John 11 - Annaahk John Manistsitsinikatahpi Jesus Manistsipaitapiihpiai 1979

¹ O̱ki. Oma̱a ni̱naawa, a̱a̱nistawa Lazarus. A̱i̱sttsiistomiwa. Ita̱o̱piiwa omiim aka̱i̱tapisskoi Bethany. A̱nnima otsi̱taopiihpiaawa oma̱a Mary, ki omi̱i o̱nsstsi, Martha.

² Mary, a̱nnahkaoʼka annaahka itsitsi̱yimioʼtooma Jesus ohka̱tsistsi. Ki iina̱ʼohtsitssiinimaaistsi oʼtoka̱a̱ni. Osto̱yi o̱mohpapiʼihpayi omii a̱i̱sttsiistomiyi Lazarusi.

³ O̱ki. Ki omi̱i̱ksi Lazarus o̱takiimiksi, itapo̱ʼtahkaaʼtaayaawa ami̱i Jesus ma̱a̱hkanistahsaawayi, “O̱ki nitsi̱naaimi. Anna̱a̱hka kita̱kkaawahka, i̱i̱kskaʼyiksisttsiistomiwa.”

⁴ Ki Jesus ota̱ʼyoohtsissi itani̱i̱wa “Aiʼksista̱aʼpaisttsiistomisi a̱kitsakia̱i̱paitapiiwa. A̱a̱mohka iihtani̱stsiiwa A̱ʼpistotookiwa a̱a̱hkohtsspipoʼtoawa. Ki niisto̱wa, ohko̱yi, nita̱kohtsspipoʼtookoowa.”

⁵ O̱ki. Ki Jesus iika̱komimmiiwa Martha, ki ohsi̱si ki oyi̱nnaawayi, Lazarusi.

⁶ Ki ota̱ʼohtsimatahsi omii Lazarus ota̱i̱sttsiistomssayi itsitsi̱kippitoohkimaawa na̱toʼkiiksistsikoi.

⁷ Ki a̱nnii, ki a̱ikkaiʼwanistsiiwa oma̱nikapiimiksi, “A̱a̱hkonsskitapaaoʼpa Judea.”

⁸ Ki ota̱a̱nikkaiksi, “A̱i̱ssksinimaatstohki, o̱o̱miksi isto̱ʼtotamaʼpssiiksi Jews kima̱nssakohtoohsi̱nookiaawa o̱o̱hkotoki. A̱nnohka kika̱taʼyaaksskitapoohpa?”

⁹ Jesus issksini̱ma ma̱takattsisamitaʼpaissi anno̱o, ki a̱nnihkayii iihtoto̱i̱sskskanistsiiwaiksi, “Ki̱tssksiniihpoaawa amo̱ya niʼtsiksi̱stsikoyi kaki̱tsstsiiwa na̱tsikopotooʼtakoohsini. Oma̱a mata̱piiwa ikkami̱taʼpawaawahkaasi ksistsiko̱yi a̱kohkottsinima o̱mohtoʼtsiistapiksistsikoinattspi anno̱o ksa̱a̱hkommi, ki a̱nniayi a̱kitsawaisto̱kaʼsiwa.

¹⁰ Ki noohki̱i̱tsiwa koʼko̱yi. A̱kitsisto̱kaʼsiwa. Ma̱tsitaʼpawaawahkaawa ksistsiko̱i̱nattsi.”

¹¹ A̱nniai a̱a̱niiwa Jesus. Ki ina̱i̱ʼtanistsiiwaiksi, “Oki, kita̱kka̱annoona Lazarus, a̱kayoʼkaawa. Ki nita̱kitapoo. Ta̱kitsiksikiinawa.”

¹² Otsi̱tanikka omi̱i̱ksi oma̱nikapiimiksi, “Nitsi̱naimi, ikkama̱yoʼkaasi a̱ksokaʼpssiwa.”

¹³ Oma̱a Jesus niitapa̱waaniiwa otsi̱kaiʼnssayi Lazarus. Oma̱nikapiimiksi niitapo̱tsistapiʼtoyiiyaawayi a̱a̱hkawaniiyinayi a̱kayoʼkaawa Lazarus. A̱nniai niitsi̱pahtsootsistapiʼtoyiiyaawayi.

