2 Korɛntfuɛ Mun 7 - Nyanmien nde Ufle

¹ N swran kpa mun, sa kwlaa nga Nyanmien séé ke oh yôh bé so'n ti, man é wla sa kwlaa ng'o satyi swran'n nin akunndan tete'n kwlaa bé asé. Se é waan é srô Nyanmien'n, man é nian é wun kpa ke nanh man sa kaan sa tran é nin i é afien.

Paul klun b'o dyoli'n

² Man é nde lô amun kpa! Ya yô'a swran fi te, ya satyi'a swran fi, ya di'a swran fi ndrunmun.

³ Nanh amun dunman satyile ti ye n ken soo, afin n dun mmua séé ke klôle bo n klô amun'n ti, se amunh wuh ô, se amunh nyanh nguan ô, é nin amuon.

⁴ N wla ô amun su kpa, n fa amun di n nuan kpa. Sa kwlaa ng'o to é su'n, Nyanmien tyityi n wla, n klun dyo dan.

⁵ Afin ke é dyuu Macédoine lo'n, ya nya'an aladyé bo kaan sa, sa kéklééklé'n kwlaa sin yia é. Ndengan'n dyin é wun, sre kun é.

⁶ Sannge Nyanmien b'o tyityi bé bo bé wla bô'n bé wla'n, o man ke Tite bali'n, o wa gua é awlen su nzué.

⁷ Nenh i bale'n ngunmin ye o gua é awlen su nzuéo, sannge ke o kan fonvole wafa nga an fa fonvolii'n i nde'n, o man é wla gua asé dan. I Waan an dé min aulie kpa, an wô ngôkôe nun, an dyin n sin, o man n klun dyo dan kpa sien'n.

⁸ Se fluwa nga n klee amun'n i nun nde'n bôô amun wla'n, o yô'a n ya. Ke n wuun ke o bô amun wla kaan'n, o yô n ya,

⁹ sannge sien'n, n klun dyo, nanh amun ya b'o yô amun'n tio, sannge ya b'o yôô amun b'o man an katyii amun nzuen'n, i ti ye n klun dyoo. Amun ngôkôe so'n nun an yô sa ng'o yô Nyanmien fe'n, o man sa nga é yôli amun'n, wa yô'a te.

¹⁰ Afin kôkôle nga Nyanmien man swran kôkô'n i agualie yele nzuen katyile b'o man swran nyen i ti'n, i so lie'n yô'a ya. Sannge klo swran kôkôle lie'n i agualie yele wié.

¹¹ Anh nian amun ngôkôe'n b'o yô Nyanmien fe'n ke i agualie ti kpaa. O man an nian amun wun su kpa, an kpli amun ti, an fa ya sa te'n ti, an srô Nyanmien, an dé min aulie kpa, an dyran n sin, an tu swran ng'o yô sa'n i fo kpa! Sa so'n kwlaa nun é wun ke amun wun sa so'n wa wié.

¹² Nanh swran ng'o yôô sa so'n o nin swran nga bé yôlii sa so'n, bé ti ye n klee fluwa so nion. Sannge ke o kô yô nan amuan wun ke é nde lô amun kpa Nyanmien nyrun'n, i ti ye n klelio.

¹³ I so'n ti, é wla gua asé. Nanh ke é wla'n ngunmin ye o gua aséo, sannge ke é wun ke Tite klun dyo dan, bo amun ti i awlen'n to nzué nun'n, o man é klun dyo dan kpa ékun.

¹⁴ N fa amun di n nuan kléé Tite, ye an kusu amuan gua'a min nyin asé. Ke nde kwlaa nga n kan kléé amun'n ti nanwle'n, i kunngba'n n nuan bo n fa amun di klélii'n i kusu ti nanwle.

¹⁵ Ke o bu i swran bo an bulii'n, o nin amun wun b'o bli amun bo an so i nun'n, o nin amun nyin b'o yii'n i akunndan'n, o man o klô amun sa dan kpa.

¹⁶ Ke bo sa'n kwlaa nun n kwla fa n wla gua amun su'n, o man n klun ti dyowa.