1 Korɛntfuɛ Mun 4 - Nyanmien nde Ufle

Swran nga Christ sunmaan bé'n

¹ I so'n ti, man swran'm bé si ke é ti Christ i ukafue bo é nian liké nga Nyanmien fiee swran'm bé nyrun'n bé su.

² Kusu sa ng'o ti tyinndyin'n yele ke swran ng'o nian ninngé su'n, o yô swran kpa.

³ Se an bu min se ô, se dyole difue'm bé bu min se ô, n lie'n, o ti'a n liké fi, nanh m bobo ye n di min wun dyole nion.

⁴ N klun ti'a min sa fi nun, sannge nenh i so'n ti ye man min wun salio. É Min'n ye o ti n dyole difueo.

⁵ I so'n ti, nanh an dun mmua di swran fi dyole nan é Min'n wa ba, i ye sa kwlaa ng'o ô nvialie nun bo bé wunmen'n, o man béh wunh io, ye akunndan kwlaa ng'o ô swran klun'n, oh yih i nglô. Ke o kô yô so'n, liké nga swran kun yôli'n, Nyanmien yôh i mô.

⁶ Aniaan mun, ke nh kanh nde so'n, m bô min nin Apollos é dunman n fa klé amun sa nzolie, ke an nian é lie'n su an yô, ye nde nga bé kleli'n, an fa su. Nanh an fa swran kun bo an bui swran kpa tra kun'n fa di amun nuan.

⁷ ?Wan ye o sé o ke a ti kpa tro o wiénguo? ?Nzu ye a le bo nanh Nyanmien ye o maan oo? ?Se i ye o maan wo'n, nzu ti ye a fa di o nuan ke o bobo o sa ti liké sa nion?

⁸ Ke é ô ye'n, liké kwlaa nga an kunnde'n, amuan nyen, amuan nyan amun wun! An su di famien é sin! Yôô, se an di famien'n, o yô é fe, man é kusu é di wié!

⁹ Afin m bui ke, Nyanmien a yô é bo Jésus sunmaan yé'n ke é nu'an swran nun sa. Ya katyi finfinfue swran nin ange'm bé nyrun ke swran bo bé su wa kuin sa.

¹⁰ Christ ti ya katyi sinnglinfue, sannge amun lie'n, swran wunmuan bo amun nin Christ amuan katyi'n ti, an ti ngwlelefue! É ti fuen, sannge amun lie'n, an ti kéklé! An le nyrun, sannge é lie'n, bé bu'e é swran!

¹¹ Lélé nde awé nin nzué wé te kun é,

¹² é wun ti kplen, bé bô é, é ti lalasinfue, é di dyunman é fa kpa nan ya nyan é nuan nun alie. Bé kpe é nzôwa, é yi ma'an bé, é bô bé môaé. Bé klé é yale, o son é nun.

¹³ Bé satyi é dunman, é te'a su. Swran'm bé nyrun ya katyi ke wla sa, é ti ke bé dya bô fa sa, lélé nde bé te bu é so.

¹⁴ Nanh ke amun nyin asé guale ti ye n klee nde so nion, sannge amun bo an ti n swran kpa'n, amun afotue manle tio.

¹⁵ Se an le swran akpi-blu bo bé klé amun Christ nde'n, sannge amun si'n ti kunngba tye, afin dyasin fe'n bo m bô kléli amun'n ti amun nin Christ-Jésus amuan katyi swran wunmuan, o man n ti amun si.

¹⁶ I so'n ti, nh sreh amun, anh nian liké nga n yô'n su, anh yô.

¹⁷ I ti ye man n sunmaan n swran kpa Timothée b'o ti Christfue kpa'n amun wun lo nion. I ye o wa bô wafa nga n fa fa Christ nde'n su'n bo n kléé asonun'n kwlaa nun'n su klé amun ékuon.

¹⁸ Amun nun wié mun an wunndunwunndun amun wun ke n su ba'a amun wun lo kun sa.

¹⁹ Sannge se Nyanmien di su'n, o tye kaan mh bah amun wun lo. Nanh bé nga bé wunndunwunndun bé wun so'n bé nde bo bé kan'n ngunmin ye m ma tio, sannge m ma wun bé yasua bo bé ti'n!

²⁰ Afin nanh nde bo swran kan'n ye o fa yi Nyanmien siéle'n nglôo, sannge sa kéklé bo bé yô'n ye o yii nglôo.

²¹ ?An klô ke n fa ngblé ye m bla amun wun loo, annze m bla wetee su b'o klé ke n klô amun, ônin ye an klôo?