sannge n tra min awlen nde nin tyen kwlaa lélé, se n nyan nguan ô, se n wu ô, liké kwlaa nga n yô'n o ba Christ nyrunnyan.

²¹ Afin n liké lie nga ti ye n wô men'n nun'n yele Christ, ye wié'n ti min nvasue.

²² Sannge se n dyunman'n ti n tran le ékuon, o ti kpa'n n wu'an kun nga n faa.

²³ N ti mianfue i bué nnyon'n nun, sa ng'o yô n fe kpa tra su'n, yele ke nh koh nan min nin Christ é kô tran, i so'n ye o ti kpaa.

²⁴ Sannge amun ti, se n ka le ékun'n, o ti kpa dan.

²⁵ Ke n wun i wle kpa so'n ti, n si ke nh kah le kan ékun, ye min nin amun kwlaa éh tranh, nh wukah amun amunh yôh kpa nan amun klun dyoh Nyanmien su bo an lafi'n ti.

²⁶ I so'n nun, se n dyu amun wun lo ékun'n amun bo amun nin Christ-Jésus amun ti swran wunmuan'n, amunh kwlah fa min di amun nuan kpa.

²⁷ Sa'n kwlaa nun, anh yô sa ng'o nin Christ dyasin fe'n ti kun'n, nan se mh bah amun wun wunle ô, se m baman ô, man ti amun ngan ke amun kwlaa amun bô ti kun kpa amun dyran kéklé, ye amun akunndan'n ti kun, an mian amun nyin dyasin fe'n bo an lafi su'n ti.

²⁸ Nanh an lô amun wun man amun kpofue mun man bé wla amun sre sa fi nun. Se amuan lô'a amun wun a ma'an bé'n, o klé bé ke béh mlinh, ye amun kusu, amunh nyanh amun ti, Nyanmien ye o sié i soo.

²⁹ Afin nanh Christ sulafile ngunmin ye Nyanmien man amun lafio, sannge o man amunh wunh nyrennen i dunman nun ékun.

³⁰ Afe kunngba nga an wun ke o ô n su'n, o ô amun su wié, ye an si ke afe kunngba'n te ô n su.