John 20 - Annaahk John Manistsitsinikatahpi Jesus Manistsipaitapiihpiai 1979

¹ O̱ki. A̱nnika istsitsa̱i̱ksistsikoyi amo niʼtato̱yiiksistsikoi niita̱ʼpikskanaotonniwa sa̱kiaissksi̱inattsiwa. Ki a̱nnikayii Mary Magdalene sota̱mitoʼtoowa omiim Jesus itsi̱pststsaahpi. Ki na̱i̱ksikskaihtsiiwa omii o̱mahkoohkotooki iihtso̱ʼkiihpi Jesus itsi̱pststsaahpi.

² A̱i̱ʼnimayi̱ ki o̱o̱mahkaoʼka sota̱momatapokskaʼsiwa. Ki a̱i̱ʼtoʼto̱owa ami̱i̱ksi Peteri ki omi̱isk oma̱a Jesus ota̱komimmaisk oma̱nikapiimiska. Ki a̱a̱ʼnistsiiwa amo̱ksi na̱tsitapiiksi, “Ayi̱i̱stapipohtoohpa osto̱mi kitsi̱naaiminnoona. Ma̱tattsitsstsiiwaatsi omiim itsi̱psststsaahpi. Ma̱tssksiniihpinnaana itapi̱pohtoohpi a̱a̱hkitsstsaahpi.”

³ Ki o̱o̱mikskaoʼkiaawa Peter ki omii Jesus oma̱ttanikapiimi, sota̱momatapoksaʼsiiyaawa. A̱yaakitapooyaawa omiim Jesus itsi̱pststsaahpi.

⁴ Sota̱maya̱kitapokskaʼsiiyi a̱a̱mokska na̱tsitapiikska. Ki a̱nniayii oma̱ttanikapiimi oma̱a Jesus itsi̱stapissokskaʼsa̱tsiiwa ami̱i Peter. Ki oomakaoʼka i̱i̱tomitoʼtoowa omii Jesus itsi̱pststsaahpi.

⁵ Sota̱motahsohpaʼwaaniwa ki itsi̱pstssapiwa. Ki a̱i̱ʼnima omiistsi inna̱i̱ʼpisstsi iihtsiso̱o̱mooniihpi Jesus osto̱mi sa̱kiitaisstsiyaawa. Sota̱msaitsipiima.

⁶ O̱ki. Simon Peter noohka̱ttsitoʼtoowa, po̱ʼkioʼto̱owa. Sota̱mitsipiima; sota̱mitsinima omi̱i̱istsi inna̱i̱ʼpisstsi otsita̱i̱sstsissaawa.

⁷ Ki amoya iihta̱yihkinipistahpi a̱yakiitaisstsiiwa. Ma̱tohpitsstsiiwa omi̱i̱stsi inna̱i̱ʼpisstsi. Iimo̱o̱niihpiaawa.

⁸ Ki na̱i̱nowaohkattsitaipi̱i̱minayi oma̱a Jesus oma̱ttanikapiimi. A̱nniskaoʼkinai i̱i̱tomitoʼtooyi omii Jesus itsi̱pststsaahpi. Ki a̱i̱ʼnima manistsi̱i̱hpi. Ki a̱nniayii iihtoma̱i̱ʼtakiwa.

⁹ (O̱ki. A̱nnihka iimi̱i̱sawaotsistapiʼtsimiaawa naato̱i̱si̱nakiaʼtsisi niitsi̱kayissi̱naaihpi oma̱a Jesus a̱aksstsinaiʼssksipoaoowa.)

¹⁰ O̱ki. Ki anniayii amo̱ksi na̱tsitapiiksi, Jesus oma̱nikapiimiksi ita̱niitahkayiiyaawa.

¹¹ Ki oma̱a Mary Magdalene sa̱kiitsoohkaipoyiwa omiima Jesus itsi̱pstsaahpi. Sa̱kiawasaiʼniwa. A̱otahskaohsiwa, a̱wasaiʼniwa, itsi̱pstssapiwa omiim Jesus itsi̱pststsaahpi.

¹² Ki a̱nniksayii a̱a̱moksi na̱tsitapiiksi natoyi̱i̱tapiiksi sota̱minoyiiwa̱i̱ksi, itsipsta̱o̱piiyaiksi omiim Jesus itsi̱pststsaahpi. A̱a̱mo ita̱o̱piiwa Jesus otsi̱tapohkiihtsiihpi, ki anna̱a o̱o̱mi ito̱piiwa Jesus otsi̱tapi̱kaihtsiihpi. A̱nniksimaoʼkiaawa ita̱o̱piiyaawa Jesus itsstsa̱a̱hpi.

