John 13 - Annaahk John Manistsitsinikatahpi Jesus Manistsipaitapiihpiai 1979

¹ O̱ki. A̱i̱tamaakitoʼtsstsiiwa amo̱ya o̱mahksiksistsikoyiia otsi̱tohkanaʼpssatoohpiaawa iihtsito̱ʼtsikamotsi̱i̱piaahpiaawa Egypt issko̱o̱htsika. Ki Jesus a̱kaissksini̱ma oka̱o̱ʼtsataʼpissi otsi̱taksiistapa̱atoohpi anno̱o ksa̱a̱hkoi, ma̱a̱hksskitapoohsi o̱nni. O̱ki. Jesus iika̱komimmiiwa otsitapi̱i̱mataiksi anno̱o ksa̱a̱hkommi, ki a̱nnimayi otsopokamomi̱mmahsaiksi iihta̱i̱stamatsiiwaiksi ota̱nisttsiihpi. A̱nnohkai a̱kohtsitsinikioʼpa.

² O̱ki. Ki a̱nnikskaoʼkiaawa anni̱i̱ksiska annaahka Jesus, a̱ota̱ksoyiiyaawa. O̱ki. Oma̱a Judas, amoohka Simon Iscariot ohko̱yi, oka̱i̱ksimssta̱ttsooka Maka̱ʼpatoʼsiiyi ma̱a̱hksisimiomatskaahsii Jesusi.

³ O̱ki. Jesus issksini̱nima otohko̱yissi o̱nni A̱ʼpistotookiiyi kana̱ʼpaisiistsi, ki issksini̱ma o̱mohtoʼtoohsi A̱ʼpistotookiiyi ki ota̱yaaksskitapoohsayi.

⁴ Ki a̱nniayii sota̱mitsipo̱aoowa otsi̱ta̱aoyihpiaawa. Osa̱o̱tatsiisokaʼsiimistsi sota̱msaoʼtsimaistsi. Sota̱moʼtakiwa inna̱i̱ʼpisstsi, iihta̱i̱ssisskiohsoʼpi ki iihtsitsi̱ʼpssiwayi.

⁵ Ki sota̱mitsapaʼsoyinnakiwa aohki̱i̱yi omi̱i ita̱i̱sapssisskiohsoʼpi. Sota̱momatapssiikaawaatsimiiwa oma̱nikapiimiksi ohka̱toawaistsi kii omi̱i otsi̱ʼpssatayi na̱i̱ʼpisstsi, a̱nniayii iihtssi̱i̱nomoyiiksi ohka̱toawaistsi omi̱i otsi̱ʼpssatayi na̱i̱ʼpisstsi.

⁶ Kii ki ai̱toʼtoowa omi̱i Simon Peter. Oso̱tamanikkayi, “Kiisto̱wa kita̱i̱naaimato. Kiistowa kita̱kohkottsaissiikaawatsimoki.”

⁷ Jesus itani̱stsiiwayi, “Kima̱tomaotsistapiʼtsiihpa nita̱waanisttsiihpi. I̱ssoohtsika kita̱kitohkottotsistapiʼtsiihpa.”

⁸ Peter itani̱i̱wa “Ki kima̱tako̱noaissiikaawaatsimokihpa.” Jesus itani̱i̱wa, “Ikka̱msaissiikaawaatsimoiniki, kima̱tamihpa amo̱ksiska iihta̱i̱sapooyikska niisto̱i̱.”

⁹ Oma̱a Simon Peter itani̱i̱wa, “Nitsi̱naaim, a̱nnohkayii sota̱mssiikaawaatsimokit. Ki mattsi̱tsstsimi̱yinnokit. Ki noʼtoka̱a̱ni.”

¹⁰ A̱a̱niiwa Jesus, “Ki oma̱a a̱kayissiistsiwa na̱i̱sopoksiksikkaʼpssiwa. A̱ksikakssiikaawaatsimawa. Kiisto̱aawa kika̱i̱ksistsikkaahkaanistotootspoaawa. Itsstsi̱wa niʼtsita̱piiwa kiisto̱aawa ma̱tsiksikkaʼpistotoawa.”

¹¹ O̱ki, a̱a̱mohka iihtani̱i̱wa oma̱a Jesus otsi̱tsi̱kayissksinoahsi anniiska ota̱ksisimiomatskaokiska. A̱nnihkayii iihtani̱i̱wa, “Itsstsi̱wa niʼtsita̱piiwa ksiisto̱aawa ma̱tsiksikkaʼpistotoawa.”

¹² O̱ki. Ki a̱i̱ʼksistssiikaawaatsimiiwaiksi, kii itsska̱aksapsskaohsatooma osa̱o̱tatsiisokaʼsimistsi, ki itsi̱tsska̱akaoʼpiiwa omii ita̱i̱so̱oyoʼpi. Ina̱i̱ʼtanistsiiwa oma̱nikapiimiksi, “Kika̱taoʼtsistapiʼtsiihpoaawa a̱a̱mohka kima̱niksistaistama̱ttsoohpoaayihka?”

