2 Korɛntfuɛ Mun 12 - Nyanmien nde Ufle

Liké nga é Min'n yi nglô kléé Paul'n

¹ Kannze bé nuan dile'n ti'a kpa'n, sannge n te yô, ye nh kanh liké nga é Min'n man n wuun bé aôlia nun'n nin sa nga o yi bé nglô kléé min'n bé nde.

² N si Christfue kun bo Nyanmien meen i su lélé fa dyu nyanmien su mmua kpa lo, i afue blu-nin-nnan ye, se o meen i su sakpa ô, se kusu o man o wuun liké aôlia nun ô, n wu'en i wle, Nyanmien ye o wun i wleo.

^3-4 N si ke Nyanmien man swran so'n su oo i lika klaan'n nun lo, se o meen i su sakpa ô, se kusu o man o wuun liké aôlia nun ô, n wu'en i wle, Nyanmien bobo ye o wun i wleo. Ke o ô lo'n, o tii nde wié bo bé kwla kanman, ye o ti'a nde b'o fité swran nuaan o yô yéo.

⁵ Nh fah swran so'n di n nuan, sannge se o ti'a n fuen'n ti'n, n le'a liké ufle bo n fa di n nuaan.

⁶ Se n waan nh dih n nuan'n, nanh luflé ye n tio, afin nanwle ye n dio, sannge ke o kô yô nan swran fi a bu'a n swran a tra'a wafa nga bé fa wun min'n, nin nde wafa nga bé fin n nuan fité bo bé tili'n ti, mh muanh n nuan.

⁷ Ke o kô yô nan man tu'a min wun abônuan sa bo Nyanmien yi bé nglô kléé min'n ti, o man tukpatye wié too n su o ka n kplô'n nun. O ti ke Satan (*f6*) i ange sa, o ba m bôle nan man tu'a min wun.

⁸ Man sre é Min'n kpe nsan ke o yi tukpatye so'n n kplô'n nun.

⁹ Sannge o sé n ke, yé ng'o yô min'n oh dyuh min, afin ke n le'a wunmien'n, i nun ye o yi i wun nglô ke o ti kplio. O man n klun dyo n fuen bo n ti'n su nan Christ yi i dan'n nglô n ti.

¹⁰ I so'n ti, se n le'a wunmien ô, bé kpe min nzôwa ô, n sa mian ô, bé klé n yale ô, n wun nyrennen ô, Christ ti n klun dyo, afin ke m bu i ke n le'a wunmien'n, i lie bo ye n nyan wunmien nion.

Paul kôkôô Corinthefue'm bé ti

¹¹ Se n idyo ke lufléfue sa'n, amun ye man n yôô soo, afin an kpi n dunman asé. Se n ti'a swran amun nyrun bobo'n, amun swran kpakpa bo an bu bé ke Jésus ye o sunmaan bé'n, bé ti'a kpa tra'a min.

¹² N kusu sa ng'o klé ke i ye o sunmaan min'n yele sa kwlaa b'o to n su bo n tra min awlen n yi atre, n yô abônuan sa, n yô sa kéklééklé amun nyrun'n.

¹³ ?Nzu liké ye n yô maan asonun nga mun bo man yô'a wié a ma'an amuon? San liké bo man démen amun sa nun'n, i tye! Se i ye o ti sa bo n yôli amun'n, anh yatyi.

¹⁴ Amun wun lo kole'n i kpe nsan su bo n su wa ko'n ye, se n dyu lo'n, n su mia'an amun, afin nanh amun ninngé'm bé ti ye n koo, sannge amun bobo amun ti ye n koo. Afin nanh ba kanngan mun ye bé kunnde liké man bé si nin bé nin muon, sannge bé si nin bé nin mun ye bé kunnde liké man béo.

¹⁵ N lie'n, se n satyi n sa nun ninngé'n kwlaa ye n fa m bobo nannan su amun ti'n, o yô n fe. ?Ke n klô amun dan ke nga sa bo an klô'a n kpa'n, o ti kpa?

¹⁶ Man mia'an amun, sannge an sé ke, ke n ti glefue'n ti, n dé amun ninngé mun gble nun!

¹⁷ ?Bé nga n sunmaan bé amun wun lo'n, m man bé nun kun dé amun liké blee min?

¹⁸ N sree Tite ke o o amun wun lo ye n séé é niaan'n ke o kô sunmen. ?O déli liké amun sa nun? ?Min nin i é akunndan'n ti'a kun? ?Nanh min adyale kunngba'n su ye o falio?

¹⁹ Amun akunndan nga an bui titi'n yele ke an bu i ke nde fe ye é kunndeo. Nenh i soo, sannge Nyanmien nyrun, sa ng'o dyo Christ klun'n ye é kaan. N swran kpa mun, amun swran yôle ti ye é kan nde so'n kwlaaa.

²⁰ Sre kun min ke, ke n kô dyu amun wun lo'n, n su wu'an amun ke nga m bu i akunndan ke nh wunh amun su'n sa, ye n kusu an su wu'an min ke nga an bu i akunndan ke amunh wunh min su'n sa. Sre kun min ékun ke, ke n dyu lo'n, nh wunh ke amun wié'm bé di utré, wié nyin tyi i wiéngu, wié fa ya, wié si akplôwa, wié kan swran wun nde, wié bla, wié tu i wun, wié kpe sae.

²¹ Sre kun min ke, ke n dyu amun wun lo ékun'n, nh wunh swran kpanngban bo bé yôô sa tete laa bo lélé nde bé nian katyi'a bé nzuen'n bé te yô ninngé tete, bé te kunnde bla nin bian, bé bô wlaka. Bé ti nh sunh nan min Nyanmien man min nyin a gua'a asé amun nyrun.