2 Korɛntfuɛ Mun 6 - Nyanmien nde Ufle

¹ I so'n ti, é bo é nin Nyanmien é di dyunman kun'n, éh sreh amun, nanh man yé nga Nyanmien yôô amun'n o yô ngben,

² afin i waan «Ble ng'o ti kpa'n n tili nde nga a kannin'n, Ye tyen bo n déé swran'm bé ti'n, n dyrannin o sin.» Anh nian, ble nga é ô nun ye'n, i ye o ti ble kpa nion, o ti bé ti nyanle tyen.

³ É klô'a ke swran fi kan é dyunman'n i wun nde, i so'n ti, é yô'a sa fi b'o satyi swran ti nuon.

⁴ Sannge sa kwlaa nun é fa é wun klé ke é ti Nyanmien dyunman difue. Se afe ô é su ô, se é sa mian ô, se é wun nyrennen ô, sa so'n kwlaa nun, é tra é awlen.

⁵ Bé bô é, bé wla é bisua, bé dyaô é wun, é di dyunman kéklééklé, é lafiman, é di'a liké.

⁶ Sa ng'o klé ke é ti Nyanmien dyunman difue'n bé ye, é yô'a sa sukusuku, é wun sa wle, é blu sa'm bé su, é klun ti ufué, Nyanmien Wawe'n sié é, é klô'a Nyanmien nin swran é nuan bui su,

⁷ é kan nde b'o ti nanwle, sa nga é yô'n é yôé Nyanmien fanngan nun. Nanwle dile'n ye o ti é ale liké bo é fa kun ale ye é fa kpli é tio.

⁸ Tyen'n wié bé bu é swran, tyen'n wié bé gua é nyin asé, tyen'n wié bé bô é dunman te, tyen'n wié bé bô é dunman kpa. Bé bu é gblefue, sannge é di nanwle,

⁹ bé bu é ke swran bo bé si'e sa, sannge bé si é kpa, bé bu é ke é su wu, sannge nian, é ye é te ô ye'n, bé klé é nyrennen, sannge bé ku'an é.

¹⁰ Bé bô é wla, sannge é klun dyo titi, bé bu é yalefue, sannge é yô man swran kpanngban bé nyan bé wun, bé bu é ke é le'a liké fi, sannge ninngé'n kwlaa ti sin yia é.

¹¹ Corinthefue mun, ya fia'a nde fi su amun wun, amun nde lô é kpa.

¹² O man se é nin amun di'a kpa'n, o fi'an é, o fin amun.

¹³ I so'n ti, nh kanh nde klé amun ke n klun ba sa, anh bu é akunndan ke é fa bu amun'n sa, man é nde lô amun kpa!

Nanh amun nin bé nga bé lafi'a Christ su'n san nun

¹⁴ Nanh amun nin bé nga bé lafi'a Christ su, bo amun nzuen'n seman'n, an san nun. ?Nzu anuanse ye swran kpa nin swran te'n bé dio? ?Wia'n nin aôsin'n bé kwla tran lika wle?

¹⁵ ?Christ nin mmusu'm bé si Satan'n bé nuan se? ?Swran ng'o lafi Christ su'n nin swran ng'o lafi'e i su'n bé akunndan'n ti kun?

¹⁶ ?Bé kwla fa sua kun yô Nyanmien nin amuen'm bé sua? Afin é ti Anannganman Nyanmien'n i sua, afin Nyanmien bobo waan: «Min nin bé éh tranh, éh sanh nun, Nh yôh bé Nyanmien, ye bé kusu béh yôh n swran.»

¹⁷ I so'n ti, «É Min Nyanmien séé ke: Anh dyaô bé nun, Nanh an fa amun wun mantan bé, Nanh an kan fien. Ye nh soh amun nun,

¹⁸ Nh yôh amun si, Ye amun kusu amunh yôh n wa yasua nin n wa bla. Ke é Min Nyanmien Kpli'n sé soo.»