1 Korɛntfuɛ Mun 6 - Nyanmien nde Ufle

Bé niaan'm bé sanmanle

¹ ?Ke amun nun kun nin kun bé nyan nde bo an yatyi Nyanmien mma'm bé le an fa ko bé bo bé ti'a Christfue'n bé dyasu'n, nyannzuen ku'an amun?

² ?An si'a ke Nyanmien mma mun ye bé wa di men'n nun dyole nion? ?Ye se amun ye amunh dih men'n nun dyole'n, an kwla ka'an nde kanngan nga mun?

³ ?An si'a ke é dyasu ye béh fah ange'm bé nde'n baa? Se o ti so'n, an kwla kan nde kanngan b'o to'n kpe blu!

⁴ ?Se o ti so'n, ke an nyan nde'n, nzu ti ye an fa ko bé bo bé le'a nyrun asonunfue'm bé nyrun'n bé dyasu?

⁵ N ken i so fa gua amun nyin asé! ?Ngwlelefue bo kun nu'an amun nun b'o kwla siésié i niaan Christfue'm bé afieon?

⁶ Christfue kun senmen i niaan bé bo bé lafi'a Christ su'n bé dyasu!

⁷ Ke amun nun kun kun bé sanman bé wun'n, nanwle, o ti amun nyin asé guale dan! ?Nzu ti ye sa nga bé yô amun'n o so'an amun nuon? ?Nzu ti ye an kpli'an su ke bé di amun luflé nion?

⁸ An kpli'an so'n su, sannge an yô amun bobo amun niaan'm bé te, an di bé luflé!

⁹ ?An si'a ke sa tete yôfue'm bé su yô'a men nga Nyanmien siéé'n i nunfue mlonmlon? Nanh an laka amun wun, afin bla annze bian kunndefue, nin amuen sofue, nin yasua b'o kunnde bla i yi bô annze bla b'o kunnde bian i wun bô'n, nin yasua b'o kunnde i wiéngu yasua'n,

¹⁰ nin awiéfue, nin swran bo i nyin yi'a liké'n, nin nzanbôefue, nin nzôwa kpefue, nin swran b'o dé swran liké wué kéklé su'n, i so swran lie'n su yô'a men nga Nyanmien siéé'n i nunfue mlonmlon.

¹¹ Ke laa amun nun swran wié'm bé ti soo. Sannge sien'n, Nyanmien a wunnzin amun, wa fa amun a katyi i lie mlonmlon, wa bu amun swran kpa é Min Jésus-Christ dunman nun, nin i Wawe'n i fanngan nun.

Anh yô liké ng'o ba Nyanmien nyrunnyan'n

¹² N kwla sa'n kwlaa yô, sannge liké ngba yô'a min wun sa yé, n kwla sa'n kwlaa yô, sannge n klô'a ke n fa min wun man liké fi mlonmlon.

¹³ Alie'n ti bé klun ôwié, ye bé klun'n kusu te alie'n i di guawle, sannge Nyanmien o wa satyi liké nnyon so'n. Bé wunnen'n kusu ti'a liké bo bé fa katyi bla kunndele nin bian kunndele likéo, sannge o ti é Min'n i lie, ye é Min'n kusu ti bé wunnen so'n i lie.

¹⁴ Nyanmien bo i fanngan nun ye é Min'n tyennin'n, o man éh tyenh wié.

¹⁵ ?An si'a ke an ti Christ i wunnen'n i lika'n wié? ?N kwla fa Christ i wunnen so'n i bué fa katyi téklé bla kun lie? N kpla é!

¹⁶ ?An si'a ke swran b'o nin téklé bla kun bé san nun'n, wuun ba katyi swran wunmuan? Afin bé klee ke «bé nnyon'n béh katyih swran wunmuan.»

¹⁷ I kunngba nion, swran b'o nin é Min'n katyi kun'n, bé wawe'n se.

¹⁸ Anh wla bla nin bian kunndele'n i asé. Sa te kwlaa bo swran yô'n o ti'a bé kplô nun nde, sannge swran ng'o kunnde bla annze bian'n, o yô i so sa lie'n gue i bobo kplô'n nun.

¹⁹ ?An si'a ke amun wunnen'n ti Nyanmien i Wawe'n b'o fa maan amun b'o ô amun nun'n i sua, o man an di'a amun tiaun?

²⁰ Afin o tôô amun gua kpan, i so'n ti, liké kwlaa nga amunh yôh'n anh yô man o be i nyrunnyan.