2 Korɛntfuɛ Mun 9 - Nyanmien nde Ufle

Christfue'm bé lika nianle

¹ M bô'a ye n kle'a Nyanmien i swran'm bo bé ô Judée lo'n bé lika nianle'n nde'n i wun fluwa ma'an amun.

² N si amun aklunyé dan'n b'o man n fa amun di n nuan klé Macédoinefue mun'n, n séé bé ke, afue sin ye Achaïefue'm bé buu i akunndan ke béh yôh sa so nion. Amun akunndan so'n man bé kpanngban lika bé waan béh yôh wié.

³ Ke o kô yô nan é nuan bo é fa sa nga an yô'n di'n, wa yô'a ngben'n ti ye n sunmaan é niaan so mun amun wun loo. Ke béh dyuh lo'n, man bé wun ke liké nga n ken i nde kléli bé'n amuan wié i yô.

⁴ Se amuan yô'e i so'n, se Macédoinefue'm bé wié'm bé ba n sunmanle'n nan liké nga é lafi amun su kpa ke amunh yôh'n, amuan wié'e i yô'n, wuun amuan gua é nyin asé, ye amun lie sion.

⁵ I so'n ti, m buu akunndan ke se n sre é niaan mun nan bé dun mmua n nyrun bé kô tiantian ninngé so'n bo amun waan amunh fah di nennen'n i nuan'n nan man dyu lo'n, o ti kpa. I so'n nun, o su yô'a ke amun sa ti tankaan, sannge an yôé nennen su sakpa.

⁶ An si ke swran ng'o di fié kaan'n, i su liké ng'o nyen'n ti kaan, ye swran ng'o di fié dan'n o nyan liké kpanngban.

⁷ Man swran kun i liké ng'o bu i akunndan ke se o maan o ti kpa'n, o fa man, nanh mon o yô klunngbo su nin mianle su, afin swran ng'o man Nyanmien liké i klun-ufué su'n, i klun dyo i wun.

⁸ Nyanmien kwla man amun liké kpakpa'n kwlaa lélé bé ti sinh yia amun. O man tyen kwlaa amunh nyanh liké kwlaa ng'o mian amun sa'n, ye amunh nyanh wié kpanngban amunh fah yô aklunyé,

⁹ afin Nyanmien Nde nga bé kleli'n bé klee ke: «O fee i sa nun ninngé tyetye yalefue mun, O su yatyi'e i aklunyé'n mlonmlon.»

¹⁰ Nyanmien bo «O man awié guafue'n i awié b'o gua'n, B'o man swran nuan nun alie'n,» i kunngba'n oh manh amun liké nga amunh fah yô aklunyé'n, o man oh yôh kpanngban, ye i agualie'n oh guah amun kpa.

¹¹ Nyanmien manh amun liké'n kwlaa bo amunh fah yô aklunyé titi, ye amun nennen nga amun di bo éh fah kô man bé'n, o man béh lah Nyanmien asé.

¹² Afin Nyanmien i swran'm bé lika nianle so'n, nanh ke bé wun nyanman nun tile ngunmin tio, sannge o man Nyanmien asénna'n oh yôh dan.

¹³ Ke an nian bé like so'n, o klé ke an fa Christ dyasin fe'n bo an sé ke an lafi su'n i su kpa. Ke swran kpanngban bé wun i so'n o nin yé dan nga an yô bé nin swran wié mun'n, o man béh bôh Nyanmien dunman.

¹⁴ Ye aklunyé dan nga Nyanmien man an yô'n ti béh buh amun akunndan kpa, ye béh yrah bé nuan ke Nyanmien dyran amun sin.

¹⁵ Nyanmien b'o man é liké dan b'o le'a wunsu'n, i kwla ô!