1 Korɛntfuɛ Mun 7 - Nyanmien nde Ufle

Adya'n su sa bo Corinthefue'm bé usali'n

¹ Man é bu sa nga ti ye an ble n fluwa'n i akunndan. Se yasua nin bla ba si'a sua mlonmlon'n o ti kpa,

² sannge ke o yô nan amuan kunnde'a bla i sukusuku'n, man yasua kun dya bla kun, ye bla kun dya bian kun.

³ Liké nga yasua yô men i yio o ti su'n, man o yô men, man bla'n kusu yô i so men i wun'n.

⁴ Bla'n sié'e i bobo wun, i wun'n ye o sié io, ye yasua'n kusu sié'e i bobo wun, i yi'n ye o sié io.

⁵ Se o ti'a ke amun nnyon'n amun bô a yô kun ke amunh fah ble kaan ke amun nin Nyanmien amunh kôkôh yale'n, nanh an kpe amun wun ainngba. Se ble so'n kô sin'n, anh kan bô nun, se wa yô'a so'n, o tyenman nan amun awlen bo an kwla traman'n ti, Satan (*f6*) a nyan amun.

⁶ Ke n sé so'n, nanh ke o ti mmla bo man siéo, sannge atin ye m man amuon.

⁷ Se swran'n kwlaa bé kwla yô ke n sa'n, o yô n fe, sannge se swran wié kwla yô ô, se wié kusu kwla yôman ô, Nyanmien ye o sié i kwlaa so nion.

⁸ N sé bé nga bé nian dya'a bla nin bian'n ye angbôti mmla mun bé ke yiô, bé lie'n se bé ka ke min sa'n, o ti kpa.

⁹ Sannge se bé kwla traman'n, man bé dya bla nin bian, afin se bé dya kun'n, o ti kpa tra ke bé kônvi tran bla nin bian su'n.

¹⁰ Ye bé nga bé dya bla nin bian'n, bé lie'n — nanh min ye n kannion, é Min'n ye o kannion — i waan, nanh man bla yre i wun'n.

¹¹ Se o yre'n, mon o ka le, annze o se i sin i wun kunngba'n su lo. Ye nanh man yasua kusu yre i yi'n.

¹² Bé nga'm bé lie'n — nanh é Min'n ye o kannion, min ye n kannion — se é niaan kun le bla b'o lafi'a Christ su'n, se bla so'n kplin su ke o nin i béh tranh'n, nanh mon o yre.

¹³ Ye se bla kun le bian b'o lafi'a Christ su'n, se bian so'n kplin su ke o nin i béh tranh'n, nanh mon o yre.

¹⁴ Afin Nyanmien so bian b'o lafi'a Christ su'n nun, i yi'n ti, ye o so bla b'o lafi'a Christ su'n nun, i wun'n b'o ti é niaan'n ti. O man Nyanmien so bé mma'm bé nun. Se o ti'a so'n, bé mma'm béh yôh ke guasu ba sa.

¹⁵ Sannge se yasua ô, se bla ô, b'o lafi'a Christ su'n i waan oh yreh i yi annze i wun'n, mon o yre, é niaan Christfue'n ti'a mianfue i so sa lie'n nun. Afin Nyanmien flee é ke é di anuanse.

¹⁶ ?Mmô, se o ti ye man o wun'n oh nyenh i ti ô, a wun i wle se? ?Ndya, se o ti ye man o yi'n oh nyenh i ti ô, a wun i wle se?

Anh tran amun wafa nga an ti bo Nyanmien fa flee amun'n su

¹⁷ Sannge sa ng'o ti tyinndyin'n yele ke man swran kun tran ke Nyanmien siélii'n sa, o nin i wafa ng'o ti bo Nyanmien fa flelii'n su. I so nde ye n ken i asonun'n kwlaa nuon.

¹⁸ Swran nga ke Nyanmien fleeh'n ba wle klen'n, men i kusu tran le so.

¹⁹ Se bé wla klen ô, se ba wla'a klen ô, o ti'a sa tyinndyin, sa ng'o ti tyinndyin'n yele Nyanmien mmla'm i su fale'n.

²⁰ Wafa nga swran kun ti bo Nyanmien fa flelii'n, mon o ka su.

²¹ Ke oh fleh o bo a ti kanga'n, nenh i so'n yô o ya, sannge se a kwla yô man a katyi diéwa'n, yô.

