1 Korɛntfuɛ Mun 3 - Nyanmien nde Ufle

Sa nga Nyanmien dyunman difue'm bé yô'n

¹ Aniaan mun, nanh nde nga n kan klé bé nga Nyanmien mien Wawe'n sié bé'n ye n kan klé amuon, sannge nde nga n kan klé bé nga bé ti'a Christfue'n, nin bé nga bo ke bé yô Christfue'n bé te yô ke ba nonman sa'n, i kunngba'n ye n kan klé amuon.

² Man ma'an amun alie, afin amun nian kwla'a liké di ka, ye lélé nde ke é sé ye'n, amun nian kwle'e di, nyonflen ye an te noon,

³ afin an te yô ke swran b'o ti'a Christfue sa. ?Ke amun nyin tyi amun wiéngu bo utré ô amun afien'n, an ti'a ke swran b'o ti'a Christfue sa? ?Ye nanh sa nga klo swran yô'n ye an yôo?

⁴ ?Ke amun nun wié sé ke: N lie'n, Paul lie yele min, ye wié kusu waan: N lie'n, Apollos lie yele min'n, nanh klo swran nyôlie kpa ye an yôo?

⁵ Anh nian: ?Apollos ti nzu? ?M Paul kusu n ti nzu? É ti dyunman difue bo é nde bo é kannin'n ti ye an lafii Jésus suo.

⁶ É Min'n maan é dyunman ngunminngunmin, min ye n talio, Apollos kusu ye o guaa su nzuéo, sannge Nyanmien ye mon o yôô kpaa.

⁷ I so'n ti, swran ng'o ta'n nin swran ng'o gua su nzué'n bé le'a dunman, sannge Nyanmien b'o mon o yô kpa'n i ye o le dunman nion.

⁸ Swran ng'o ta'n nin ng'o gua su nzué'n, bé nnyon'n bé se, ke swran kun fa di i dyunman'n dyuli'n Nyanmien menh i nuan liké.

⁹ Afin é nin Nyanmien ye é di dyunman nion. An ti ke Nyanmien i fié sa, ye an ti ke i sua b'o su kplan sa.

¹⁰ Nyanmien klun-ufué'n ti man yô ke sua kplanfue b'o si sua kplan sa, n wlaa sua'n i bô asé, ye swran ufle su taka su. Sannge man swran ng'o taka su'n, o nien i wafa ng'o fa taka su'n i su kpa.

¹¹ Afin swran fi kwla wla'a sua ufle bô asé kun, san Jésus-Christ bo Nyanmien fe wlaa sua'n i bô asé laa'n i tye.

¹² I so'n ti, sua nga bé wle i bô asé'n, sé swran wié fa sika okwle ô, dyete ufué ô, yebue kpakpa ô, waka ô, idyré ô, awié dya ô, taka sua i bô so'n su'n,

¹³ liké nga swran kun yôli'n bé wa wuin. Afin dyole dile tyen'n nun sin man oh fitéh nglô, ye liké nga swran kun yôli'n béh fah sin gua su nian.

¹⁴ Se liké nga swran kun fa kplannin'n o ka le'n, béh yôéh mô.

¹⁵ Sannge se nga swran kun yôli'n o yra'n, wuun i sa a fua asé. I bobo ye oh nyenh i tio, sannge oh yôh ke o fin sin nun ye wa fité saa.

¹⁶ ?An si'a ke an ti Nyanmien Kpli'n i sua bo i nun ye i Wawe'n traan?

¹⁷ Swran ng'o satyi Nyanmien Kpli'n i sua'n, oh satyih i sofue'n wié, afin Nyanmien i sua'n ti i ngunmin lie, amun ye an ti sua so nion.

¹⁸ Nanh man swran fi leke i wun, swran ng'o bu i wun ke o si sa'n, mon o yô i wun sinnglinfue, nan wa katyi ngwlelefue.

¹⁹ Afin swran'm bé ngwlele'n bo bé waan bé sii'n, o ti sinnzin Nyanmien nyrun. Afin bé klee ke: «Ngwlelefue'm bé bobo bé gble bo bé kpe'n ye Nyanmien fa tra béo.»

²⁰ Ye bé klee ékun ke: «É Min'n si ngwlelefue'm bé akunndan'n. O si ke o ti ngben.»

²¹ I so'n ti, nanh man swran fi fa swran wié di tutré, afin swran nin liké'n kwlaa bé ti amun lie,

²² Paul ô, Apollos ô, Céphas ô, men nin ô, nguan ô, wié ô, liké nga bé ô le ke é sé ye nin ô, liké nga bé wa ba nin ô,

²³ i kwlaa ti amun lie, an ti Christ lie, ye Christ kusu ti Nyanmien lie.