အွန်လိုင်း သမ္မာကျမ်းစာ

Ikilisiati 2 - Yálá laawoo hɛɓɛ

¹ Ŋą́ kɛ gbɔwɔ ɓa: «Hɛn kpɔ Yɛnɛ̨ɛ̨ ɓɛ kwəinɛ̨ɛ̨ a dɛɛ nu pɔ, hvo kɛli ŋą́ gɔlɔn, da bɔ ɲąąnɛ̨ɛ̨.» A tɛ̨ą, yili yaa kpɛli gaa lɔ a kpɛli-kpɛli mɛ̨nį.

² Ŋą́ yɛlɛ kaa a ɓowo, ŋą́ kwəinɛ̨ɛ̨ kaa yɛ hupu mąą mɛ̨nį, yii hva hɛn da tɛɛ nu pɔ.

³ Ŋą́ naa gwə́i gɛ́ diɛ: «Gáá lɔɔ kpəlɛɛ ɲąąnɛ̨ɛ̨ kwɛlii mą, ɛlɛɛ, ŋą́ kilikpɛɛgwəi nuą pɔɔ kɔ́ɔn; kɛlaa, gɛ́ gbɔ́wɔ́ hu hon, níi yɛ lɛɛ kili pələ mɛ̨i; mɛ̨nįi kpɔ nuą da gɛ ɓɛ lɔi mɛ̨i di hvulú kɔ́wɔ ŋą, ŋą́ kɛ bɔ ŋą́ yiliɠaa kɔ́lɔn.»

⁴ Ŋą́ kóló kpɛa-kpɛaɠaa kɛ, ŋą́ pɛlɛ́ɠaa tɔɔ, ɛlɛɛ, ŋą́ viɲə yɛɛɠaa laa.

⁵ Ŋą́ hihɛn ɲɛɛɠaa laa, wului a ɓa, ŋą́ ɉuwu kəlee ta hin ɉu.

⁶ Ŋą́ yálɔwaɠaa tee, diɛ ɲá pu nwulu, da ɉin ŋąą nįnɛ̨ɠaa diɛ.

⁷ Ŋą́ luwɔ hinąą da luwɔ nɛ̨ąą yá, ŋą́ bɛlɛ bɔlɔɠaai kɛ ɲə́i diɛ. Daatɛlɛɛɠaa kɛ ɲə́i, nįŋɛ̨ɠaa, ɓɛlaaɠaa da ɓooliɠaa, gbulu kɛnɛ̨i kɛ ə tɛɛ nuą wɔlɔ kɛ dɔ́wɔ́ Ɉerusalɛmə di wɛi ɓa.

⁸ Ŋą́ wali hɔlɔɓo da hɛni, ŋą́ tɔɔɓɛlaa di wɔ hɛn gɔw hɔlɔɓo da di wɔ koɓitaaɠaa, di lɛɛ ɲéé mu. Wələ too hinąą da wələ too nɛ̨ąą di kɛ ɲə́i, hɛn kpɔ nu a giliŋąhiɛ mą yɛ ə kɛ ɲəi, gəlee ə kɛ ɲə́i; nɛ̨́ąni kpulu tamąą.

⁹ Ŋą́ kɛ a nui kɔ́lɔn ə kɛ mą. Gɔ́lɔn ŋąąi kɛ, mą́ą́wia ə tɛɛ nuą kpɔ tɔɔlaa kɛ dɔ́wɔ́ Ɉerusalɛmə diɛ. Ə mą kɛ tii, nwɔ́ kili mɛ̨nį ta hvo kulɔ mą.

¹⁰ Hɛn kpɔ ɲɛ̨́i kɔ́w ə kɛ bɔ ə gaa, ŋą́ gəlee lɛ mą. Mɛ̨nį ɲąąnɛ̨ɛ̨ ta hvo kɛ laa, yii və́ da kɛ. Kólói kpɔ ŋą́ gɛ, ŋą́ gəlee tɔlɔ hɔlɔɓo. Yii mąąnɛ̨ɛ̨ kɛ ŋą́ nííɓa kɛ ɉu, ŋą́ yili kəlee kɛ.

¹¹ Yili pulu, ŋą́ą́ gaa, kólóɠaa da mɔ̨nɔ̨ɠaai kpɔ ŋą́ mįi, yii lɔ ŋą́ gɔlɔn, ya ɓaa: Gəlee kaa lɔ a kpɛli-kpɛli mɛ̨nį, yɛ nu aa kɛi hvaŋą tənən dɔɔ. Nuą kɛ mɛ̨nį yɛnɛ̨ɛ̨, dɔlɔ leelee hvo mą.

¹² Ŋą́ kɛ bɔ ŋą́ kili mɛ̨nį tɔlɔ kaa, bələi viɛlaɓoɔi la dɛɛ kilikpɛɛgwəi ɓa da ɓowo. Yili pulu, gɛ́ gbɔwɔ ɓa: Nui pai heei tɔɔlaa hu a mą́ą́hvalin, gili kaa pai kɛi ɲəi ə tɛɛ la nuą wɔlɔ daa tɔɔlaa kɛ dɔwɔ diɛ?

¹³ Yili kəlee hu, ŋą́ gaa, gɛ́ diɛ: Kili hviɛlaɓoɔi kilikpɛɛgwəi ɓa, yɛ bələi kpɔlɔɔ kɛɛ pɔ̨nɔ̨ hviɛlaɓoɔi la dɛɛ kpinį ɓa.