¹⁴ Jesus na̱i̱sopoyaʼpawaanistsiiwaiksi, “A̱kaiʼniwa Lazarus.”

¹⁵ Ki itani̱i̱wa, “No̱mohtsiksimatsiʼtaki nitsaitapo̱o̱hsi osto̱yi otsi̱tsaomaiʼnihpi. Kiisto̱aawa a̱nniksaoʼkiaawa no̱mohtsiksimatsiʼtaki. Takaa Kita̱ksistapo̱maomaiʼtakihpoaawa. Oki̱h. A̱a̱hkonaʼpaya̱a̱kitapaaoʼpa Lazarus.”

¹⁶ Ki Thomas (a̱nnahkaoʼka annaahka ma̱ttanistawahka “Niistsi̱mi”) a̱a̱nistsiwa anniiksi Jesus ono̱o̱hkattanikapiimiksi, “Oki̱h. A̱akohpoʼkiwaaoʼpa anna̱a Jesus. A̱akohpoksiʼniimawa.”

¹⁷ O̱ki. Ki o̱o̱maoʼka Jesus a̱kaya̱akitoʼtoowa omiim Bethany. Sota̱mohkoissksinima Lazarus a̱kaiksista̱aksstsaawa amo̱i̱stsi niiso̱iksistsikoistsi.

¹⁸ O̱ki. A̱nnima aka̱i̱tapisskoi, Bethany, ma̱tsipisstsiiwa Jerusalem. Kakisto̱ʼkia̱aʼsi.

¹⁹ Ki a̱nniksayii itaka̱i̱tapiiyi omi̱i̱ksi isto̱ʼtotamaʼpssiiksi Jews. I̱kayistapitoʼto̱oyaawa. Ita̱a̱piiwanistotoyiiyaawa ami̱i̱ksi Martha ki Mary, ostsi̱ʼnssayi o̱mohpapiʼihpoaawayi.

²⁰ Kii ki oma̱a Martha sota̱mohtsimatsiiwa Jesus ota̱waisto̱o̱hsayi ki itsska̱aatsiiwayi. Ki oma̱a Marywa sa̱akiitsipsta̱o̱piiwa omii oko̱aawayi.

²¹ Martha sota̱manistsiiwa Jesus, “Nitsi̱naaimi! Kitsi̱i̱kaaʼpoʼtoohtopi. A̱nnoohka ma̱taksiʼni̱wa no̱mohpapiʼihpa.

²² Ki ni̱tssksiniihpa a̱nnohka kita̱a̱nistahpi A̱ʼpistotookiwa kita̱kanisttotomooka.”

²³ Ki itani̱i̱wa Jesus, “A̱kssksipoaawa ko̱mohpapiʼihpa.”

²⁴ Sota̱maniiwa Martha, “A̱a, ni̱tssksiniihpa aa̱o̱ʼtsstsiisi sako̱o̱yiksistsikoi a̱kitssksipoaawa, anni̱i̱ka otsi̱taakssksipoaaohpoaayi iiʼni̱i̱ksi.”

²⁵ Jesus sota̱manistsiiwayi, “Ki niisto̱ahkaoʼka o̱mohtoʼtsstsiihpi issksipoa̱aohsini, ki niipa̱i̱tapiiʼssini. Nita̱o̱maiʼtookiiksi iimaksi̱kaiʼniisaawa a̱ksakiipaitapiiyaawa.

²⁶ Ki kana̱i̱paitapiiksi nita̱o̱maiʼtookiiksi ma̱takonoaitaʼpohkoiʼniiwaiksi. Kika̱taoʼmaiʼtsiihpaatsi?”

²⁷ Itani̱i̱wa, “A̱a, nitsi̱naaimi. Nika̱o̱maiʼtsiihpa kiisto̱wa kita̱mssi A̱ʼpistotookiwa anniiska o̱mohtakohkoikiihpiska ma̱a̱hksikamotsi̱i̱piookssi. Kiisto̱wa a̱nniskaoʼkinayi A̱ʼpistotookiwa ohko̱yi, anniiska a̱yaakitoʼtooyiska anno̱o ksa̱a̱hkommi.”

