John 12 - Annaahk John Manistsitsinikatahpi Jesus Manistsipaitapiihpiai 1979

¹ O̱ki. Sa̱kiawa̱aaiksistsikoi o tsi̱taakoʼtsstsiihpi o̱mahksiksistsikoia otsi̱tohkanaʼpssatoohpiaawa iihtsito̱ʼtsikamotsi̱i̱piaahpiaawa Egypt issko̱o̱htsika. A̱nnika Jesus sota̱mitapoowa Bethany; a̱nnima otsi̱taopiihpiayi Lazarus. A̱nniskaoʼkinai Jesus o̱tssksipoa̱aa̱ttsaayiska.

² O̱ki. Jesus itso̱yiistotoawa. Martha a̱nnaoʼka ayi̱i̱sakiwa. Ki Lazarus itsino̱piiwa anni̱i̱ksi a̱aoyiiksi.

³ Kii, ki oma̱a Mary, sota̱moʼtakiwa niʼtsso̱koi iihta̱i̱tsiimioohsoʼpi. Niita̱ʼpanistapiiwa a̱a̱mohka iihta̱i̱tsiimiohsoʼpihka niitsi̱nihkatoohpihka nard. Sto̱nnatakaohtoohpa. Mary sota̱moʼtsima a̱a̱mohka iihta̱i̱tsiimiohsoʼpi. Sota̱mitaʼssoyinnakiwa Jesus ohka̱tsistsi, ki ina̱ʼohtsitssi̱inimaistsi oʼtoka̱a̱ni. Ki omii pisto̱o̱htsi ni̱i̱taʼpohkanaiʼtsiiyimowa.

⁴ Kii, ki oma̱a Judas Iscariot, a̱nnikskaoʼki amiiksisk Jesus oma̱nikapiimiksi. A̱nnayii a̱yaaksisimiomatskaiwa Jesusi. Osto̱yi itani̱i̱wa,

⁵ “A̱akohkottsawanisttsiiwa. A̱akohkottaʼpihkahtooma amoya iihta̱i̱tsiimiohsoʼpi. A̱kohtohkoinaaniwa niwo̱kskaikiipippoisopoksi. Ki a̱kohkottsitapomatskaiwa ami̱i̱ksi i ihta̱o̱hpommaoʼpiksi ki̱mmataʼpssiiksi.”

⁶ Judas ma̱tsiksikimmatahsinatsiiwa ki̱mmataʼpssiiksi. A̱a̱mohka iihtani̱i̱wa osto̱yi otsikamo̱ʼsiipitssi. A̱nnaoʼka a̱o̱toitsikato̱o̱ma otsi̱taisapinaanihpoaawa ataksa̱a̱ksi, ki a̱i̱kakohta̱wawattsspommoohsiwa otsi̱tsapihtakssoaawa̱i̱ksi.

⁷ Jesus sota̱maniiwa “Ma̱o̱pa̱aatsisa. Iihta̱ohksisstatooma amo̱ya iihta̱i̱tsiimiohsoʼpi niisto̱yi ma̱a̱hkohtsitohkoikissayi a̱aʼkaaksstsookooiniki.

⁸ A̱ka̱i̱sksitaisstsiihpa ki̱mmataʼpssiiksi. Niisto̱wa kima̱takaisksohpokaʼpawaawahkaamohpoaawa.”

⁹ O̱ki. Omiiksi isska̱i̱ʼtapiiyi Jews itohtsi̱matsiiwa Jesus otsi̱taʼpaitapiiʼssayi omiim Bethany. Ki sota̱mitapo̱o̱yaawa. Noohka̱ttsiksimsstayaawa ma̱a̱hkoohkattsinoahsaawa anniiska Lazarus, anniiska na̱i̱ssksipoa̱aa̱ttsaayiska. Ki a̱nnihkayi iihtsita̱pooyaawa. Ma̱tsiʼtsitaotoissammiiwaiksaawa ami̱i Jesus.

^10-11 Aka̱i̱tapiiyi Jews iihko̱i̱ssksinoyiiksi Lazarus iihtoma̱tapomaiʼtoyiiksi Jesus. Itsa̱wattohtsikiiyaawa omi̱i̱ksi otsi̱naato̱yaapiikoaamoaawaiksi. Ki a̱nniai omiiksi ni̱naato̱yaapiikoaiksi itoka̱kihtsimaayaawa ma̱a̱hkoohka̱ttsiʼnitahsaawa Lazarus.

