Zɛnɛse 14 - Yálá laawoo hɛɓɛ

Abramə da Mɛlkisedɛkə

¹ Mąą kwɛlan tii hu, Sinearə tɔɔmun Amrafɛlə, da Ɛlasarə tɔɔmun Ariɔkə ə mą kɛ, Elamə tɔɔmun Kedɔrlaomɛrə da Goimə tɔɔmun Tidealə,

² di kɔ́ pɛlɛ Sodomə tɔɔmun Bera ɓa, da Gomorə tɔɔmun Birsa, ə mą kɛ, Adma tɔɔmun Sineavə, da Sevoimə tɔɔmun Sɛmevɛrə, ɛlɛɛ, Bera yai da kɛ mą Soarə nwɔ tɔɔmun.

³ Di di ŋąąkpɔn Sidimə nɛ̨ŋɛ̨ lɔi hu, gboloyá kwɛlɛ.

⁴ Kwɛlan bow kɔ́w hveelɛ kuu mu, di kɛ Kedɔrlaomɛrə yee mu. Kɛlaa, gwɛlan bow kɔ́w haaɓa lɔwai, di di kwɛli tee.

⁵ Gwɛlan bow kɔ́w nąąn nɔwai, Kedɔrlaomɛrə da dɔɔɓɛlaai ŋɛ̨i kɛ di tɔɔ, di di ŋąąkpɔn, di kɔ́ pɛlɛ Refaitə ɓa, di yee ə tɛɛ mą Astarotə-Karnaimə, di yee ə tɛɛ Ɉuzə nuą diɛ Hamə, di yee ə tɛɛ Emi nuą diɛ Kiriataimə nɛ̨ŋɛ̨ lɔi hu.

⁶ Yii ɓaa Hori nuą di wɛi, di yee ə tɛɛ diɛ di pɔ taai, Seirə ɲeeɠaa ɓa, di lɛɛ di pulu də li Eilə-Paran ɲɛ̨ą lɔi kwɛlɛ.

⁷ Yili pulu, di pənə di pa Ein-Mispatə, naa takpɛli ɓaa: Kadɛsə. Di Amalɛkə nuą pɔɔli kala, di Amɔrə nuą kɛlɛ, diɛi di kaa heeni kɛ Hasasɔn-Tamarə lɔi hu.

⁸ Dɔɔɓɛlaai ŋɛ̨i kɛ Sodomə daai, Gomorə daai, Adma daai da Sevoimə daai, da Bera daai, naa takpɛli ɓaa: Soarə. Di di wɔ kɔlaɠaɠaai ŋąąkpɔn, di pɛlɛ di kee ɓa Sidimə nɛ̨ŋɛ̨ lɔi hu,

⁹ da dɔɔɓɛlaaɠaai ŋɛ̨i kɛ Kedɔrlaomɛrə pului: Daɠaa di həɠə, Goimə, Sinearə, Ɛlasarə. Tɔɔɓɛlaa lɔɔli di kɔ́ pɛlɛ tɔɔɓɛlaa nąąn ma.

¹⁰ Ləɠi-pɔlɔ kulɔ lɔwa kpɛa kpɛa tamąą di kɛ Sidimə nɛ̨ŋɛ̨ lɔi hu. Sodomə da Gomorə tɔɔɓɛlaa di pu, di daɠaa paa, yiiɠaai lɛɛ də li, di di mąąkilɛ ɲeeɠaa ɓa.

¹¹ Nuąi tii di yee tɛɛ mąą laa kɛ, di Gomorə taa da Sodomə taa di wɔ hɛn gɔwɠaai kəlee həɠə, ə mą kɛ kɔ̨nɔ̨n kɛ laa di yəi, di li la.

¹² Abramə mąnįn Lɔtə ə kɛ Sodomə daai, di kəlee di lɛɛ a kɔ-hon, da ɲəi hɛnŋąą kəlee.

¹³ Nu ta ə kɛi pu gɔi tii ɓa, ə pa ə nwoo hukulɔ Abramə ɓa, Abramə ŋɛ̨i a Hebreu, yai kɛ heeni Mamre nwɛla koo ɓa Amɔrə lɔi hu. Mamre ə kɛ a Ɛskɔlə da Anɛrə di kaayɔwɔ, nu haaɓai tii da Abramə ni di tɔɔi kɛ.