²⁸ O̱ki. Oma̱a Martha ota̱i̱ʼksistanistoohsi a̱a̱mohka sta̱miistapa̱atsiiwa Jesus. Sota̱motoinihkatsiiwa ohsi̱si. Sota̱misimiaanistsiiwayi, “A̱kaoʼtoowa annaahka a̱i̱ssksinimaatsookiwahka. Ki kita̱waanikka.”

²⁹ O̱ki. Oma̱a Mary ota̱ʼyoohtsissi sota̱mohpiipoomatapitapoowa Jesusi.

³⁰ O̱ki. Jesus ma̱tomaoʼtsstsisoowaatsi. Sa̱a̱kiitsaʼkapaipoyiwa o̱o̱mi otsitoʼtaatsiimayihpi Martha.

³¹ O̱ki. Omi̱i̱ksi isto̱ʼtotamaʼpssiiksi Jews itohpo̱ksi̱pstaopiimiiyaawa omi̱i Mary omii na̱apiooyisi. A̱wa̱a̱piiwanistotoyiiyaawayi. Na̱i̱noyiiyaawayi otsi̱kkamipoomatapoohsayi, i̱sakssayi. Ki sota̱mohpoʼkiomatapooyaawa. Niitsiksi̱msstatsiiyaawa Mary a̱a̱hkayaakitapoowa omiim Lazarus itsstsa̱a̱hpi ma̱a̱hkito̱yimmahsayi.

³² Kii, ki o̱o̱maoʼka oma̱a Mary. Sota̱mitoʼtoowa otsi̱tsipoyihpiayi Jesus. Sota̱minoyiiwayi. Sota̱mitoʼtsissopisttoksisanohpaʼwaaniwa. Itani̱i̱wa, “Nitsi̱naaimi! Kitsi̱i̱kaaʼpoʼtoohtopi. A̱nnoohka no̱mohpapiʼihpa mata̱ksiʼniwa.”

³³ O̱ki. Jesus itsino̱yiiwa Mary otsohkawa̱a̱sanssayi, ki niʼto̱yi omiiksi isto̱ʼtamaʼpssiiksi Jews iihpo̱ʼkioʼto̱oiksi. A̱i̱sohkawa̱a̱saniyaawa. Ki Jesus sota̱mitohkooniʼtsiihtaawa. Niita̱ʼpohtsawaahsiʼtakiwa.

³⁴ Ki itani̱i̱wa “Tsima̱a kitsi̱tota̱aksstsaawaawaatsi?” Ita̱nistawa, “Oki̱h nitsi̱naaimi. Kita̱kitapipio.”

³⁵ Jesus sota̱masai̱ʼniwa.

³⁶ Omi̱i̱ksi isto̱ʼtotamaʼpssiiksi Jews itani̱i̱yaawa, “Issa̱ʼtsik. Niita̱ʼpakomimmiiwa Lazarus.”

³⁷ Ki anni̱i̱ksi mattstsi̱kiiksi itani̱i̱yaawa, “Osto̱yi iihkotsi̱i̱wa anni̱i̱skayi na̱a̱psstsiiyi otsa̱a̱pssini. Ma̱ʼksaitoʼtoowa Lazarus otsi̱tsaomaiʼnihpi ma̱a̱hkohtsayi̱nssi Lazarus?”

³⁸ O̱ki. Jesus sota̱mitoʼtoowa omii Lazarus itsstsa̱a̱hpi. Ma̱ttsi̱tsiita̱akohkooniʼtsiihtaawa. Lazarus itsi̱pstsstsaawa omi̱i̱hkayii a̱tanihkaawa. Iihtso̱ʼkiihpa o̱mahkoohkotoki.