¹² O̱ki. Ki a̱nnia mattsiksi̱stsikoyia aka̱i̱tapiiyi na̱o̱ʼtotoohkanaʼpssatoomiiksi omiia o̱mahksiksistsikoyia omiim Jerusalem. Iika̱kaitapiiyi itohtsi̱matsiiksi Jesus a̱tamaakitoʼtoowa.

¹³ Ki a̱nniayi itssi̱i̱koʼtakiiyaawa matoyo̱o̱paisskoi ki itsska̱atsiiyaawa Jesus. A̱i̱sohkawaaniiyaawa, “A̱a̱hksspimmawa A̱ʼpistotookiwa ki A̱ʼpistotookiwa a̱a̱hksspommoyiiwa o̱o̱mi ota̱ʼpaoʼtomooki. A̱nnahkaoʼka a̱kitsinawaʼsiwa kiisto̱nnooni anno̱o Israel.”

¹⁴ Jesus iihko̱o̱taʼsiwa iʼnako̱mahkstooki, ki itohki̱to̱piiwayi. A̱nniai niitsi̱kayissinaihpa naato̱i̱si̱naakssini. Itssi̱naaiʼpa,

¹⁵ “Pinikoʼpooka a̱nnaka ita̱o̱piiwaka omii aka̱i̱tapisskoi Jerusalem. O̱o̱makaoʼka kitsi̱sttsiipihkini̱naaimoaawa. Itohki̱to̱piiwa aʼsi̱miiyinai, iʼnako̱mahkstooki.”

¹⁶ A̱a̱mohka Jesus ota̱nisttsiihpi omi̱i̱ksi oma̱nikapiimiksi ma̱tsitotsistapiʼtsi̱maiksaawa. A̱nnika po̱o̱hsapoohtsika Jesus a̱aʼksinayattsaahsi a̱nnihkayii itssko̱tsistapiʼtsimiaawa ki itssksini̱miaawa omi̱i Jesus ota̱a̱nisttsiihpi a̱nnihkaoʼka anniihka itsi̱kayissiinaapsskohkatoohpihka omii nato̱isi̱naakssini. Noohka̱ttsskotsistapiʼtsimiaawa ota̱a̱nisttotomoahpiaawa Jesus.

¹⁷ Kii, ki omi̱i̱ksi mata̱piiksi itsino̱yiiksi Jesus ota̱i̱ʼnihkatahsi Lazarus, ota̱i̱ssksipoa̱aa̱ttsaahsi sota̱momatapohta̱o̱kamoʼtaniiyaawa otsini̱i̱hpoaawa yi.

¹⁸ Ki a̱nnihkayi omi̱i̱ksi aka̱i̱tapiiksi iihtsska̱aatsiiyaawa̱yi. A̱kaohtsimatoomiaawa amohka manistsi̱pisataistamatstohkihpihka.

¹⁹ Ki a̱nniayii omi̱i̱ksi Pharisees itssi̱tsipssattsii̱yaawa. A̱a̱niiyaawa, “Issa̱ʼtsika. Ma̱tsokaʼpi̱i̱wa sawa̱o̱hkottssika̱aa̱ttsaahsi Jesus. Issa̱mmokaawa. Kana̱i̱tapiiwa iihta̱i̱sapoowa Jesus.”

²⁰ O̱ki. Ki a̱nniksayii omi̱i̱ksi noohki̱i̱tsitapiiksi, ma̱tanistapssiwaiksi Jews. Itsini̱tapooyaawa Jerusalem omi̱i̱ksi a̱yaakitatsi̱moihkaaiksi anni̱i̱k a̱yaakomahksisksitsikoyik.

²¹ Kii, ki ami̱i̱ksi noohki̱i̱tsitapiiksi sota̱mitapo̱oyaawa anniiska Philip, iihto̱ʼtooyiska Bethsaida. Istaka̱i̱tapisskowa Galilee. Sota̱manistsiiyaawayi, “O̱ki. Nita̱i̱sstaahpinnaan na̱a̱hkssitsipssatahsinnaani Jesus.”

