1 Korɛntfuɛ Mun 12 - Nyanmien nde Ufle

Ninngé nga Nyanmien fa man é bo é yô'n

¹ Aniaan mun, n klô ke an wun Nyanmien Wawe'n i ninngé b'o fa man swran mun ke bé yô'n i wle.

² An si ke i nun'n bo an te so amuen'n an su amuen'n bo bé idyoman'n bé su.

³ I so'n ti, nh kanh klé amun ke, se swran kun idyo Nyanmien Wawe'n fanngan nun'n, o kwla fa'a Nyanmien wua'a Jésus! kusu se swran kun idyo'a Nyanmien Wawe'n i fanngan nun'n, o kwla sé'a ke Jésus ti i Min.

⁴ Nyanmien i ninngé b'o fa man swran mun ke bé yô'n bé ti fanunfanun, sannge i Wawe'n ti kunngba,

⁵ dyunman'n ti fanunfanun, sannge é Min'n ti kunngba,

⁶ i dile'n ti fanunfanun, sannge Nyanmien kunngba'n ye man bé yô i kwlaa so nion.

⁷ Nyanmien Wawe'n i liké b'o fa man swran mun ke bé fa uka bé wu'n, swran kun nin kun lie'n ti'a kun.

⁸ Afin Nyanmien Wawe'n man swran'n wié ngwlele o fa kan nde, ye i Wawe kunngba'n man swran'n wié kusu wun sa wle o kan klé swran wié mun.

⁹ Wawe kunngba'n man swran'n wié kusu awlen o fa lafi Nyanmien su, ye i Wawe kunngba'n ye man swran'n wié kusu yô tukpatyefue'm bé dyuédyuéo.

¹⁰ O man wié'm bé yô sa kéklééklé, wié idyo Nyanmien nuan wié si liké nga bé ti Nyanmien lie'n nin nga bé ti'e i lie'n bé ngbatyie, wié kan anien wafawafa, wié katyi anien b'o timan'n.

¹¹ Wawe kunngba'n ye o fa liké so'n man bé kwlaa ke i klun klô'n sa ye man bé yôo.

É kwlaa é ti swran wunmuan kun

¹² Swran ti wunmuan kun, sannge i wun ninngé'm bé sonnin. I wun ninngé'm bé soon so, sannge i kwlaa so'n ye bé flee swran nion. Ke Christ kusu ti soo.

¹³ Afin Nyanmien fe i Wawe'n yôô é baptême, se Juif ô, Grec ô, kanga ô, diéwa ô, o man é kwlaa ya katyi swran wunmuan, ye i Wawe'n ti é kwlaa é lie.

¹⁴ Nanwle, swran i wun ninngé'n ti'a kunngba, o sonnin.

¹⁵ ?Se bé dya sé ke: Ke bo n ti'a bé sa'n ti, n ti'a bé wunnen'n wié'n, so'n b'o sé'n ti, nanh bé wunnen'n wiéo?

¹⁶ ?Se bé su sé ke: Ke bo n ti'a bé nyinma'n ti, n ti'a bé wunnen'n wié'n, so'n b'o sé'n ti, nanh bé wunnen'n wiéo?

¹⁷ ?Se bé wunnen wunmuan'n ti nyinma'n, béh yôh se ye béh tih saa? ?Se bé fa bé wunnen wunmuan'n ti sa'n, béh yôh se ye béh tih nvaan?

¹⁸ O ti'a so, sannge Nyanmien siésiéé swran i wun ninngé mun ke i klun klô'n sa.

¹⁹ ?Se bé wunnen wunmuan'n ti tunndrunndun kunngba'n, bé kwla flee swran?

²⁰ O ti'a so, sannge bé wun ninngé'n b'o sonnin'n ye man bé fle swran i swran nion.

²¹ Bé nyinma kwla sé'a bé sa ke: N kunnde'a o wa!

²² O ti'a so mlonmlon, afin é lika nga é bu i ke o yô'a liké fi'n, o yô liké.

²³ Ye é wun ninngé'm bo é bu'a ke bé ti é wunnen'n wié'n, bé ye bé lô yéo, ye é lika nga bé wun io, o ti'a klaan'n, o lô é, é kata su,

²⁴ sannge é lika ng'o ti klaan'n, é yô'e i so. Ke Nyanmien yili swran'n, i wunnen'n le'e i bué nuan, o man i lika nga bé bu'e i liké fi'n, i ye o lô Nyanmien kpaa.

²⁵ O yôô i so nan bé wunnen b'o ti wunmuan kun'n, wa kpatyi'e i wun bué, sannge i lika'n kwlaa bé uka bé wun.

²⁶ Se é lika kun yô é ya'n wuun é wunnen'n kwlaa yô é ya, ye se bé kannvun é lika kun'n, o yô é fe kpa.

²⁷ An kwlaa an ti Christ i wunnen, swran kun ti i lika'n kun.

²⁸ Ke Nyanmien siéé swran'm bé so asonun'n nuon. Bé nun klikli'n yele bé b'o sunman bé'n, i nnyon su'n yele bé nga bé idyo i nuan'n, i nsan su'n, yele bé nga bé klé ninngé'n. Bé sin lie'n yele bé nga bé yô sa kéklééklé'n, bé nga bé yô tukpatyefue'm bé dyuédyué'n, bé nga bé yô swran yé'n, bé nga bé di kpen'n, bé nga bé kan anien wafawafa'n.

²⁹ ?Bé ngba ye o sunman béo? ?Bé ngba bé idyo i nuan? ?Bé ngba ye bé klé ninngéo?

³⁰ ?Bé ngba bé yô sa kéklééklé? ?Bé ngba ye bé yô swran dyuédyuéo? ?Bé ngba bé kan anien wié mun? ?Bé ngba bé si anien bo bé timan'n i katyi?

³¹ Man amun nyin blô Nyanmien ninngé b'o fa man swran mun ke bé yô'n bé nun kpakpafue'm bé su dan kpa. Kusu m ma klé amun liké nga se an yôo o ti kpa tre i ngba'n.