1 Korɛntfuɛ Mun 2 - Nyanmien nde Ufle

Christ i waka'n su bôbôle nde

¹ Aniaan mun, i nun'n bo n woo amun wun lo'n, nanh ke idyole bo n si idyo, annze ngwlele bo n si ti ye n kan sa nga Nyanmien fiee swran'm bé nyrun'n klé amuon.

² Afin n dun mmua buu i akunndan ke se n ko amun wun lo'n, n su ka'an nde fi, san Jésus-Christ o nin i waka'n su bo bé bôbôlii'n i nde'n tye ye nh kaanh.

³ Ke n woo amun wun lo'n, n kwla'a liké fi yô, sre kun min, min wun usu min dan kpa.

⁴ N idyole'n nin Nyanmien nde bo n ken i lo'n, o ti'a ngwlele nde bo se swran tio o fa suo, sannge o ti nde b'o yi Nyanmien Wawe'n nin i kwlale'n nglô.

⁵ N ken i so'n klé amun nan amuan fa'a amun wla a gua'a swran'm bé ngwlele bo bé si'n su, sannge amuan fa gue Nyanmien Kpli'n su'n ti.

Nyanmien i ngwlele

⁶ Sannge ngwlele nde ye é kan klé swran bo bé nyin a ti muon. Ngwlele so'n fi'an é ble su, nin é wléngbi mun bo bé ble lie'n o wa wié'n.

⁷ Nyanmien i ngwlele b'o yi'e i nglô b'o fiee swran'm bé nyrun, b'o dun mmua sié maan é ke o ba é nyrun nyan ka nan wa yi men'n, i nde ye é kaan.

⁸ Men'n nun wléngbi'm bé wié fi ba simen, se o ti ke bé silii'n, wuun ba bôbô'a é Min'n b'o i nyrun yô srô'n waka'n su.

⁹ Sannge ba simen, afin bé klee ke: «Liké nga swran fi nyinma a wunmen, Bé su a timan, Bo i wun akunndan a ba'a bé klun'n Liké so'n ye Nyanmien yô meen i klôfue muon.»

¹⁰ É lie'n, Nyanmien man i Wawe'n yi liké so'n nglô kléli yé. Afin ke Nyanmien Wawe'n kunnde sa'n kwlaa bô'n, o si Nyanmien bobo i akunndan'n.

¹¹ Swran si'e i wiéngu klun akunndan sen i bobo ye o si io ?Nenh io? I kunngba nion, swran fi si'a Nyanmien ninngé mun, san Nyanmien Wawe'n kunngba tye ye o si béo.

¹² Afin é lie'n, akunndan nga swran'm bé bu'n, nenh i wié ye Nyanmien man é buo, sannge Nyanmien fe i Wawe'n maan é, ke é si liké kwlaa ng'o maan é i klun-ufué'n ti'n.

¹³ Ke éh kanh ninngé so'm bé nde'n, nanh liké nga ngwlelefue'm bé klé yé'n i so nde ye é kaan, sannge nga Nyanmien Wawe'n klé yé'n ye é kaan. I so'n nun é fa nde nga Nyanmien Wawe'n man yé'n é fa tu Nyanmien ninngé'm bé bô.

¹⁴ Swran ti blé'n b'o ô sa'n o fa'a Nyanmien Wawe ninngé'm bé su, afin bé ti i nyrun sinnzin liké, o kwla wu'an bé wle mlonmlon, afin san Nyanmien Wawe'n ye o klé swran ye man o wun bé wafa'n i wleo.

¹⁵ Swran nga Nyanmien Wawe siéé'n, i lie'n, o si sa ngbesungbesu'n kwlaa, sannge swran fi wu'en i wafa'n i wle.

¹⁶ Afin bé klee ke: «?Wan ye o si é Min'n i akunndan nion? ?Wan ye o klé i likéo?» Sannge é lie'n, é nin Christ é akunndan'n ti kun.