2 Timote 2 - Nyanmien nde Ufle

Christ i sôndya kpa

¹ I so'n ti, o lie'n, n wa, yé nga ké nin Christ-Jésus é katyii swran wunmuan'n o yôô yé'n ti, dyran kéklé.

² Nde nga a ti i ke n keen swran kpanngban bé nyrun'n, kan nde so'n, fa yatyii bé nga a lafi bé su bo bé kusu bé kwla kan klé swran ufle'n bé sa nun.

³ Nyrennen nga é wuin'n, Christ-Jésus i sôndya kpa bo a ti'n ti mon o son o nun.

⁴ Sôndya ng'o ti sôndya kpa bo i waan oh yôh sa ng'o ti i sukpen'n i klun su'n, o fe'e i wun wla'a liké nga swran nga'm bé yô'n nun.

⁵ Swran ng'o wanndi'n, se wa wanndi'a ke bé klélii'n sa'n, o nya'an nun liké.

⁶ Fié difue ng'o di dyunman fe'n ye o dun mmua nyan likéo.

⁷ Nde nga n fa'n, bu i kunndan, afin é Min'n man ah wunh sa'n kwlaa wle.

⁸ Bu Jésus-Christ David anunman'n b'o tyennin'n i akunndan. Ke nh kanh dyasin fe'n ye n ken i nde so nion.

⁹ Dyasin fe so'n ti ye n wun nyrennen bo bé tyi n ke sa te yôfue sa nion. Sannge Nyanmien ndefue'n, bé kwla tanninmen.

¹⁰ I so'n ti ye sa so'n kwlaa nun bé nga Nyanmien kpaa bé'n bé ti, n tra min awlen nion, nan Christ-Jésus ti bé kusu bé nyan bé ti ye bé nyan nyrun b'o wiéman.

¹¹ Nde nga m ma ken ye'n ti nanwle wéiin, Se é nin i ye é wuli'n, é nin i ye éh tyeonh,

¹² Se é dyran kéklé'n, é nin i ye éh dih famien nion, Se é sé ke é simen'n, i kusu wa sé ke o si'a é,

¹³ Se é di'a nanwle'n, i lie'n o di nanwle, Afin nde ng'o kan'n, o katyimen.

Dyunman difue bo Nyanmien yô i mô'n

¹⁴ Kan nde nga klé bé kwlaa, kan flan nun. Nyanmien Kpli ti o lalôfue, sre bé kpa ke bé yatyi nde'm bé su utré dile'n b'o yô'a liké fi yé'n, o sanngan bé nga bé ti'n bé akunndan.

¹⁵ Mion o nyin di dyunman kpa man Nyanmien yô o mô, yô dyunman difue bo nyannzuen kunmen i dyunman'n ti, b'o kan nde nanwle o kpe'e i wun.

¹⁶ Nanh fo o wun wla nde ngbenngben b'o nin Nyanmien nde'n ti'a kun'n bé nun, afin bé nga bé yô so'n, bé fa'a bé wun manta'an Nyanmien lélé bé nin i bu.

¹⁷ Bé nuan nun nde'n oh yôh ke kannin sa, oh treh. Bé nun wié yele Myménée nin Philète

¹⁸ bo ba yatyi nde nanwle'n, bé sé swran'm bé ke, bé nga bé wuli'n ba tyen o man bé wié'm bé lafi'a Nyanmien su kpa kun.

¹⁹ Sannge Nyanmien i sua'n i bô asé b'o wlali'n o dyran kéklé, bé klee su ke: «É Min'n si bé ti i lie'n,» ye: Swran kwlaa nga i waan o ti é Min'n i lie'n, mon o yatyi sa te yôle'n.

²⁰ Awlô dan kun nun nanh sika okwle nin dyete ufué se ngunmin ye bé ô nuan, sannge bé fa waka se liké'n wié ye bé fa ufa wu liké'n wié. Bé sié wié fa di bé tyen, bé fa wié yô liké kwlaa nga bé klô'n.

²¹ O man swran ng'o yi i wun sa te so'm bé yôle nun'n, oh yôh ke talié klaan bo bé fa di bé tyen'n sa, oh katyih i Min'n lie, oh yôh i wun sa yé, oh kwlah fa yô liké kwlaa ng'o ti kpa'n.

²² Nanh bu liké nga gbanflen kônvi soe'n i akunndan, sannge a nin bé kwlaa nga sa te nu'an bé awlen'n nun bo bé bô fle é Min'n, anh mian amun nyin anh yô sa ng'o ti kpa'n, anh lafi Nyanmien su, anh klô Nyanmien nin swran, ye man amun wla gua asé.

²³ Sannge nanh fo o wun wla sinnzin akplôwa sile b'o yô'a sa fi yé'n nun, afin a si ke akplôwa'n i bô agualie yele utré.

²⁴ Afin é Min'n i swran'n nin utré'n fataman. Sannge mon o yô swran'n kwlaa bé kpa, mon o si liké klé, man sa nga bé yôé'n son i nun,

²⁵ mon o tu bé nga bé kpalô i nuan'n bé fo amannien su, wiénuon tyen wié lélé Nyanmien man beh katyih bé nzuen'n nan bé si sa ng'o ti nanwle'n.

²⁶ O man bé nyin tih, béh flôh aya nga mmusu'm bé si Satan suali b'o traa bé b'o man bé yô i klun sa'n nun.