¹³ O̱ki ki itso̱pooyaʼpanistsiiwaiksi ota̱nisttsiihpi. A̱a̱niiwa “O̱ki. Kita̱i̱sksanistainihkakkihpoaawa ‘a̱i̱ssksinimaatstohki’ ki ‘nitsinaaim’. Ki kitsi̱i̱ksoksinihkakkihpoaawa. A̱nniai tanista̱pssi.

¹⁴ Issa̱ʼtsik. Kita̱i̱naimakkihpoaawa, ki niisto̱wa kita̱i̱ssksinimaatsoohpoaawa. Ki kimi̱skitssiikaawaatsimohpoaawa. Ki a̱nniai kanista̱i̱stamaatsoohpoaawa kita̱koohkattssiikaawaatsimotsiiyihpooawa.

¹⁵ A̱a̱mohka kita̱i̱stama̱atsoohpoaawayihk ko̱mohtaistamaatsoohpoaawa ka̱a̱hkohtsawaisspimmohsattsiʼsoaayi

¹⁶ Kitakanistohpoaawa niitsi̱i̱yi. Omo̱a a̱ʼpaoʼtomohkiwa ma̱toʼtsitsksspssiimiwa ami̱i ota̱ʼpaoʼtomoai. Ki ama̱a otohka̱ʼtaana ma̱toʼtsitsksspssiimiwa ami̱i otsi̱i̱ʼtohkakki.

¹⁷ A̱nnoohka kika̱otsistapiʼtsiihpa amoohka kita̱i̱stamaatsoohpoayihka. Iika̱ksiʼta̱a̱maʼpiiwa kiisto̱aawa ikkama̱nistsipoʼtotoiʼtsikattsiiyinoainiki kanista̱i̱stainaatsoohpoaawayi.

¹⁸ A̱nnohka anna̱a̱hkayii itsstsi̱i̱hpa nima̱tohtaiʼpoyiihpa. Ni̱tssksinoayaawa ni̱tssiikoʼtoaiksi. Ki ina̱o̱ʼkaya̱kanistsiiwa manistsi̱kayissiinaapsskohkatoohpi naato̱i̱si̱naakiaʼtsiistsi issko̱o̱htsika. A̱kstsinaaʼnistaisiwa. Itssi̱naiʼpa ‘Annaahka ni̱tohpo̱ksoyiimookahka nitsipo̱ʼtapa̱akka.’

¹⁹ A̱nnohka kita̱a̱nistohpoaawa a̱a̱mohka a̱nnohka otsi̱tsoomaanistaisiihpi. Ki a̱nnimayii a̱nniika i̱ssoontsika aiksista̱nistsiisi ki kitsiitaʼpomaiʼtsiihpoaawa niisto̱akaoʼka anna̱a̱hka.

²⁰ O̱ki. Kita̱kanistohpoaawa niitsi̱i̱yi. Kana̱i̱tapiiksi i̱ksimatsimmiiksi nita̱ka̱niitskoaiksi nitsi̱i̱miksistaiksimatsimmokiaawa. Ki a̱a̱mokska nitsi̱i̱miiksistsiksimatsimmokiksi, annaahka nito̱ʼtsskookahka, A̱ʼpistotookiwahka a̱nniskaoʼkinai oni̱ʼtapiksimatsimmoaawayi.”

²¹ O̱ki. Jesus, ota̱i̱ʼksistanistoohsi a̱a̱mohka sota̱mstonnatsikihki̱niʼtakiwa. Ki sota̱maniiwa “O̱ki. Kita̱kanistohpoaawa niitsi̱i̱yi. Iitsspi̱i̱htsiihpa kiisto̱aawa nita̱ksisimioma̱tskaoki.”

²² O̱ki. A̱nniayii oma̱nikapiimiksi itoma̱tapahtoissammotsiiyaawa. Niita̱ʼpohtaʼpsskoohsiiyaawa taka̱a̱htaoʼtsi̱ksina̱yi.

²³ O̱ki. Jesus otsska̱a̱ʼkomimmayi oma̱nikapiimi, itapa̱pitsskaohsiiyinai.

²⁴ Ki oma̱a Simon Peter ita̱ʼpsstoyiiwa̱yi; itani̱stsiiwa̱yi “Anistsi̱sa Jesus tsika̱a̱htaoʼtsinai o̱mohtaiʼpoyihpi.”

²⁵ Kii ki ita̱akikaopiiwa sa̱a̱kiaitapapitsskaohsiwa omi̱i Jesusi. A̱a̱nistsiiwa̱yi, “Nitsi̱naaimi, taka̱a ko̱mohta̱i̱ʼpoyiihpa?”