²² O̱ki. Philip ina̱i̱ʼtsitapoowa Andrew, ki itani̱stsiiwayi a̱a̱mohka. O̱ki. Ki Andrew, ki oma̱a Philip ina̱i̱ʼtsitapo̱oyaawa Jesusi. Ki itani̱stsiiyaawayi omiiksi mata̱piiksi ota̱a̱niihpi.

²³ O̱ki. Jesus itani̱i̱wa, “A̱nnohkaoʼka a̱o̱ʼtsstsiiwa nitsi̱taaksinaya̱ttsookoyi. Niisto̱akaoʼka annaahka Mata̱piiwahka.”

²⁴ Ki annaahka Jesus iihtssi̱tsipssatsiiwaiksi ota̱ksiʼnssini. Itoto̱i̱sskskanistomayi. A̱a̱niiwa “Kita̱kanistohpoaawa niitsiiyi. Amia napayi̱ninssimaani istsi̱i̱ni niʼto̱yi a̱kanistsiwa a̱kitsiʼniwa; a̱kitsitsinnisiwa ksa̱a̱hkoyi. Ki o̱o̱mi to̱kskayi innisi̱i̱yi mi̱i̱ni a̱ksistapaka̱yiinaʼsiwa. Ikka̱msawanistsiisi ma̱a̱hksinnisiʼssi a̱ksaakiaiʼtokskai.

²⁵ Ki a̱nnihkayi ko̱mohtanistohpoaawa, oma̱a mata̱piiwa ikka̱msikimiʼtsisi opa̱i̱tapiʼssini, opa̱i̱tapiʼssini a̱ko̱nooksistotsiihpa. Oma̱a mata̱piwa ikka̱msaisikimiʼtsisi a̱nnohka opa̱i̱tapiʼssini, osto̱yi a̱nnaoʼka i̱ssoohtsika a̱kitsiitaʼpipaitapiwa ita̱kaisksipaitapiiyoʼpi.

²⁶ Kii oma̱a mata̱piiwa, ikka̱mstattsiiniki na̱a̱hkaʼpaoʼtomo̱yissi, a̱kstsinaʼohtsapo̱owa niisto̱yi. Ki a̱nniai nita̱kitohpokaʼpaissiimoka omii nitsi̱takaʼpaisspi. Ki ikkama̱ʼpoʼtomootsiiniki ota̱kainaimnoka anniiska ni̱nniska A̱ʼpistotooki iyiska.

²⁷ O̱ki. A̱nnohka tsi̱i̱taʼpsstonnatsikihki̱niʼtaki. Ki tsa̱ ta̱kanistanii. Ma̱takohkottanistawa ni̱nna ‘O̱ki ni̱nna, tsikamotsi̱i̱piookit a̱a̱mohka a̱yaakanistsiiyihka.’ Takaa a̱a̱mohka a̱yaakanistsiiyihka a̱a̱mohkaoʼka no̱mohtsitoʼto̱owa anno̱o ksa̱a̱hkommi.”

²⁸ Ki itani̱i̱wa, “A̱yo ni̱nna. A̱nnohka noohka̱i̱stamatstohkit kani̱stsspsspi.” O̱ki. A̱nnikayii A̱ʼpistotookiwa itsito̱o̱htoawa isspo̱o̱htsi o̱mohtsinniʼpoyʼssi. A̱a̱niiwa, “Nika̱waistamatstohkatoohpa, ki nita̱kattsistaistamatstohkatoohpa.”

²⁹ Ki amo̱ksi ito̱ʼtsipoyiiksi na̱yoohtsimiaawa a̱a̱mohka. Anni̱i̱ksi a̱a̱niiyaawa a̱a̱hkohkomiwa ksistsiko̱ma. Ki istsi̱kiiksi a̱a̱niiyaawa, “Jesus ma̱a̱hkssitsipssakka natoyi̱i̱tapiiyi.”

³⁰ Jesus itani̱i̱wa “A̱a̱mohka nita̱yoohtsiihpa ki niisto̱wa ma̱tohtohtakowa. Kiisto̱aawa a̱nnikskaoʼkiaawa o̱mohtsainnoohtakohpi ka̱a̱hkoohtsissoaayi.

