2 Piɛr 3 - Nyanmien nde Ufle

É Min'n i bale

¹ N swran kpa mun, n fluwa bo n kle ble amun'n i nnyon su'n ye. Fluwa so'n i nnyon'n nun, n kpeen amun wla ke man amun akunndan tran sa nga an si bé laa'n bé su, nan an bu akunndan kpa.

² Anh bu nde nga Nyanmien nuan idyofue'm bé kan kléé amun laa'n, o nin sa nga é Min b'o ti é Défue'n séé ke é yô'n, bo bé nga o sunmaan bé amun sin'n, bé kan kléé amun'n, i akunndan.

³ Man an si kpa ke, tyen wié lélé ke men'n oh koh i bué nuan'n, swran wié'm béh bah, béh yôh sa nga bé klun klô'n, béh dih amun to,

⁴ béh séh ke: «?O séé amun ke, oh bah, nenh io? ?Ye o ô nin? Ke o fin lalaa'n bo é nannan'm bé wuli'n, liké kwlaa nga Nyanmien yii bé'n, bé te ô bé ôsu'n nun.»

⁵ Sa kun ô le, bé klô'a ke bé bu i akunndan. Sa so'n yele ke, lalafue nun ke Nyanmien séé ke: asie'n nin nyanmien su lo'n, kpekuun bé ô le. Asie'n fin nzué'n nun ye o fitélio, o ô nzué i afien.

⁶ Ye nzué kunngba'n kusu, ke o yi kataa asie'n su'n, o nunnuun laa men lie'n.

⁷ Nyanmien kunngba'n ye o séé ékun ke, man bé sié nyanmien su lo'n nin asie nga bé ô le nde'n bé le, nan sin di bé. Béh siéh bé le lélé fa dyu tyen nga béh buh swran nga bé srô'a Nyanmien'n bé fo, bo béh satyih bé'n.

⁸ N swran kpa mun, sa kun ô le bo nanh amun wla fi, yele ke, é Min'n lie'n, tyen ba kun'n ti i nyrun afue akpi, ye afue akpi'n ti i nyrun tyen ba kun.

⁹ Liké nga é Min'n sé ke oh yôh'n, o tyuentyue'en i asé ke swran'm bé bu'n sa. Sannge o tre i awlen amun wun, o klô'a ke swran kun sa mlin, o klô ke swran'n kwlaa bé katyi bé nzuen'n.

¹⁰ É Min'n i bale'n oh fuh é nun ke awiéfue sa. Tyen so'n nun nyanmien su lo'n kplah wuuu, kpekuun bé wu'en kun. Ye nyanmien su lo ninngé'm béh yrah, ye asie'n nin i su ninngé'n kwlaa béh nunnunh.

¹¹ ?Se ninngé so'n kwlaa béh satyih so'n, liké ônin ye se an yôo o ti suo? Man amun nzuen'n yô kpa, anh fa amun wun mantan Nyanmien!

¹² Ke amunh minndeh ke Nyanmien i tyen'n dyu'n, anh yô liké kwlaa nga an kwla yô'n, mon o dyu ndende. Tyen so'n nun nyanmien su lo'n oh yrah, ye nyanmien su lo ninngé'm béh klôh.

¹³ Nyanmien séé ke oh manh é nyanmien su lo nin asie ufle, lo ye bé nga bé yô sa kpa'n béh traanh. I ye é su minnde io.

¹⁴ N swran kpa mun, i so'n ti, ke éh minndeh tyen so'n, anh yô liké kwlaa nga an kwla yô'n nan o wun ke an ti swran kpa bo sa kaan sa nu'an amun wun, nan amun nin i amun nuan a se.

¹⁵ Anh nian é Min'n i awlen b'o tre amun wun'n, amun ti nyanle tio. Ke é niaan Paul b'o ti é swran kpa'n, bo Nyanmien meen i ngwlele'n, kle i so blee amuon.

¹⁶ I fluwa kwlaa ng'o kle b'o kan liké so'n i nde'n, ke o kle i soo. I nun nde wié'm bé wle wunle ti kéklé, o man bé nga bé wu'an sa wle, bo bé le'a awlen'n, bé katyi nde so'n ke bé katyi Nyanmien Nde nga bé kleli'n wié sa. Ke bé yô so'n, o man béh mlinh.

¹⁷ Sannge amun bo an ti n swran kpa, bo an si so laa'n, anh nian amun wun, nan amuan su'a swran tete bo bé yô sa b'o ti'e i su'n bé su, nan amun ta a kpoman.

¹⁸ Ye bo é Min'n b'o ti é Défue'n yô amun'n ti, man bé wun ke amuan yô swran, amun nin i tran, nan amuan sii kpa. Ke o fin nde'n, man bé yi i aye tititi. Mon o yô so!