¹⁴ Yii kɛa Abramə ə mɛ̨n diɛ mą daa mąnįn ɉon a kɔluwɔ, Abramə ə ɲee pɔ nuą ŋąąkpɔn, hinąą nwun-ɉaaɓa nu pow kɔ́w mɛ̨ihaaɓa, diɛi kɛ ɲəi bɛlɛ́n, di hvilɛn di yowoɠaa pulu, di li kpɔ di həli Dan daai.

¹⁵ Abramə ə nwɔ nuą ŋąą kwɛlɛ a kpulu heei tamąą, di pɛlɛ di yowoɠaa diɛ a kpinį. Di dɔɔɓɛlaa paa, di hvilɛn nu kpəliɠaa pulu, di lɛɛ di pulu, ə lɛɛla ɉu di li Hova daai yii gaa Damasə taa ɲánwuɔ̨ pələ.

¹⁶ Ɉɛnŋąąi kpɔ ti di yowoɠaa di ɉəɠə, di gəlee həɠə, ə mą kɛ Lɔtə yai kɛ a Abramə mąnįn, da ɲəi hɛnŋąą kəlee, ɉinąą da nɛ̨ąąi kpɔ di di hon a kɔluwɔɠaa, di pa a gəlee.

¹⁷ Ɓɛlɔwai Abramə ə yeetɛɛmąą kɛ la Kedɔrlaomɛrə da nwɔ tɔɔ ɓɛlaai di mɛ̨i, Sodomə tɔɔmun ə pa ə Abramə laakwiɛn Save nɛ̨ŋɛ̨ lɔi hu, yii jukulaa ɓaa: Tɔɔmun nwɔ nɛ̨ŋɛ̨ lɔi.

¹⁸ Mɛlkisedɛkə ŋɛ̨i kɛ a Salɛmə tɔɔmun, yaai kɛ a Huwalawala Kəlee Nąmu Yálá nwɔ haláá laa həli mun gɛnɛ̨, ə pa a lopɛ̨i da lɔɔ.

¹⁹ Ə lúwɔ́ too Abramə ɓa, yɛ mą: «Huwalawala Kəlee Nąmu Yálá, yai yələkɔlɔn da lɔi di pɛli, ə lúwɔ́ too yɛ́.

²⁰ Mąąwiɛ ə kɛ Huwalawala Kəlee Nąmu Yálá ɓa, yai ə́ yowo nwɔ huwalawala too ə́ kɔ́wɔ mu!» Abramə ə nɛɛ mą, ɉɛn ə ɉɔlɔɓo laa, ə bow nąą tɛɛ Mɛlkisedɛkə pɔ.

²¹ Sodomə tɔɔmun yɛ Abramə ɓa: «Nuąi ŋɛ̨i ə́ di nwun mąąɓo, di tɛɛ bɔ́, ɉɛn gɔwi tii ə ɉɔlɔɓo, di lɛɛ ə́ yəi.»

²² Abramə ə nwoo ŋąąpənə yɛ mą: «Ŋą́ą́ ɲee tɛ Huwalawala Kəlee Nąmu Yálá ɓa, yai yələkɔlɔn da lɔi di pɛli,

²³ ŋį́ gwɛla gɛ́ yɛ́, hɛn kpɔ gaa a ə́ wɔɔ, və dɔ̨nɔ̨ kpɛli həɠəi, ə mą kpɛli kɛ a yee kali, ə mą kɛ kpɛli kɛ kɔ́lɔ yɛli tɔ̨nɔ̨, ə gɛ, hvo pa kɛ diɛ: ‹Ŋą́ą́ ɓə Abramə kɛ a hɛn gɔw nąmu.›

²⁴ Və́ hɛn dɔ̨nɔ̨ kpɛli lɛɛ ɲə́i, hvo kɛ li nwɔ kulaaɠaai ŋɛ̨i kɔ̨nɔ̨n, yii ɓaa nuąi ŋɛ̨i kwa diɛni kwə li, diɛ ɓaa: Anɛrə, Ɛskɔlə da Mamre, di wɛi yii da kɛ bɔ da pɛli di ɉəɠə.»