2 Korɛntfuɛ Mun 2 - Nyanmien nde Ufle

¹ I so'n ti, m buu i akunndan ke n su ko'a amun wun lo n kô bô'a amun wla kun.

² ?Afin se m bô amun bo amun man n klun dyo'n amun wla'n, wan ye o man n klun dyoh ékuon?

³ Sa nga ti ye n klee amun fluwa so'n ye: n klô'a ke se n dyu amun wun lo'n, bé nga bé ye man n klun kô dyo'n bé bô n wla. Afin n lafi amun kwlaa amun su kpa, o man n si ke sa ng'o dyo n klun'n o dyo amun kwlaa amun klun wié.

Swran i wun sa yatyi tyele

⁵ Se swran wié yôô sa wié b'o bô wla'n, o yô'a n ya, amun ye o yôô amun yaa, sannge ke o yô nan wa yô'a ke n su wla dyole'n, wiénuon nanh amun ngba ye o yôô amun yaa.

⁶ Fo nga amun nun kpanngban lika an fa tuu swran so'n o dyui.

⁷ O man anh yatyi i wun sa tyee, anh yô man i wla gua asé, se wa yô'a so'n, o tyeman nan awlabôe'n wa kuin.

⁸ I so'n ti, nh sreh amun ke an yô liké ng'o klé ke an klôé'n.

⁹ Ke nh kleh amun fluwa so'n, n waan nh sah amun nian, nan nh wunh i wle, se nde nga n kan kléé amun'n, an fa su ô.

¹⁰ Swran nga an yatyi i wun sa'n tye'n, n kusu nh yatyih tye i wié, afin se n katyii swran wié wun sa tyelii'n, amun ti ye n yatyi tyeli io, o yôô Christ nyrun.

¹¹ Se wa yô'a so'n, o tyeman nan Satan wa nyan é, afin é si i nzuen'n.

Paul akunndan sanngannin Troas lo

¹² Ke n dyuu Troas lo Christ i dyasin fe bôle'n ti'n, é Min Nyanmien'n maan min atin ke n di dyunman'n kpa,

¹³ sannge o nin i so'n ngba, ke man tô'a n niaan Tite le'n, n wla a gua'a asé, nan man sre bé atin man o Macédoine.

Christ man é kwla

¹⁴ Nyanmien Kpli kwla ô! Afin ke é nin Christ ya katyi swran wunmuan'n ti, o fa é yi i kwlale'n nglô tititi. Ye o fa é ke é yô man bé si Christ lika'n kwlaa ke liké b'o bon fannin kpa'n sa.

¹⁵ Afin é ti ke blofue nzué bo Christ fa man Nyanmien sa, é ti so bé nga bé su fité nun'n nin bé nga bé su mlin'n bé nyrun.

¹⁶ Bé nga bé su mlin'n bé lie'n o ti ke duwle kpukpuwa sa, o kun swran, ye bé nga bé su fité nun'n bé lie'n o ti liké kpa, o man bé nyan nguan. ?Wan ye o kwla di i so dyunman nion?

¹⁷ É ti'a ke swran wié'm bo bé yô Nyanmien nde'n ke bé nga bé yô ninngé sukusuku'n bé ate'n bé lie'n sa. Sannge ke Nyanmien sunmaan é, bo i nyin ta é, bo é nin Christ é ti swran wunmuan'n, o man é ken i nde'n nanwle su.