1 Korɛntfuɛ Mun 11 - Nyanmien nde Ufle

¹ Ke n nian liké nga Christ yô'n su n yô'n, amun kusu anh nian nga n yô'n su, anh yô.

Bla'm bé ti katale

² Amun mô, yele ke amun wla ô n su titi, ye nde nga bé fa maan min bo n kusu n fa maan amun'n, an fa su kpa.

³ Sannge kusu n klô ke an wun i wle kpa ke Christ ye o sié blaa, ye Nyanmien kusu sié Christ.

⁴ Yasua kwlaa nga ke oh kôkôh yale klé Nyanmien annze oh idyoh Nyanmien nuan asonun'n nun'n, o kete i ti'n, o gua Christ b'o siéé'n i nyin asé.

⁵ Sannge kusu bla kwlaa nga ke oh kôkôh yale klé Nyanmien annze oh idyoh Nyanmien nuan asonun'n nun'n, o kete i ti'n, o gua yasua b'o siéé'n i nyin asé. Se o yôé so'n, o ti ke wa yi i ti'n kplékékpléké sa.

⁶ O man se bla kun kete i ti'n, mon o kpekpe i ti'n su. Sannge se bé kpekpe bla i ti'n annze bé yii kplékékpléké o ti nyannzuen'n, mon o kete i ti.

⁷ Sannge yasua b'o man bé wun wafa nga Nyanmien ti'n nin i nyrunnyan'n, se o kete i ti'n, o ti'e i su. Ye bla kusu ba yasua i nyrunnyan,

⁸ afin nanh bla ye Nyanmien fa yii yasuaa, sannge yasua ye o fa yii blaa.

⁹ Nanh bla ti ye o yii yasuaa, sannge yasua ti ye o yii blaa.

¹⁰ I so'n ti, man bla fa liké, b'o klé ke yasua siéé'n kete i ti ange'm bé ti.

¹¹ Kannze o ti so bobo'n, é bo é nin Christ ya katyi swran wunmuan'n, yasua di'e i tiaun, ye bla kusu di'e i tiaun.

¹² Afin Nyanmien fa yasua yii bla, bla kusu ye o wu yasuaa, sannge i kwlaa fin Nyanmien

¹³ ?Amun bobo anh bu bé nian, se bla kun kôkôh yale klé Nyanmien asonun'n nun bo wa kete'e i ti'n, o ti i nuan su?

¹⁴ ?Swran'm bé nyrun, se yasua kun sié i ti ndre'n tennden'n, o ti'a nyannzuen?

¹⁵ ?Sannge se bla kun sié i ti ndre'n tennden'n, o be'e i nyrunnyan? Afin bla ti ndre tennden'n bé fa meen ke o fa kete i ti.

¹⁶ Nde nga n ken ye'n, se swran nga i waan oh sih i akplôwa'n, mon o si ke é nin Nyanmien i asonunfue mun é le'e i wafa ufle bo é yôo.

Sa nga é yôé é Min'n i alie'n sin'n

¹⁷ N yi'a amun aye nde nga m ma kan klé amun ye'n su, afin ke an yia'n, sa nga an yôé sien'n, o ti'a kpa,

¹⁸ afin n tii i ke, ke an yia asonun'n nun'n, an bubu nun, ye m bu i ke oh yôh so,

¹⁹ afin san amun wun nun bubule so'n nun ye éh wunh swran nga bé ti kpa sakpa nion.

²⁰ I so'n ti, ke an yia'n, nanh é Min'n i alie lie'n su ye an yiaa,

²¹ afin ke amunh dih'n, an kpli di, awé kun wié, wié kusu a bô.

²² ?An le'a awlô bo an di liké loo? ?Annze Nyanmien i asonun'n i finfin ye amunh yôoh? ?Amunh guah yalefue'm bé nyin asé? ?Nzu nde ye n kan klé amuon? ?N yi amun aye? Sa so'n lie'n, n su yi'a amun aye.

Communion i su nde kanle

²³ Afin sa nga é Min'n fa klé amuon. Nnosua kunngba nga bé fa é Min Jésus maan swran mun'n, o faa kpaun,

²⁴ ke o laa Nyanmien asé'n, o bubu nun, o sé ke: Kpaun ng'o ô ye'n ti min wunnen, o ti amun lie. Anh yôé ke nga n yôé ye'n sa, man amun wla kpen n su.

²⁵ Ke bé wiéé liké'n di'n, o faa klôwa nga nun'n o ti min mmôdya b'o man amun nin Nyanmien amunh dih anuanse. Tyen kwlaa nga amunh nonh nun'n, anh yôé ke nga n yôé ye'n sa, man amun wla kpen n su.

²⁶ O man tyen kwlaa nga amunh dih kpaun nga bo amunh nonh klôwa nga nun'n, an bô é Min'n i wié nde'n su lélé mon o fa dyu i bale.

Swran ng'o yô sa b'o blu su fa communion'n

²⁷ I so'n ti, swran kwlaa ng'o yô sa b'o ti'e i nuan su'n b'o di kpaun nga o non é Min'n i klôwa'n nun'n, o satyi é Min'n i wunnen'n nin i mmôdya'n.

²⁸ O man swran kwlaa nga i waan oh dih kpaun nga oh nonh klôwa nga nun'n, mon o dun mmua nien i bobo wun kpa,

²⁹ afin swran nga ke oh dih oh nonh'n, o bu'a é Min'n i wunnen'n liké fi'n, o kpe sae men i bobo wun.

³⁰ I so'n ti ye man tukpatyefue nin tyetyewafue'm bé soon amun nun, ye amun nun louun ba wu nion.

³¹ Se é bobo é nian é wun'n, é Min'n su wu'an fo é wun.

³² Sannge ke o yô nan wa bu'a é nin men'n nunfue mun é fo kunngba'n, se o wun fo é wun'n, o tu é fo.

³³ I so'n ti, n niaan mun, tyen nga an yia ke amunh dih liké'n, anh minnde amun wiéngu.

³⁴ Ke o yô nan amuan kpe'a sae a ma'an amun wun anyia so'n nun'n, man swran nga awé kuin'n o dun mmua di liké i awlô lo. Sa nga'm bé lie'n, se n dyu loo n kô kan.