1 Tɛsalonikfuɛ Mun 3 - Nyanmien nde Ufle

¹ Ke é traan lélé'n, wa so'an é nun kun, é wun ke, se é ngunmin é tran Athènes lo'n, o ti kpa.

² Ye é sunmaan é niaan Timothée b'o nin é di Nyanmien dyunman é kan Christ i dyasin fe'n, amun wun lo, nan o wla amun fanngan, o uka amun man an lafi Christ su kpa,

³ nan yale kléle so'n nun swran fi sa sin a bubumen.

⁴ I nun nga é ô amun wun lo'n, é bô su kléé amun ke bé waa klé é yale, an si ke yale kléle so'n ye wa dyu ye'n.

⁵ I so'n ti, ke man kwla tra'a min awlen kun'n, n sunmaan Timothée ke o kô nian, se amun te lafi Christ su ô, se wiénuon Lakafue'n wa laka amun man é dyunman'n wa yô ngben ô.

⁶ Sannge ke Timothée fin amun wun lo ityra'n b'o dyuu wa'n, o kaan amun wun lo nde fe kléé é ke an te lafi Christ su, ye an klô Nyanmien nin swran, an bu é akunndan kpa titi, amun wla lô é ke é kusu é wla lô amun'n sa.

⁷ Aniaan mun, i so'n ti, é afe'n nin é nyrennen so'n kwlaa nun Christ su bo an lafi'n ti, o man é wla a gua asé,

⁸ afin ke é ti ke an lafi é Min'n su an dyran kéklé'n, o man ya nyan é ti sien'n.

⁹ Ke Nyanmien wun ke amun ti é klun dyo dan kpa'n, é wu'an asénna kun nga é fa le io.

¹⁰ Wia nun nin kongue é sre i kpa ke o man é atin man é kô wun amun wun ékun nan é uka amun man an lafi Christ su kpa.

¹¹ Man é Si Nyanmien bobo nin é Min Jésus bé man é atin klaan man é o amun wun lo!

¹² Man é Min'n man an klô amun wiéngu nin swran'n kwlaa dan kpa tra laa'n, ke é kusu é fa klô amun'n sa!

¹³ Ke o kô yô so'n, o man amunh nyanh awlen, ye ke é Min Jésus nin i swran'n kwlaa béh bah'n, é Si Nyanmien sunh ke an ti i lie klônglônglô bo bé kwla satyi'a amun wun kaan sa!