³¹ A̱nnohka a̱kokakihtsimatayi anno̱ksi istsitapi̱i̱ksi anno̱o ksa̱a̱hkommi. Ki a̱nnohka annaahka istsi̱nawahka ksa̱a̱hkommi, Maka̱ʼpatoʼsiwahka, a̱yaakomo̱oʼtsaawa.

³² Ki niisto̱wa nita̱kohtsspipoʼtookoo ksa̱a̱hkommi, ki a̱nnihkayi nanista̱komaiʼtakiattsaahpi a̱yaakomaiʼtakiiksi.”

³³ A̱nniayii a̱a̱niiwa Jesus; Iihta̱i̱ʼpoyiiwa manista̱aksiʼnihpi.

³⁴ O̱ki. Omi̱i̱ksi mata̱piiksi itani̱stsiiyaawa Jesus, “Nitsi̱toohtsiihpinnaana omi̱i̱stsi nato̱i̱si̱naakssiistsi otsi̱tssi̱naissaawa ota̱akaisksipaitapiiʼsayi Aʼpistotookiwa anniiska o̱mohtakohkoikiihpiska. Ki kiisto̱wa kita̱waanikkihpinnaan kiisto̱wa a̱nnahkaoʼka annaahka Mata̱piiwahka, ki kita̱waanii kita̱ksstsinaiʼsspipoʼtookoowa. O̱ki, tsa̱a kanista̱pawaaniihpa a̱a̱mohka kiisto̱wa a̱nnahkaoʼka annaahka Mata̱piiwahka?”

³⁵ Jesus itani̱stsiiwaiksi, “O̱ki. Niisto̱wa a̱nnahkaoʼka annaahka ksistsiko̱i̱nattsi iihto̱ʼtsstsiiwahka ka̱a̱hkohtsa̱pawaawahkaahpoaawa. Nita̱kattsiʼnaksisamiitsspiaʼpawaawahkaa kiisto̱aawa. Ista̱ʼpawaawahkaak ksistskio̱i̱nattsi annoohk otsi̱tsaakitaisstsissi anno̱ma. Ka̱a̱hkitsistapa̱atoohpoaawa isski̱inattsi. O̱mi̱i̱ks iita̱ʼpawaawahkaaiksi isski̱iʼnattsi ma̱takohkottsini̱maiksaawa ota̱yaakitapo̱o̱hpoaayi.

³⁶ A̱nnohka niisto̱wa, ni̱tsaakiitaʼpawaawahkaa anno̱ma ka̱a̱hkitaistamattsoohsoayi annihka ksistsiko̱i̱nattsi.” Ama̱i̱ʼtookik. Ki anniayi kita̱kitoʼtsspoaawa ksistsikoinattsi. A̱nniayii a̱a̱niiwa Jesus. Kii, ki sotamistapa̱aatsiiwa omiiksi mata̱piiksi a̱a̱hkitsaohkoonoahsi.

³⁷ Oki. Oma̱tomaiʼto̱o̱ka amo̱o̱ksi o̱tapiʼsini, ki̱i̱wa ota̱a̱kawohpi otsipisa̱taistamatstohkssiistsi. A̱nniayii Isaiah niitsi̱kayissiinaapaniiwa manista̱kaʼpiihpii.

³⁸ Ki nito̱o̱hkanistaya̱akanistsiwa. Na̱i̱si̱naima Isaiah, “Ha̱yo kitsi̱naaiminnooni. Ma̱tsitsstsiihpa iima̱i̱ʼtsimi a̱a̱nisttspi. Ma̱tsitsstsi̱i̱hpa na̱o̱tsistapiʼtsimi kitsi̱naiminnooni otsska̱i̱pisatanisttsiihpistsi.”

³⁹ Ki a̱nnihkayii iihtsawa̱o̱hkottomaiʼtakiaawa takaa ma̱ttsitsikayissiinaapaniiwa Isaiah,

⁴⁰ “Niʼto̱i niitsiiwa A̱ʼpistotookiwa na̱oʼtomoyiiwaiksi otsa̱a̱pssoaawayi; a̱nniayi niitani̱sttotoyiiwaiksi maahksawaotsistapiʼtakssaiksi. A̱a̱mohkayi niitani̱sttotoyiiwaiksi ma̱a̱hkitsaiksiwa̱atoohsaawa otoka̱ʼpipaitapiʼssini ma̱a̱hkitsaomaiʼtoahsaawa A̱ʼpistotookiiyi a̱a̱hkitsaohkottsipomikksipoʼtoahsaawa.”

