1 Korɛntfuɛ Mun 10 - Nyanmien nde Ufle

Bé wun su nianle amuen'n i lika

¹ Aniaan mun, n klô ke an si ke é nannan'm bé kwlaa bé traan nyanmien blé'n i bô, bé kwlaa bé kpee dyénvié'n bé dya nun.

² Ke bé wluu dyénvié'n nin nyanmien blé'n nun'n, o ti ke bé baptême yôle sa, o man bé nin Moïse bé katyii swran wunmuan.

³ Alie kunngba b'o fin Nyanmien sa nun'n, ye bé kwlaa bé dio,

⁴ ye nzué kunngba b'o fin yebue b'o su bé su'n nun, yebue so'n yele Christ.

⁵ Sannge Nyanmien klun a dyo'a bé kpanngban liké bé wun, oman bé fuen'n kaa blô.

⁶ Sa so'n b'o too bé su'n o ti sa b'o fa klé é ke, nanh man é nyin tran sa tete'm bé su ke bé lie'n sa.

⁷ Nanh an yô amuen sofue ke bé klelii ke bé nun wié'm bé yôli'n sa, bé klee ke: «Swran so'm bé tran asé bé di liké, bé non nan, ye bé dyaô kan ngôwa.»

⁸ Nanh man é kunnde bla ke bé nun wié'm bé yôli b'o man bé nun akpiakpi ablaon-nin-nsan bé wuu lé kunngba'n sa.

⁹ Nanh man é kunnde é Min'n i nuan ke bé nun wié'm bé kunndeli b'o man wuô'm bé kunnin bé'n sa.

¹⁰ Nanh an idyo amun kônviabô ke bé nun wié'm bé idyoli b'o man wié'n too bé nun o nunnuun bé'n sa.

¹¹ Sa so'n b'o too bé su'n o klé sa b'o wa ba'n, ye bé klee bé ke béh fah tu é bo ya dyu men'n i bué nuan'n, é fo.

¹² I so'n ti, swran ng'o bu ke wa dyran kpa'n, mon o nien i wun kpa nan wa toman!

¹³ Sa kwlaa ng'o to amun su'n, nanh amun ngunmin ye o to amun suo. É kwla fa é wla'n kwlaa gue Nyanmien su, afin o kpli'an su ke sa ng'o so'an amun nun'n o to amun su. I so'n ti, se sa to amun su'n, o man o son amun nun, yele ke o yô sa nga b'o man an kwla fité nun'n.

¹⁴ I so'n ti, n swran kpa mun, anh wla amuen sole'n i asé.

¹⁵ Nde nga n kan'n, n kan klé amun bo an ti ngwlelefue'n, i so'n ti amun bobo anh bu bé nian.

¹⁶ ?Ke éh nonh communion nzan'n bo é la Nyanmien asé'n, Christ mmôdya'n ti'a é kwlaa é lie? ?Ke éh bubuh communion kpaun'n nun bo éh dih'n, Christ wunnen'n ti'a é kwlaa é lie?

¹⁷ Kannze é sonnin'n, kpaun kunngba so'n ti ya katyi swran wunmuan, afin kpaun kunngba so'n ye é ngba é yia su é dio.

¹⁸ Nian Israëlfue mun ke bé nzuen'n tio. ?Bé bo bé di nun bo bé fa so Nyanmien'n, Nyanmien sole so'n ti'a bé kwlaa bé lie?

¹⁹ ?I so'n ti, ke n ken i so'n, n waan, nnen bo bé fa so amuen'n ti liké dan? ?Annze amuen'n bobo ti liké dan?

²⁰ Bé ti'a liké fi. Nanwle, nun nga bé fa so amuen'n, mmusu mun ye bé fa so béo, nanh Nyanmien ye bé fa so io. I so'n ti, n klô'a ke amun nin mmusu mun di.

²¹ An kwla no'an é Min'n i klôwa'n nun, nan amun kunngba'n amuan non mmusu'm bé lie'n nun. Ye amun nin é Min'n kwla wla'a asa, nan amun kunngba'n amun nin mmusu mun amuan wla asa.

²² ?Éh kanh é Min'n i ya? ?É le wunmien tre?

Anh yô sa ng'o man Nyanmien nyan nyrun'n

²³ É kwla sa'n kwlaa yô, sannge liké ngba yô'a é wun sa yé, é kwla sa'n kwlaa yô, sannge nenh i ngba ye man swran yô swraan.

²⁴ Nanh man swran fi bu i bobo wun akunndan, sannge mon o bui i wiéngu akunndan.

²⁵ Liké kwlaa nga bé yô i ate guabô lo'n, an di, nanh an wusa nun, nan amun klun a titi'a amun,

²⁶ afin é Min'n lie yele asie'n nin i su ninngé'n kwlaa.

²⁷ Se swran b'o ti'a Christfue'n fle amun ke an kô di liké'n, se an ko'n, liké kwlaa ng'o fa dyin amun bô'n, anh di, nanh an wusa nun, nan amun klun a titi'a amun.

²⁸ Sannge se swran wié sé amun ke: Bé fa nnen so'n soo amuen'n, séle bo swran so'n sé amun ke bé fa so amuen'n, nin i klun b'o wa titii'n ti, nanh an di.

²⁹ Nde nga n ken ye'n, nanh ke amun bobo amun klun titile tio, swran so'n lie tio. Swran wié usah ke: ?Nzu ti ye n liké lie nga n kwle i yô'n, swran wié'm bé klun titile'n ti, n kwla yô'e kuon?

³⁰ ?Se liké nga n di bo n si ke o fin Nyanmien'n, bo i ti n le i asé'n, nzu ti ye bé satyi n dunmaan?

³¹ I so'n ti, se amunh dih liké ô, amunh nonh nzué annze nzan ô, se amunh yôh liké wié ô, anh yô i kwlaa so'n i nuan su man Nyanmien nyan nyrun.

³² Nanh an satyi Grec nin Juif min, nin Nyanmien i Asonun'n.

³³ Anh nian liké nga n yô'n su. Liké kwlaa nga n yô'n, n waan nh yôh nan o dyo swran'n kwlaa bé klun, m bu'a m bobo min wun akunndan, sannge ke o yô nan bé kpanngban lika ba nyan bé ti'n, m bu bé akunndan.