2 Korɛntfuɛ Mun 1 - Nyanmien nde Ufle

Paul kle fluwa nga kô maan Corinthe lo Christfue mun

¹ M Paul bo Nyanmien klô ke Christ-Jésus sunman min'n, min nin é niaan Timothée, éh kleh fluwa nga ble amun bo an ti Nyanmien i asonunfue Corinthe lo'n, o nin bé kwlaa bo ba katyi Nyanmien lie Achaïe akpasua wunmuan'n su'n.

² Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Paul laa Nyanmien asé

³ É Min Jésus-Christ i Si Nyanmien i kwla ô! O ti é Si, o si aunnvue, o ti Nyanmien, o dyran é sin sa'n kwlaa nun.

⁴ Sa kwlaa b'o to é su'n, i ye o fonvo yéo, o man fonvole kunngba ng'o fa fonvo yé'n, é kusu é fa fonvo wié mun sa kwlaa b'o to bé su'n nun!

⁵ Afin ke Christ ti é wun nyrennen ke i bobo wuun nyrennen dan sa'n, i kunngba nion, Christ ti Nyanmien fonvo é dan.

⁶ Sa ng'o to é su'n, amun ukale nin amun ti nyanle tio, fonvole nga Nyanmien fa fonvo yé'n, amun fonvole tio, o man sa kwlaa ng'o son é nun'n, o son amun nun wié.

⁷ É lafi Nyanmien su kpa, afin é si ke, ke amun wun nyrennen wié'n, Nyanmien wa fonvo amun kusu.

⁸ Aniaan mun, é klô ke an si kpa ke sa ng'o too é su Asie men'n nun lo'n, o tii é kpa, o man é nyin a tra'an su ke éh fitéh nun bobo.

⁹ Nanwle, é bu ke ba sié é ke bé kun é. Sa so'n yôô so nan ya lafi'a é bobo é su, sannge é lafi Nyanmien b'o tyen swran nga bé wu'n i su.

^10-11 I ye o déé é nyrennen wié so'n nuon, ye o wa dé é. É wla ô i su ke, se an uka é é sé i ke o dyran é sin'n, oh déh é ékun. O man ke swran sunman bé sre i ke o yô é yé, b'o yô'n, swran sunman kusu béh leh i asé é ti.

Paul katyii i akunndan'n

¹² Sa nga ti ye é di é nuan'n ye: é si é klun lo kpa ke nantile wafa nga é fa nanti men'n nun'n, é nanti i so kpa amun nyrun tra su. É nuan nun ti'a nnyonnyon, Nyanmien man é di nanwle. Nanh swran ti blé ngwlele bo é si'n ti ye man é yô soo, sannge Nyanmien ye o dyran é sin ye man é yô soo.

^13-14 Nde nga se an kanngaan amunh wunh i wle'n, i tye ye é kle ble amuon. N wla ô su ke, é Min Jésus i tyen'n nun amun wa wun sa nga nde an wu'an bé wle kpa'n, bé wle wéiin kpa. Sa so'n yele ke amun wa fa é di amun nuan, ye é kusu éh fah amun di é nuan.

^15-16 Ke m buu sa so'n i akunndan'n, laa n waan, ke nh koh Macédoine'n mh bôh nun amun wun lo, ye ke mh bah'n nh sinh amun wun lo ékun, nan ke nh koh Judée'n, an gua min atin klaan. Se n sin amun wun lo kpe nnyon so'n, oh yôh amun fe dan.

¹⁷ ?Ke n waan nh yôh so bo man yôman'n, nuan nun nnyonnyon ye n dilio? ?Sa nga n sé ke nh yôh'n, an bu ke n ken ngben ke swran wié'm bé yô'n sa, bo n kan nde n katyikatyi, nde n sé ke: Een, kpekuun ainman n waan: Tyetye?

¹⁸ Ke Nyanmien Kpli di nanwle'n, o man nde nga é kan kléé amun'n, é katyikatyimen.

¹⁹ Afin Nyanmien Wa Christ-Jésus bo min nin Sylvain, nin Timothée é ken i nde kléé amun'n, o ti'a nuan nun nnyonnyon difue, o di nanwle.

²⁰ Sa kwlaa nga Nyanmien waan oh yôh'n, Christ ye o kplin suo. I so'n ti, Jésus ti é kusu é yra é nuan sé ke: Mon o yô yé! I so'n nun Nyanmien nyan nyrun.

²¹ Nyanmien ye o klé é nin amun wéiin kpa ke é nin Christ ya katyi swran wunmuaan, i bobo ye o siéli é ke é yô i lie mlonmlon,

²² o siéé é nzolie, o man i Wawe'n tran é awlen'n nun, o man é si ke wa tra é asé.

²³ Sa ti bo n nian oman Corinthe lo kun'n, amun nyrun aunnvue tio. Se nenh i so ti'n, man Nyanmien Kpli'n wun min.

²⁴ Nanh ke n sié amun Nyanmien atin'n su tio, afin ke an lafi Christ su'n, an dyran kéklé, sannge é uka amun é di dyunman nan amun klun dyo.