3 Jean 1 - Nyanmien nde Ufle

Swran ng'o kle fluwa'n kô menniin'n

¹ Gaïus bo a ti n swran kpa, bo n klô o sa kpan, m bo n ti kpenngben'n min ye n kle fluwa nga ble woo.

² N swran kpa, Nyanmien man liké kwlaa nga a yô'n o yô kpa, ye a yô dyuédyué, ke n si ke o wla'n wô Nyanmien su kpa'n sa.

³ Ke é niaan wié'm bé bali, bo bé kan nde nanwle i su fale wafa nga a fa'n, o nin nanwle nga a dii titi'n kléé min'n, n klun dyoo kpa.

⁴ Sa fi dyo'a n klun ke n ti i ke m mma'm bé di nanwle titi'n sa.

Gaïus mô yôle

⁵ N swran kpa, é niaan nga bé tô o lo'n, se bé ti aôfue ô, se bé ti'a aôfue ô, a nian bé lika kpa.

⁶ Bé kan yé nga a yôô bé'n i nde klé asonunfue mun. Nh sreh o ke a gua bé atin klaan i wafa nga a yôo oh dyoh Nyanmien klun'n.

⁷ Christ dyunman'n ti ye bé olio, ke béh koh'n, ba fa'a liké fi bé bo bé lafi'a Christ su'n bé sa nun.

⁸ I so'n ti, man é uke i so swran mun, nan ke béh kanh nde nanwle'n sin'n, é dunman'n te nun wié.

Diotrèphe wun nde

⁹ N kle nde kaan blee asonun'n, sannge Diotrèphe b'o klô ke oh yôh bé sukpen'n, o fa'a é nde'n su.

¹⁰ O man se n dyu lo'n, nh kanh sa ng'o yô'n nin é wun nde tete ng'o kan'n. Ng'o yô i le'n, o dyumen. É niaan nga bé ko lo'n, o siké'a bé. Bé nga bé klô ke béh sikéh bé'n, o kpli'an bé su, o kan bé bô asonun'n nun.

Démétrius i dunman kpa bôle

¹¹ N swran kpa, nanh nian sa te nga bé yô'n su, sannge nian sa kpa nga bé yô'n su. Swran ng'o yô sa kpa'n, o ti Nyanmien lie, swran ng'o yô sa te'n, o si'a Nyanmien.

¹² Swran'n kwlaa bé bô Démétrius dunman kpa, kannze swran a kenmen bobo'n, bé wun ke o ti nanwlefue. É kusu é bô i dunman kpa, ye a si ke i nde nga é kan'n ti nanwle.

I nde'n i atabô

¹³ Nde kpanngban ô n klun, n klô ke nh kanh klé o, sannge n klô'a ke n kle.

¹⁴ M bu ke o tye kaan nh wunh o, nan min nin o éh kôkôh yale.

¹⁵ N yra n nuan ke o wun dyo o fouun! O dyanvue'm béh yôh o liké. Nh yôh é dyanvue'n kwlakwla bé liké.