1 Korɛntfuɛ Mun 1 - Nyanmien nde Ufle

Paul kle fluwa nga kô maan Corinthe lo Christfue mun

¹ M Paul bo Nyanmien fleli min yele ke o klô ke Christ-Jésus sunman min'n, min nin é niaan Sosthène,

² éh kleh fluwa nga ble amun bo an ti Nyanmien i asonunfue Corinthe lo b'o flee amun ke an katyi i lie mlonmlon'n, swran wunmuan bo amun nin Jésus-Christ amuan yô'n ti, o nin bé kwlaa nga bé bô Jésus-Christ b'o ti é kwlaa é Min'n i dunman'n.

³ Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Paul laa Nyanmien asé yé b'o yôli bé'n ti

⁴ Amun ti n la min Nyanmien'n i asé titi, yé b'o yôli amun Christ-Jésus ti'n ti.

⁵ Afin ke amun nin Christ amuan yô swran wunmuan'n, liké kpakpa'n kwlaa ti a sin a yia amun, an si i nde'n kwlaa kan, an wun i ninngé'n kwlaa bé wle.

⁶ O klé ke amuan fa Christ nde'n su kpa.

⁷ I so'n ti, ke amunh minndeh é Min Jésus-Christ i wun nglô yile tyen'n, Nyanmien i ninngé b'o fa man swran mun'n i wié fi su mia'an amun.

⁸ I ye man amunh dyranh tyinndyin lélé fa dyu i awiélieo, nan é Min Jésus-Christ i wun nglô yile tyen'n nun ba kputu'a amun.

⁹ Nyanmien b'o flee amun ke amun nin i Wa Jésus-Christ b'o ti é Min'n an di anuanse'n, o ti nanwlefue.

Corinthe lo asonun'n i nun bubule

¹⁰ Aniaan mun, é Min Jésus-Christ ti nh sreh amun, man amun nuan se, nanh an bubu amun wun nun, sannge man amun akunndan'n nin amun nen'n yô kun.

¹¹ Afin n niaan mun, n ti amun wun nde Chloé awlôfue'm bé nuan nun, ke nde ô amun afien.

¹² Nde so'n yele ke amun nun wié sé ke: N lie'n, Paul lie yele min! wié waan: Apollos lie yele min! wié kusu waan: Céphas lie yele min! ye wié waan: N lie'n, Christ lie yele min!

¹³ ?Bé kpekpee Christ nun? ?Paul ye bé bôbôé waka'n su amun tio? ?Ye Paul dunman nun ye bé yôô amun baptêmeon?

¹⁴ Ke nanh min ye n yôô amun baptême, bo san Crispus nin Gaïus bé tye ye n yôô bé baptême'n, o yô n fe kpa.

¹⁵ I so'n nun swran fi kwla sé'a ke n dunman nun ye bé yôô amun amun baptêmeon.

¹⁶ Bé nga n yôô bé baptême ékun'n yele Stéphanas nin i awlôfue mun, sannge bé nga'm bé lie'n, n wu'en i wle se n yôô bé nun wié baptême ô.

¹⁷ Nanh swran'm bé baptême yôle ti ye Christ sunmaan mion, Nyanmien nde kanle ti ye o sunmaan mion. Nde so'n i kanle'n, nanh ke n si ngwlele n si idyo tio. Se o ti so ti'n, wuun Christ waka'n su wule'n oh yôh ngben.

Nyanmien ti kpli, o si sa'n kwlaa

¹⁸ Afin Christ i waka'n su wule nde bo bé kan'n o ti sinnzin nde bé nga bé su mlin'n bé nyrun, sannge é nga é su fité nun'n, o klé é ke Nyanmien ti kpli.

¹⁹ Ye bé kleli nde wié ke: «M man ngwlelefue'm béh katyih sinnglinfue, Ye bé bo bé wun sa wle'n, bé su wu'an sa wle kun.»

²⁰ ?Ngwlele sifue'n wô nin? ?Mmla sifue'n wô nin? ?Ble nga nun bé bo bé kunnde ke béh sih sa'm bé bô'n bé ô nin? ?Swran nga bé ti ngwlelefue men nga nun'n Nyanmien bu'a bé sinnglinfue?

²¹ Nyanmien wun ke o ti kpa ke o fa sinnzin nde so'n dé bé nga bé fa su'n, afin Nyanmien b'o si sa'n kwlaa'n, o wun ke swran'm bé nin bé ngwlele bo bé sii'n, ba simen.

²² Juif'm bé waan, bé yi atre klé bé, ye Grec'm bé kunnde ngwlele.

²³ Sannge é lie'n, Christ bo bé bôbôlii waka'n su, bo i nde kanle'n ti Juif'm bé ngasi'n, b'o ti bé bo bé ti'a Juif'n bé nyrun sinnzin nde'n, i nde ye é kaan.

²⁴ Sannge é nga Nyanmien flee yé'n, se Juif ô, se Grec ô, Christ ti é si ke Nyanmien ti kpli, ye o si sa'n kwlaa.

²⁵ Afin Nyanmien i sinnzin'n ti swran'm bé ngwlele, ye Nyanmien i fuen'n ti swran'm bé kéklé.

²⁶ Aniaan mun, anh nian amun wafa nga an ti bo Nyanmien fa flee amun'n, bé bo swran'm bé bu bé ngwlelefue'n, nin swran dan'n, nin wléngbi'n ba soman amun nun.

²⁷ Afin liké nga swran'm bé bu'a bé liké'n, bé ye Nyanmien fa gua ngwlelefue'm bé nyin aséo. Liké nga swran'm bé bu i ke bé kwla fa yô'a liké fi'n, bé ye Nyanmien fa gua kékléfue'm bé nyin aséo.

²⁸ Liké nga swran'm bé bu'e liké kpa'n, nin liké nga bé yôé finfin'n, nin nga bé bu'e i ke o ô le'n, Nyanmien fa bé man liké nga bé ô le'n bé nya'an nyrun kun.

²⁹ Nyanmien yôé so nan swran fi a di'e i nuan a klémen.

³⁰ Afin i ye man amun nin Christ-Jésus amuan katyi swran wunmuaan, ye Christ ti é katyi ngwlelefue, o bu é swran kpa, é katyi i lie mlonmlon, ye o kpo é ti.

³¹ Afin bé klee ke: «Swran nga i waan oh dih i nuan'n, mon o fa é Min Nyanmien'n di i nuan.»