1 Korɛntfuɛ Mun 13 - Nyanmien nde Ufle

Nyanmien nin swran bé klôle

¹ Kannze man n kan anien wafawafa nin ange'm bé lie'n bobo, se n klô'a swran'n, wuun n ti ke aaba b'o te gléingléin'n sa, nin aaba nde b'o te gblaungblaun'n sa.

² Man n yô Nyanmien nuan idyofue, man n si sa nga Nyanmien fiee swran'm bé nyrun'n i ngba, ye man n wun sa'n kwlaa wle, ye se n lafi Nyanmien su kpa bobo b'o man n kwla sé ôka'm bé ke bé tu bé bô wo'n, sannge se n klô'a swran'n, wuun man yô'a liké fi.

³ Man n fa n sa nun ninngé'n kwlaa n fa ta yalefue mun, ye n fa m bobo nannan su nan n nyan su dunman, se n klô'a swran'n, o yô'a sa fi yé ma'an min.

⁴ Swran b'o klô swran'n o tre i awlen swran wun, swran b'o klô swran'n, o yô aklunyé, i nyin blô'a swran liké su, swran b'o klô swran'n, o di'a tutré, o tu'e i wun,

⁵ i nzuen ti kpa, o bu'e i bobo wun akunndan, o fa'a ya finfin, o fa'a sa sié'e i klun,

⁶ sa te'n yô'e i fe, nanwle dile'n ye o yô i fi.

⁷ Sa'n kwlaa son i nun, sa'n kwlaa nun o lafi Nyanmien su, i wla ô i su, o tre i awlen sa'n kwlaa nun, o si'a afe.

⁸ Swran b'o klô swran'n, o klôé gue i ti nin i bô. Sannge Nyanmien nuan idyole ô, anien wié'm bé kanle ô, sa wle wunle ô, béh wiéh,

⁹ afin nanh sa ngba ye é wun i wleo, Nyanmien nuan nde'n i bué kaan sa ye é kaan, afin é si'e i ngba.

¹⁰ Sannge ke bé kô nyan liké ng'o ti klonnglon'n, béh guah buébuéfue'n blô.

¹¹ Ke n ti bakan'n, n idyo bakan idyole, m bu bakan akunndan, n kan bakan nde, sannge ke min nyin tili'n, n yatyii bakan nyôlie'n.

¹² Ble nga é ô nun ye'n, é wun sa'm bé ke é nyrun bo é nien kpôngbô nglannglan nun'n sa, sannge ke tyen so'n kô dyu'n, éh wunh bé wle wéiin. Ble nga é ô nun ye'n, n wu'an sa ngba wle, sannge ke tyen so'n kô dyu'n, nh wunh i ngba wle kpa ke Nyanmien kusu si min kpa'n sa.

¹³ Sien'n, liké nsan ng'o ka le'n bé ye, Nyanmien su lafile, é wla bo é fa gue Nyanmien su'n, nin klôle bo é fa klô Nyanmien nin swran'n, sannge bé nun dan'n yele Nyanmien nin swran bé klôle.