³⁹ Sota̱maniiwa Jesus, “Anista̱pipoʼtooka o̱o̱ma o̱mahkoohkotooka.” Oma̱a Martha, a̱nniaoʼkinayi anni̱iska o̱mohpapiʼihpiska iʼni̱i̱yiska; itani̱stsiiwa omii Jesus, “Ni tsi̱naaimi. Amo̱stsi niiso̱i̱ksistsikoistsi a̱kaanistaisama̱aksstsaawa. A̱kaoksimimma.”

⁴⁰ Jesus itani̱stsiiwayi, “Kika̱wanisto, ikkamo̱maiʼtakiiniki kita̱kitaistama̱atsookoo A̱ʼpistotookiwa mani̱stsspsspi.”

⁴¹ Ki a̱nniayi omi̱i o̱mahkoohkotoki sota̱manistapipoʼtoa̱wa. Jesus itsspssa̱piwa ki itani̱i̱wa, “A̱yo Ninna̱. Ko̱mohtsiksimatsimmo kita̱yisstsiwokssi.

⁴² Nisto̱wa ni̱tssksiniihpa kita̱i̱ssksayisstsiwokssi. A̱a̱mohka ko̱mohtanisto a̱a̱moksi na̱o̱ʼtsipoyiiksi mata̱piiksi ma̱a̱hkitoohtsissaawa, ma̱a̱hkohtsitomatapomaiʼtsissaawa kiisto̱wa kito̱ʼtsskokssi.”

⁴³ O̱ki. Ota̱i̱ksistanistoohsi a̱a̱mohka itsohka̱waaniiwa “Lazarus. Po̱o̱hsapsaksit!”

⁴⁴ Ki oma̱a a̱kaiʼniwa, sota̱mipoohsapsaksiwa. Oʼtsi̱stsi ki ohka̱tsistsi iihtayi̱pistoohpiaawa na̱i̱ʼpisstsii iʼni̱i̱ksi iihtawa̱yipistahpiaawa. Ki ostoksi̱ssi iihtayi̱pistoohpa na̱i̱ʼpisstsisttsoomokaani. Sota̱maniiwa Jesus, “Apiso̱o̱moonoka. Istsipo̱ʼtooka.”

⁴⁵ O̱ki. Omi̱i̱ksi isto̱ʼtotamaʼpssiiksi Jews na̱o̱tooksisawaatsiiksi omi̱i Mary na̱i̱nimiaawa Jesus ota̱nisttsiihpi. Itsi̱tsspiakaitapiiyi iimata̱pomaiʼtoyiiksi Jesus.

⁴⁶ Ki anni̱i̱ksi mattstsi̱ksiiksi sota̱mitapo̱o̱yaawa omiiksi Pharisees, ki itso̱poatomoyiiyaawa Jesus ota̱nisttsiihpi.

⁴⁷ Ki a̱nniayii omi̱i̱ksi ni̱naato̱yaapiikoaiksi ki Pharisees itomo̱wooyaawa. A̱nnikskaoʼkiaawa a̱o̱kakihtsimaaiksi. Kii, ki a̱a̱niiyaawa “A̱nnohka oma̱ahka mata̱piwahka a̱i̱pisataistamatstohkiwa, kii kiisto̱nnoona annohka ma̱taissika̱aa̱ttsaawaatsi.

⁴⁸ A̱kstsinaiʼssika̱aa̱ttsaawa. Kana̱i̱tapiiyi ota̱komaiʼtooka ma̱a̱hkitsinawaʼsattsi̱yissaiksi. Ki a̱nnimayi a̱kitsawaahsiʼtakiiyi omiiksi Romans a̱o̱kakihtsimaaiksi. A̱kitaistskoyiiyaawa otawa̱wahkaoʼtsiimoaawaiksi. A̱kitoksistotsimiaawa kito̱mahkitawaatsi̱moihkaaoʼpinnooni, ki a̱kitsiʼnitsiiyaawa anno̱ma mata̱piiyima.”

⁴⁹ O̱ki. Ki a̱a̱mayii itsino̱piwa omi̱i̱ksi iihkani̱ta̱opiiksi ni̱naaiksi. A̱a̱nistawa Caiaphas. A̱nnaoʼka itsspato̱yaapiikoanaʼsiwa a̱nniihka isstoyi̱i̱yihka. Itani̱stsiiwa a̱a̱moksi noohka̱ttsinaaiksi, “O̱ki. Kiisto̱aawa ma̱tsikakitsstsiihpa ki̱tssksiniihpoaayi.

