1 Korɛntfuɛ Mun 5 - Nyanmien nde Ufle

Bla nin bian kunndele i su nde kanle

¹ Bé tii lika'n kwlaa ke amuan fa bla nin bian kunndele'n amuan tyityi amun ti, lélé o man amun nun kun a dé i si yi'n. Bla kunndele wafa so'n, bé bo bé ti'a Christfue'n bobo bé yôman.

² Ye an fa amun asonun'n di amun nuan! Sa so'n wa yô'a amun ya nan amuan yi swran b'o yô sa so'n amun nun!

³ N lie'n, kannze n nu'an lo'n, sannge min akunndan'n wô lo. Se o ti ke n wô lo'n, wuun é Min Jésus dunman nun m buu swran b'o yôô sa so'n i fo wa tye.

⁴ Se an yia é Min Jésus dunman nun'n, n dyin amun sin,

⁵ anh fa swran so'n wle Satan (*f6*) sa nun, mon o satyi i wunnen'n nan wa fité nun é Min'n i tyen'n nun!

⁶ Amun nuan dile so'n ti'e i su! ?An si'a ke kpaun ayré kaan'n bo bé fa gue i kpaun nzuen'n nun'n ye man i wunmuan'n wlaa?

⁷ Anh gua kpaun ayré laa'n i asé, nan an yô kpaun ufle. Afin an ti ke kpaun bo ba gua'a nun ayré sa, ye ba kun Christ b'o ti ke é Pâque (*f17*) bua sa'n.

⁸ Man é di tyen so'n, sannge nanh man é fa kpaun bo ayré laa'n wô nun b'o klé klunwi'n nin sa te yôle'n, é fa di. Sannge man é fa kpaun bo ba gua'a nun ayré'n é fa di, i ye o klé kpa yôle nin nanwle dile nion.

⁹ N fluwa laa lie'n nun n séli amun ke, nanh man nin bla nin bian kunndefue mun san nun.

¹⁰ Man sé'a amun ke nanh amun nin bla nin bian kunndefue bo bé ti'a Christfue'n, nin bé bo bé dé swran liké wué kéklé su'n, nin bé bo bé nyin yi'a liké'n, nin amuen sofue mun ye nanh amun nin bé di nion. Se o ti so'n, wuun san amunh dyaôh men'n nun mlonmlon.

¹¹ Sannge nde nga n le bleli amun'n yele e, se swran kun sé i wun e o ti é niaan'n b'o ti bla annze bian kunndefue, annze o ti swran bo i nyin yi'a liké'n, annze o te so amuen'n, annze o ti nzôwa kpefue, annze o ti nzanbôefue, annze o dé swran liké wué kéklé su'n, i sofue'n ye n séé amun ke, nanh amun nin i san nun nion, ye nanh amun nin i di liké bobo.

¹² ?O yô se ye min nde kô tran bé bo bé nin é ti'a kun'n bé nde nuon? ?Nanh bé bo bé nin é ti kun'n ye amun nde tran bé nde nun nion?

¹³ Bé bo bé nin é ti'a kun'n, Nyanmien ye o nin bé le io. Anh an sa te yôfue so'n i bô amun nun le.