¹³ O̱ki. Oma̱a Mary ota̱a̱nikkaiksi, “O̱ki aki̱i̱yi, tska̱a ko̱mohtawasa̱iʼnihpa?” Itani̱stsiiwaiksi, “Kii iyi̱i̱stapipohtoohsi osto̱mi annaahkayii nitsi̱naaima, ki nima̱tssksiniihpa itapi̱pohtoohpi, itsstsa̱a̱hpi.”

¹⁴ Kii ki ota̱a̱ʼnissi a̱a̱mohka ito̱ʼtaksipoyiwa. Ki a̱nniaoʼkinai ita̱i̱poyiiyinai Jesusi. Oma̱a Mary itsino̱yiiwa̱yi. Ki ma̱tonoyiiwaatsayi.

¹⁵ Otsi̱tanikka omi̱i̱ Jesusi, “Oma̱a aki̱i̱yi. Tska̱a ko̱mohtawaasaiʼnihpa? Taka̱a kita̱ʼpaissammawa?” Kii ki soksta̱a̱wa ami̱i Jesus a̱a̱hkami̱i̱nayi omi̱i̱kska a̱o̱toitsikatsiiksi sapipo̱mmaaniksi miistsi̱i̱ksi. A̱a̱nistsiiwa̱yi, “Ikkami̱stapipohtomiiniki oosto̱mi noohkani̱kkita tsima̱a kitsi̱tsstsa̱a̱wa. Niisto̱wa nita̱kotooʼtoawa.”

¹⁶ Oma̱a Jesus itani̱i̱wa, “Mary.” Ki oma̱a Mary sota̱mattsiita̱a̱kitapoʼtaksipoyiwa̱yi. A̱a̱nistsiiwayi, “Rabbi.” Amoohka “Rabbi” ota̱wattsiʼpoahsoaawa anista̱panioʼsina “A̱i̱ssksinimaatstohki.” Ami̱i̱ksi Jews otsi̱ʼpoahsoaayaawa.

¹⁷ Jesus itani̱stsiiwa̱yi “Pina̱ttsinnokit. Nima̱tomaitapsspommo̱ohpa ni̱nna. Istapo̱o̱ta no̱mohpapiʼihpiksi na̱a̱tsikopotsiiksi. Anistsi̱saawa nita̱kitapsspommoohsi anna̱a̱hka ni̱nnaahka, anna̱a̱hka ki̱nnoaawahka. Ta̱kitapoo anna̱a̱hka nita̱waatsimoihkaamawahka, A̱ʼpistotookiwahka, anna̱a̱hka kino̱o̱hkattawaatsi̱moihkaamoaawahka.”

¹⁸ Kii ki Mary Magdalene ki a̱i̱ʼtapoowa omi̱i̱ksi Jesus oma̱nikapiimiksi. Sota̱manistsiiwaiksi, “Nitsinoa̱wa kitsi̱naaiminnoona.” Ki a̱a̱ʼnistsiiwaiksi ota̱a̱ni̱yihpistsi.

¹⁹ O̱ki. Natoyi̱i̱ksistsikoi koʼko̱i ki a̱nni̱ksaoʼkiaawa omi̱i̱ksi Jesus oma̱nikapiimiksi itsi̱psta̱o̱piiyaawa na̱a̱pioyii. I̱kstonnoyiiyaawa omi̱i̱ksi isto̱ʼtotamaʼpssiiksi Jews. Ki a̱nnihkayii niita̱ʼpiyoʼkimiaawa omiistsi kitsi̱mistsi. O̱ki. Ki a̱nnika Jesus itsito̱ʼto̱owa i̱tsspiipoyiiwaiksi. Ita̱i̱ksimatsimmiiwa̱i̱ksi. A̱a̱niiwa, “Ki̱tohkotohpoaawa iʼta̱a̱maʼpii.”

²⁰ Ki ota̱i̱ʼksistanistoohs i ita̱i̱stamatsiiwa̱i̱ksi oʼtsi̱i̱stsi, ki a̱a̱mo isttsipo̱o̱htsi osto̱mi iitssi̱mahpi. Ki omi̱i̱ksi iihtsi̱taamssiiaawa otsino̱ahsaawa otsi̱naaimoaawayi.