²⁶ Jesus itanstsiiwa̱yi “Nita̱kitsapihtaki napayi̱ iihpa̱ooyoʼpi. Ki oma̱a nita̱yaakohkota̱wa, a̱nnaoʼka.” Ki a̱iʼtsapihtakiwa. Sota̱mohkotsiiwayi ami̱i Judas. A̱nniskaoʼkinai Simon Iscariot ohko̱yi.

²⁷ O̱ki. Oma̱a Judas opi̱i̱tsoohkoʼtsissi amo̱ya iihko̱tahpi, itsisto̱matsiiwa Maka̱ʼpatoʼsiwa. Otsi̱naiʼtanikka omi̱i Jesus, “Ni̱ʼtakianisttotsit.”

²⁸ O̱ki. Ma̱tsitsstsiihpa itsino̱piiwaiksi ma̱a̱hkssksinimi Jesus o̱mohtanistahpi Judas a̱a̱mohka.

²⁹ Ki anni̱i̱ksi niitsiksi̱msstaayaawa Jesus a̱a̱hkanistsiiwayi, “Mato̱o̱hpommaat a̱a̱hkohtsitohkooyoʼsi amo̱ya o̱mahksiksistsikoyia.” Ki mattsstsi̱kiiksi niitsiksi̱msstaayaawa a̱a̱hkanistsiiwa̱yi ma̱a̱hkotoohkotsiiwa ki̱mmatapssiksi. O̱mohtanistsiksimsstaahpiaawa takaa oma̱a Judas osto̱yi a̱o̱toitsikatoma otsi̱taisapinaanihpoaawayi ataksa̱a̱ksi. A̱nnihkayii iihtani̱stsiksimsstatoomiawa a̱a̱mostska.

³⁰ O̱ki. Oma̱a Judas a̱ʼohkotahsi omiihka naapayi̱nihka, sota̱msaksiwa. A̱kaikoʼkowa.

³¹ Kii ki ota̱i̱ʼsakssi Judas Jesus itani̱i̱wa “O̱ki. A̱nnohkayii nita̱ksspipoʼtookoo; niisto̱akaoʼka annaahka Mata̱piiwahka. Ki A̱ʼpistotookiwa a̱kohta̱i̱sspipoʼtoawa niisto̱yi nita̱yaakanisttsiihpi.

³² Ki a̱nnihkayii nita̱kohtsspipoʼtooka aa̱o̱ʼtootsiiniki. A̱nnohka a̱kayaakanisttotsima.

³³ O̱ki, no̱koʼsaki. Kita̱kattsiʼnaksisamohpokaʼpawaawahkaamohpoaawa, ki ta̱kitsiistapoo. Anni̱i̱hka nita̱a̱nistahpiaawa omi̱i̱ksi isto̱ʼtotamaʼpssiiksi Jews, a̱nnohkai kita̱koohkattanistohpoaawa. Kita̱kaʼpaissammokihpoaawa, ki kima̱takohkottsitoʼtoohpoaawa nita̱yaakitapoohpi.

³⁴ Ki a̱nnohka ki̱tohkotohpoaawa manoka̱kihtsimaani ka̱a̱hkanistaiʼtsissoaayi. A̱wakomimmotsiiyik. Kanista̱komimmohpoaawayi kita̱waanistohpoaawa ka̱a̱hkitotoisapakomimmotsiiyihpoaawa.

³⁵ Ikkama̱komimmotsiiyinoaainiki kana̱i̱tapiiwa a̱kohtoʼtssksinima kiisto̱aawa a̱nnikskaoʼkiaawa omi̱i̱ksiska tsi̱i̱maiʼtookiksi.”

³⁶ O̱ki. A̱nnika Simon Peter sota̱manistsiiwa Jesus, “O̱ki nitsi̱naaimi. Tsima̱a kita̱yaakitapo̱o̱hpa?” Ota̱a̱nikkayi, “Kiisto̱wa kima̱takohkottohpoʼkiiwoohpa a̱nnoohka. I̱ssoohtsika kita̱kitamitohkottohpoʼkiiwoo nita̱yaakitapoohpi.”

³⁷ Ki itani̱i̱wa Peter, “Ki, nitsi̱naaimi, nima̱ʼksaohkottohpoʼkiwoo a̱nnohka. Niisto̱wa nima̱taksstsimohtahtsowaiʼnihpa kiisto̱wa.”

³⁸ Jesus itani̱stsiiwa̱yi, “Kita̱i̱pahtaʼpssi. Kita̱kanisto niitsi̱i̱yi. Saoma̱o̱hkomisi ni̱naiʼtawa̱aki kita̱ki̱tsoohksskaanii kitsa̱i̱ʼssksinookssi.”