⁵⁰ Kima̱tsikakohkoissksiniihpoaawa i̱i̱ksokaʼpiiwa oma̱a niʼtsita̱piiwa ma̱a̱hkohtsiʼnssi mata̱piiyi kana̱i̱tapiiwa anno̱ awahsi̱ni a̱a̱hkohtsaiʼnitayaawa.”

⁵¹ O̱ki. A̱a̱mohka ota̱a̱niihpihka ma̱tawattanistoomaatsi. Osto̱yi itsspato̱yaapiikoanaʼsiwa annihka isstoyi̱i̱yihka, ki a̱nniayii A̱ʼpistotookiwa iihtohko̱i̱kiwayi a̱moohka ma̱a̱hkanissi. A̱ʼpistotookiwa iihtohko̱i̱kiwayi ma̱a̱hksi̱kayissanissi omi̱i Jesus ota̱kohtahtsawaiʼnssayi omi̱i̱ksi istsitapi̱i̱ksi a̱nnima awahsi̱ni Israel.

⁵² Ki a̱a̱mohka ma̱tsiʼtanistapanoʼsina istsitapi̱i̱ksi ota̱wahsini; Anista̱panioʼsina omi̱i̱ksi A̱ʼpistotookiwa o̱tohkanaokoʼsataiks omii kana̱o̱miaʼnistssksaahkoistsi. A̱kohtomoa̱aa̱ttsaayaawa Jesus otsi̱nssini.

⁵³ O̱ki. Ki a̱nnihkayii ksistsiko̱yihka omi̱i̱ksi ni̱naaiksi itoma̱tapohkanaokakihtsimaayaawa ma̱a̱hksiʼnitahsaawa Jesus.

⁵⁴ Ki a̱nnihkayii Jesus ma̱tattsitaʼpawaawahkaawaatsi otsi̱takaitapisskohpi amiim otsi̱taʼpaitapiihpi Judea. Sota̱msaoʼkiaʼpawaawahkaawa. O̱o̱mi itapo̱owa o̱o̱mi aka̱i̱tapisskoi, Ephraim. A̱nnimaoʼka otsi̱tomatapsstsiihpi isspahko̱i̱stsi. Sota̱mitohpokaʼpaissiimiiwa oma̱nikapiimiksi.

⁵⁵ O̱ki. A̱nnihkayi a̱yakitoʼtsstsiiwa omiihka Jews oto̱mahksiksistsikomssoaayihka otsi̱tohkanapssatoohpiaawa iihtsito̱ʼtsikamotsi̱i̱piahpiaawa Egypt issko̱o̱htsika. Ki a̱nniai iihtsita̱kaitapiiyi omi̱i̱ksi itsa̱ʼkapopiiksi Jerusalem ota̱i̱tapamisoohpoaawayi. A̱yaakitanisttotsimiaawa amo̱stska natoa̱ʼpssistska. Iihta̱i̱ksikkaahkanisttotoayaawaists a̱nnihka otsi̱tsaomaoʼtsstsiihpihka omiihka o̱mahksiksistsikoyihka.

⁵⁶ Ki a̱nniayii a̱nniksayii a̱ʼpaissammiiyaawa Jesus. Ki o̱o̱mikskaoʼkiaawa ita̱o̱hkanipoyiiyaawa Ita̱i̱sitsipssattsiiyaawa. Itawa̱a̱niiyaawa, “O̱ki, tsa̱ kanistsi̱ksimsstaahpoaawa? A̱a̱hksta̱akoʼto̱o̱wahtaoʼtsiksi Jesus a̱nnom annoohka a̱yaakomahksistsikoyihka.”

⁵⁷ Ki omiiksi ni̱naato̱yaapiikoaiksi kii Pharisees a̱kaokakohtomoyiiyaawa o̱tapiʼsini ma̱a̱hkitsopoatomoahsaawa ikkami̱noasaawa Jesus. A̱yaaksinniiyaawayi.