2 Korɛntfuɛ Mun 11 - Nyanmien nde Ufle

Paul nin bé nga bé ton bé wun suen ke Christ sunmaan bé'n

¹ Se n yô sinnzin kan'n, nan se an blu su'n, o yô n fe. Anh yatyi, anh blu su.

² Amun ti n dyran Nyanmien nuan n si kwla, yele ke an ti ke talua kun b'o nian si'a bian sa bo n tra amun asé maan yasua kun, swran so'n yele Christ.

³ Sre kun min ke bé wa satyi amun ti nun, o man an su fa'a amun wla'n kwlaa gue'e Christ su kun, ke wuô i gble'n ti o laka Ève b'o nyenniin'n sa.

⁴ Afin swran wié'm bé ba amun wun lo bé kan Jésus ufle b'o nin nga é ken i nde'n ti'a kun'n i nde, o man an su fa akunndan ufle nin dyasin fe ufle b'o nin nga an faa su laa'n ti'a kun'n su. N wun ke an sié amun su bé nde'n su kpa.

⁵ Amun swran kpakpa bo an bu bé ke Nyanmien ye o sunmaan bé'n, min nyrun bé ti'a kpa tra'a min mlonmlon.

⁶ Kannze n si'a idyo kpa'n, sannge sa wle wunle lie'n, n wun i wle, afin titi sa kwlaa bo n kan'n, an wun bé wle.

⁷ Ke o kô yô nan amuan yô kpa'n ti, man bu'a min wun liké fi, ke m bô dyasin fe'n kléé amun'n, man dé'a amun liké fi. ?Ke n yô so'n, sa te ye n yôlio?

⁸ Kale bo asonun wié'm bé tuaa min bo n fa di dyunman man amun'n, o ti ke sika bo m mian bé n déli sa.

⁹ Ke n wô amun wun lo bo n sa miannin'n, man mia'an swran fi, yele ke é niaan nga bé fin Macédoine bali'n, bé man min liké kwlaa ng'o mian min'n. N sasa min wun kpa ke nanh man m mian swran fi, nh sasah min wun so titi.

¹⁰ Christ nanwle b'o di bo n fa su'n ti, Achaïe men wunmuan'n nun swran fi kwla sé'a n ke, nanh n di n nuan.

¹¹ ?An bu i ke n klô'a amun ti ye n sé soo? Nyanmien si ke n klô amun.

¹² Liké kwlaa nga n yô'n, nh yôéh so titi, nan nh fah gua bé nga bé kunnde ke swran'm bé bu ke bé nin é se'n bé nyin asé.

¹³ Swran so'm bé ton bé wun suen ke Nyanmien ye o sunmaan béo, bé ti gblefue ye bé yô bé wun ke Christ ye o sunmaan béo.

¹⁴ O ti'a abônuan, afin Satan (*f6*) bobo katyi i wun ke ange b'o di nanwle sa.

¹⁵ O man se i dyunman difue'm bé yô bé wun ke bé nga bé dyunman yele nanwle'n i kléle'n bé lie'n sa'n, wuun ba fe'e i asé. Bé agualie'n oh yôh ke bé dyunman'n sa.

Nyrennen nga Paul wunniin'n

¹⁶ Nh kanh nde kunngba'n ékun, nanh man swran fi bu min sinnglinfue. Se kusu an bu n so'n, anh blu n sinnzin'n su, man n kusu n di n nuan kan.

¹⁷ Nde nga nh kenh i ye'n, nanh é Min'n i lie'n suo, sannge ke n kan nde nuan dile su so'n, n ken ke sinnglinfue sa.

¹⁸ Ke swran kpanngban bé fa bé wafa nga bé ti'n bé fa di bé nuan'n, n kusu nh fah n lie'n di n nuan wié.

¹⁹ Amun bo an ti ngwlelefue'n amun nin sinnglinfue mun si tran!

²⁰ An kplin su man bé fa amun katyi bé akua, bé fa amun di, bé di amun luflé, bé tu bé wun gua amun wun, bé kpatyi amun nyrun!

²¹ I kanle yô n nyannzuen, afin é yô é wun ke swran b'o le'a nyrun sa. Sannge se swran kwla fa liké wié di i nuan'n, n kusu n kwla di n nuan wié. Ke n ken i so'n, n ken ke sinnglinfue sa.

²² Se bé ti Hébreu'n, n kusu n ti wié, se bé ti Israëlfue'n, n kusu n ti wié, se bé fin Abraham ôsu'n nun'n, n kusu n fin nun wié.

²³ Se bé ti Christ dyunman difue'n, n kusu n ti i dyunman difue wié dan, n ken ke man dyinmin sa, n di dyunman tra bé, bé wla m bisua tra bé, bé bô min tra su. Tyen kwlaa n wô wié'n nuan,

²⁴ Juif'm bé bôô min ngblé nuan ablasan-nin-ngwlan so fa nnun,

²⁵ bé finfiin min yebue kpe kun, ye Romefue'm bé bôô min nin nyantiaan kpe nsan. Alié'n satyii m bô kpe nsan, n dii nzué'n nun tyen ba kun.

²⁶ Ke nh wlanh titi'n, liké nga ti ye n sé ke n dyin wié'n i nuan'n ye, akpelie tete'm bo n kpe bé su'n, nin kôdiawiéfue'm bo n to bé nun'n, nin sa nga Juif nin Grec nin bé bo bé ton bé wun suen ke bé ti é niaan'n bé yô min'n. Se klo su ô, bô nun ô, dyénvié'n su ô, n dyin wié'n nuan.

²⁷ N di dyunman tete, n fe, n ta'a lafi, awé nin nzué wé'n kun min, n ta'a liké di, ayre'n kun min, m mian trale wun.

²⁸ Sa nga'm bé lie'n, m bô'a su di'a dyole, sannge sa ng'o mian n sa tyinndyin titi'n yele asonun'n kwlaa bé lika nianle'n!

²⁹ Se swran kun le'a wunmien'n, n kusu n wun ke n le'a wunmien. Se swran wié yô sa te'n, o yô n ya kpa.

³⁰ Se bé waan é di é nuan'n n lie'n n fuen nde'n ye nh kaanh.

³¹ É Min Jésus i Si Nyanmien bo bé bô i dunman tititi'n, o si ke m bua'a atô.

³² Ke n wô Damas lo'n, swran nga b'o sié famien Arétas i men'n i bué'n, o siésié swran klo'n i anuan'm bé nun nan bé tra min.

³³ Sannge bé wié'm bé fa min wle gbôgbô nun, bé fa min sin klo i wun nga bé sili'n i fenêtre kun nun, bé dyraa min i sin lo, ye n nyaan n tio.