²¹ O̱ki. Jesus ma̱ttsitsiita̱aksiksimatsimmiiwaiksi. Ki itani̱stsiiwa̱i̱ksi, “Ki̱tohkotohpoaawa iʼta̱a̱maʼpii. Nanisto̱ʼtsskoyihpi ni̱nna, kita̱i̱totoisapsstsimaahkatohpoaawa ka̱a̱hkaʼpoohsooayi.”

²² Ki ota̱i̱ʼksistanistoohsi a̱a̱mohka sota̱mita̱psiitamiiwaiksi, ki itani̱stsiiwa̱i̱ksi “Maʼtooka natowo̱ttaka.

²³ Ikka̱mssiinomoainoaainiki mata̱piiksi otoka̱ʼpipaitapiiʼsoaawaistsi a̱kitssiinomo ma̱takssiinomoayaawaistsi.”

²⁴ O̱ki. Oma̱a Thomas, a̱nnikskaoʼki omi̱i̱ksiska na̱tsikopotsiikska. Ma̱ttanistawa niistsi̱mi. Ma̱tsitohpokaʼpaissiimiwa omi̱i̱ksi na̱tsikopotsiiksi anniihka ota̱i̱ʼtoʼtoohsi Jesusi.

²⁵ Ki anniayi Thomas ota̱a̱nikka omi̱i̱ksi Jesus oma̱ttanikapiimiksi, “Tsinoa̱nnaana kitsi̱naaiminnoona.” Ki itani̱stsiiwaiksi, “Kima̱takomaiʼtoohpoaawa. Niisto̱wa ikkami̱nimminiki iksi̱niminiki oʼtsistsi itssta̱i̱hpi, ikkami̱ksiinimminiki omii isttsipo̱o̱htsi osto̱mi itssi̱mahpi kita̱kitomaiʼtoohpoaawa.”

²⁶ O̱ki. A̱nnika mattato̱yiksistsikoyika ki a̱nnikskaoʼkiaiksi Jesus oma̱nikapiimiksi itsipsta̱o̱piiyaiksi. Ki Thomas itsino̱piiwaiksi. Na̱i̱taʼpioʼkiihpiaawa omi̱i̱stsi kitsi̱mistsi. Kii Jesus sota̱mitsipiima; sota̱miksimatsimmiwaiksi. I̱i̱tsspiipoyiiwaiksi. Itani̱stsiiwaiksi, “Ki̱tohkotohpoaawa iʼta̱a̱maʼpii.”

²⁷ Ina̱i̱ʼtanistsiiwa omi̱i Thomas, “Po̱o̱hsapikinsstsaakit. Issa̱ʼtsit a̱a̱mostsi noʼtsi̱i̱stsi. Ista̱pikinsstsaakit a̱a̱mo isttsipo̱o̱htsi noosto̱mi, nitsi̱tssimokooyi. Pina̱ttsayiʼtakit. Ama̱i̱ʼtakit.”

²⁸ Sota̱maniiwa Thomas, “Kiisto̱wa kitsi̱naaimato. Kiisto̱wa a̱nnahkaoʼka nanista̱i̱nihkatawahka A̱ʼpistotooki.”

²⁹ Jesus itani̱stsiiwayi, “Ki̱mohtomaiʼtaki takaa kitsino̱o̱kssi. Ika̱kiʼtaamssi oma̱a mata̱piiwa iima̱i̱ʼtakiwa ki̱i̱wa ni̱tsayino̱yihpi.”

³⁰ O̱ki. A̱nnohka a̱a̱mo sina̱a̱kssini kita̱o̱ksstoohpoaawayi a̱nnohka ma̱tsitohkanaitsinikatoohpi Jesus otsi̱tsipisataistamatstohkihpistsi ota̱o̱hpoko̱omahsi oma̱nikapiimiksi. Ika̱kawoi ka̱taiʼtssi̱naaihpistsi.

³¹ Amo̱stsi itssi̱naihpistsi atsini̱kssiistsi, iihtssi̱naiʼpiaawa kiisṯowaawayi a̱nnaka a̱o̱kstakiwaka, ka̱a̱hkohtsitomaiʼtoahsoayi Jesus a̱nniskaoʼkinayi anna̱a̱hka A̱ʼpistotookiwa anniiska o̱mohtohkoikiihpiska, ki a̱nniskaoʼkinai annaahka A̱ʼpistotookiwa anniisk ohko̱yiska. Ikkamo̱maiʼtakiinoainiki Jesus ki̱tohkokkoaawa kaahkaissksipaitapiiʼssoaayi.