²² Swran kun nga ke Nyanmien fleh'n o ti kanga'n, o katyi diéwa ba Min'n sa nun, i kunngba'n swran nga ke Nyanmien fleh'n o ti diéwa'n, o katyi Christ i kanga.

²³ Nyanmien tôô amun gua kpan, i so'n ti, nanh an fa amun wun man swran man an katyi i kanga.

²⁴ Aniaan mun, wafa nga swran kun ti bo Nyanmien fa felii'n, mon o fe i so tran Nyanmien sa nun.

Bla nga bé nian dya'a bian'n nin angbôti mmla mun

²⁵ Bla nga bé nian dya'a bian'n, bé lie'n, é Min'n wa ma'an min bé wun nde, sannge Nyanmien i aunnvue b'o si min b'o min swran'm bé kwla fa bé wla gua n su'n ti, nh kanh n lie ng'o ô n klun'n.

²⁶ Ble nga i kéklé b'o wa yô'n ti, anh nian sa nga m bu i ke o ti kpa'n ye, se swran kun tran ke i wafa ng'o ti'n sa'n, o ti kpa.

²⁷ Se a dyu bla'n, nanh kunnde ke a yre, se a nian dya'a bla'n, nanh kunnde ke a dya wié.

²⁸ Sannge se a dya bla'n, a yô'a sa te, se talua kun dya bian'n, wa yô'a sa te. Sannge swran so'm béh wunh bé nyinsu, i so'n ti, n klô ke nh yih amun ti sa so'n nun.

²⁹ Nnya mun, anh nian nde nga nh kanh klé amun'n ye, é nyrun a ka kôkô, i so'n ti, swran ng'o le bla'n, mon o yô ke o le'a bla sa.

³⁰ Man bé nga bé su sun'n bé yô ke bé sunman sa, bé nga bé klun ti dyowa'n man bé yô ke bé klun ti'a dyowa sa, bé nga bé tô liké'n man bé yô ke bé le'a liké sa,

³¹ ye bé nga bé fa men'n nun ninngé'n yô bé wun sa yé'n, nanh man bé nyin blô i kunndele su ngbôkô, afin men ng'o ô ye'n o tyeman.

³² N klô'a ke an kôkô sa fi su. Swran ng'o le'a bla'n, é Min'n i ninngé'm bé akunndan ye o buo, o yô sa nga b'o man é Min'n i klun dyo i wun'n.

³³ Swran ng'o le bla'n, men'n nun ninngé'm bé akunndan ye o buo, o yô sa nga b'o man i yi'n i klun dyo i wun'n,

³⁴ o man sa nnyon so'n kennden. I kunngba'n, bla ng'o le'a bian'n, nin talua nga wa dya'a bian'n, ke o yô nan i wunnen'n nin i wawe'n ba yô Nyanmien lie'n, é Min'n i ninngé'm bé akunndan ye o buo, sannge bla ng'o le bian'n, men'n nun ninngé'm bé akunndan ye o buo, o yô sa nga b'o man i wun'n i klun dyo i wun'n.

³⁵ Nanh amun nga suale ti ye n ken i soo, sannge amun yé yôle tio, nan amun yô kpa, ye ke amun nin é Min'n tranh'n, liké fi a sannga'an amun akunndan.

³⁶ Se swran wié bu i ke se o yatyi i wa talua'n le b'o tre i bian dya su'n, o ti i nyin asé guale'n, se o bu i ke se o fe man biaan o ti kpa'n, mon o fe man. Se o yô so'n, o ti'a te.

³⁷ Sannge swran ng'o tre i awlen ke i wa talua'n ka le nanh mon o dya bian'n, bo nanh ke swran ye o mienniin ke o yô i so'n, sannge i bobo klun su'n, se o yô so'n, o ti kpa.

³⁸ I so'n ti, swran ng'o fe i wa talua'n man bian'n, o yô sa kpa, ye swran ng'o fe'e i lie'n ma'an bian'n, o yô kpa dan.

³⁹ Ke bla kun i wun'n i nyin ô su'n, wuun ba bôé kpaun, sannge ke yasua'n kô wu'n, bian kun ng'o klô ke oh dyeh'n, o kwla dye, sannge man i bian adya so'n yô é Min'n i klun su.

⁴⁰ Sannge m bu i ke, se o ka le'n o di aladyé tra ke o dya bian ékun'n. M bu i ke nde so'n kusu ti Nyanmien Wawe'n i klun su.