2 Korɛntfuɛ Mun 3 - Nyanmien nde Ufle

Sa ufle nga Nyanmien waan oh yôh'n i dyunman difue

¹ ?Nde nga é ken le'n o klé ke é bobo é dunman ye é kunndee ékuon? ?É kunnde fluwa b'o kan é wun nde klé amun ke swran wié'm bé yô'n sa? ?Ye kusu, é kunnde i so fluwa amun sa nun?

² Amun bobo ye an ti é fluwa nion, bé klelii é awlen'n nun, swran'n kwlaa bé sii, bé kanngan.

³ Bé wun ke an ti fluwa bo Christ kle fa sunmaan é. Wa fa'a crayon a klemen yebue paplapa wié su, sannge o fa Anannganman Nyanmien Wawe'n ye o fa klee swran'm bé awlen'n nuon.

⁴ É wla bo Christ ti é fa gue Nyanmien su'n, i ti ye é ken i soo.

⁵ Nanh ke é kwla sa wié yô b'o man é bu é wun ke é bobo é kwla yô liké wiéo. Sannge sa nga é yô bé'n, Nyanmien ye man é yôo.

⁶ I kunngba'n ye man é kwla di sa ufle nga i waan oh yôh man swran'n i dyunman nion. O ti'a mmla bo bé klelio, sannge o ti Nyanmien Wawe'n lie. Afin mmla nga bé kleli'n o man swran wu, sannge Nyanmien Wawe'n lie'n o man swran nyan nguan.

⁷ Mmla nga bé kleklee yebue'n su'n o man swran wu, sannge i nun nga Nyanmien fah man'n, bé wuun i bobo nyannyannyan. O ti liké b'o wié, sannge o man Moïse nyrun'n yô nyannyannyan lélélé o man Israëlfue'm bé kwla nie'en i nyrun tye'a su. Se i bale'n nun o yô so'n,

⁸ Nyanmien Wawe'n lie'n tre fatifati!

⁹ Se liké nga bé yôo o man bé bu swran fo'n, o le nyrun dan so'n, liké nga kusu bo bé yôo o man Nyanmien bu swran swran kpa'n, o le nyrun tre fatifati.

¹⁰ Afin liké nga laa o le nyrun dan so'n, sien'n o le'a nyrun kun, nga b'o le nyrun tre kpa'n ti.

¹¹ Se liké ng'o tyeman'n o nyaan nyrun dan so'n, nga b'oh kah le mlonmlon'n o le nyrun tre fatifati.

¹² É wla'n bo é fa gue i su ke nga sa'n ti ye man é kan nde so'n wéinwéin nion.

¹³ É lie'n, é yô'a ke Moïse lie'n sa. O fa tannin kete i nyrun ke nanh man Israëlfue'm bé nien i nyrun'n i nyannyannyan b'o tyeman'n b'o su wié'n lélé.

¹⁴ Sannge Nyanmien man ba kwla wu'an sa fi wle. O man lélé nde, ke bé kunngan sa laa nga Nyanmien waan oh yôh man swran'n i fluwa'n nun'n, tannin kunngba so'n b'o man bé wu'an sa wle'n o te ô le. Afin san bé nga bé nin Christ ba katyi swran wunmuan'n bé lie'n ye wa yio.

¹⁵ Lélé nde, ke bé kanngan Moïse fluwa'n nun'n, tannin so'n man bé wu'an sa wle.

¹⁶ Sannge bé kléé Nyanmien Nde'n nun ke: «Se swran kun i nyin katyi é Min'n i wun'n, o yi tannin so'n.»

¹⁷ É Min nga bé ken i nde wa'n yele Nyanmien Wawe'n, ye lika kwlaa nga é Min'n i Wawe'n wô le'n, bé di aladyé.

¹⁸ É kwlaa nga Nyanmien a yi é nyrun tannin ng'o kata é nyrun'n, é wun wafa kwlaa nga é Min'n i dan'n ti'n ke niannun nun sa. É katyi ke i wafa nga é fa wuin'n sa tititi lélélé éh feh kpa. É Min'n i Wawe'n ye man é yô soo.