⁴¹ A̱nniai a̱a̱niiwa Isaiah. Iihtani̱stoomayi otsi̱kayissinissi Jesus mani̱stsspsspiai. Ki a̱nnihkayii iihtani̱stsi̱kayissohtsi̱ʼpoyiiwa anniiska Jesus.

⁴² O̱ki. Ki a̱nnihkayii isskohta̱a̱kaitapiiyi omi̱i̱ksi oʼtota̱maʼpssiiksi na̱o̱maiʼtoyiiksi Jesus. Kii sota̱msstonnoyiiyaawa omiiksi Pharisees. Ki a̱nnihkayii iihtsawa̱i̱sska̱akaniiyaawa ota̱o̱maiʼtakssaawa. Ma̱taissta̱a̱waiksaawa a̱a̱hkohtsaisskoahsaawa otsi̱tawaatsi̱moihkaahpoaayi.

⁴³ Ami̱i̱ksi mata̱piiksi ma̱takitotosttowaiksi ota̱omaiʼtakssoayi, takaa iiko̱maohtaʼpitsiihtaayaawa o̱tapiʼssini ma̱a̱hksokimmi̱yissaawa. Ma̱tohtaʼpitsiihtaawaiksi A̱ʼpistotookiiyi ma̱a̱hksokimmi̱yissoaayi.

⁴⁴ O̱ki. Jesus na̱i̱sohkawaaniiwa “O̱ki. Oma̱a mata̱piiwa ikkamo̱maiʼtootsiiniki, anni̱i̱ska nito̱ʼtsskookiska, a̱nniskaoʼkinai oni̱i̱taʼpomaiʼtoai.

⁴⁵ Ki oma̱a mata̱piiwa, ikka̱msammotsiiniki, ani̱i̱ska nito̱ʼtsskookiska, a̱nniskaoʼkini ota̱kitsiitaʼpinoayiska.

⁴⁶ Niisto̱wa anno̱o ksa̱a̱hkommi no̱mohtsitoʼto̱o na̱a̱hkohkotahsi mata̱piiksi ma̱a̱hkitaʼpawaawahkaahsaa ksiistsiko̱i̱nattsi. Ni̱tohkanaomaiʼtookiiksi ma̱takattsitaʼpawaawahka̱a̱waiksi isski̱inattsi.

⁴⁷ O̱ki. Oma̱a ayo̱o̱htsima nita̱a̱niihpistsi, ikka̱msawanistai̱ʼtsisaistsi, niisto̱wa nima̱tohtaokakihtsimatawa opahtsa̱ʼpssini. Nima̱tsitohtsitoʼtoohpa anno̱o ksa̱a̱hkommi na̱a̱hkitokakihtsimatahsi mata̱piiksi. No̱mohtsitoʼtoo na̱a̱hksikamotsi̱i̱piahsaawa.

⁴⁸ Kii omi̱i̱ksi ni̱tsstsimimmokiiksi ka̱taoʼtsimiksi nita̱a̱niihpistsi, iitsstsi̱i̱ihpa a̱kohpokakihtsimatayaawa. Nita̱a̱niihpistsi, a̱nnihkaoʼka a̱kohpokakihtsimatayaawa aa̱o̱ʼtsstsiisi saako̱o̱yiiksistsikoi.

⁴⁹ Takaa niisto̱wa nima̱tawattsiʼpoyiihpa. Annaahka nito̱ʼtsskookahka ni̱nnahka nita̱a̱nikka na̱a̱hkstsinaaʼnistsiʼpoyissi.

⁵⁰ Ki ni̱tssksiniihpa A̱ʼpistotookiwa otoka̱kihtsimaani a̱nnihkaoʼk iihto̱ʼtsstsiiwa a̱i̱sksipaitapiiʼssini. Kii, ki a̱nnohkayii amo̱stsi nita̱a̱niihpistsi, a̱nnistskaoʼkiaawa ni̱nna nita̱a̱ni̱yihpistsi na̱a̱hkanistoohsaawa.”