¹⁴ Mąąhɔlɔɓo, kilimąą mun ə ɉiɛ pələ kɔ́lɔn, Kɛlaa, kilikpɛɛgwəi mun a kɛ hiɛi yɛ ɲɛ̨ipumun yɛ ɲee pɛlɛ ɓɛ-ɓɛ. Ŋą́ mɛ̨nį tɔ̨nɔ̨ kɔlɔn, ya ɓaa; nu hveelɛi tii, mɛ̨nį tɔ̨nɔ̨ ɓə di mąąkpɔn ɉi.

¹⁵ Ya ɓə ŋą́ kɛ gbɔ́wɔ ɓa, yii kwa kilikpɛɛgwəi mun ku ŋąąkpɛɛi kaa tanɔ̨n, akɛti, lə mɛ̨nį ɓa ŋą́ kɛ a kilimąą mun? Gɛ́ gbɔ́wɔ ɓa: Yili kaa a kwəi pili mąą.

¹⁶ Mɛ̨nįɠaai daa tɛɛ ɓɛ yələkɔlɔn mu, ɉu hva kpɛli kwɛa nuą daa mąn lɛ̨ą mą, kilimąą mun gili hva lɛɛ nuą ɲą. Kilimąą mun da kilikpɛɛgwəi mun da haa, nuą di hva kɛa di kiliŋąhiɛ nu heei hveelɛi tii diɛ; lə ɓə a yili kɛ tii-yoo?

¹⁷ Yili ɓə gɛ, Yɛnɛ̨ɛ̨ wɛli yɛ kpɛɛ mą́ą́. Yaan, ŋą́ą́ gaa kpɔ, yii kpɔ nuą da gɛ lɔi mɛ̨i, da lɔpee wɛli hva ɉón, gəlee kaa lɔ a kpɛli-kpɛli mɛ̨nį, yɛ nu a kɛi hvaŋą tənən dɔɔ.

¹⁸ Gólóɠaai kpɔ ŋį́ gɛ́ ɓɛ lɔi mɛ̨i, mɔ̨nɔ̨ɠaai kpɔ ŋą́ mįi ɓɛ lɔi mɛ̨i, gəlee wɛli aa kpɛɛ mą́ą́. Mąąhɔlɔɓo, gəlee kaa pai lɛɛi a nui pai mą́ą́hvalin ɉi, nwɔɔ.

¹⁹ Mąą nu kaa pai kɛi a kilimąą mun, a wala kɛ tii, kilikpɛɛgwəi mun? Nu ta hvo yili kpaɠala kɔ́lɔn. Kɛlaa, hɛn kpɔ ŋą́ gwɛli gɛ́ kóló hu da nwɔ́ kili mɛ̨nį hu, gəlee kaa pai lɛɛi nui pai mą́ą́hvalin ɉi ɲəi. Yili kəlee kaa a kpɛli-kpɛli mɛ̨nį.

²⁰ Ŋį́ ɲɛ̨́i hee, mɔ̨nɔ̨i kpɔ ŋį́ naa gbɔ́wɔ mɛ̨i yələkɔlɔn mu ɓɛ, aa nɔ́ ɓɛi gíli hvo kɛ mą, yili aa vį́ikpɛɛ.

²¹ Ɓɛ kaa lə, nu ta a kóló kɛ a kili, ə gɛ a nwun gɛ ɉu laa; a mɛ̨nį kɔlɔn ŋąą, Kɛlaa, yii gaa mą ya ɓaa: nwɔ kólói tii dɔlɔ a lɛɛ nui hvo gólói tii ta kɛ li ɲəi. Yili a kɛ tii, mąą nu aa kpɛli-kpɛli kóló kɛ.

²² Yili a kɛ tii, tɔlɔ lə kɛɛ kpɔ ɓə nu a ɉɔlɔɓo gólóɠaai a giliŋąhiɛ mą gəlee kɛɛ hu?

²³ Nu kan nwɔ yɛnɛ̨ɛ̨ ɲąąnɛ̨ɛ̨ hvo ɉu, kɛ mɛ̨nįɠaa kəlee da liihɛlɛn doo mą, yɛ gbaan, ə mą kɛ a kpinį ɓə, hvįitɔɔ hvo ɲəi. Yili kaa lɔ nwɔ̨nɔ̨ a kpɛli-kpɛli mɛ̨nį.

²⁴ Mɛ̨nį ɲąąnɛ̨ɛ̨i lɔ gaa nu yəi, ya ɓaa: Ə kɔ̨nɔ̨n mįi, ə gbələ, ɛlɛɛ, ə gwəinɛ̨ɛ̨ kɛ kóló dɔlɔ hu. Ŋą́ gaa gɛ́ diɛ Yálá ɓə a nu kɔ́ a yili.

²⁵ Hvo gaai, nu hva pɛli kɔ̨nɔ̨n ɉɔlɔɓoi, hvo ɲąąnɛ̨ɛ̨ gulɔ, akɛ, Yálá hvo hvaa li mą.

²⁶ Yaan, nui nwɛli kaa Yálá ɓa, a gɔ́ a kili, mɛ̨nį kɔ́lɔn ŋąą, nwun gɛ ɉu laa da yíi la nɛ̨ɛ̨. Kɛlaa, a kóló laa nɛ̨ŋɛ̨n ɉəɠəmun nwuɔ̨, yili yɛ hɛn gwɛli a nui nwɛli kaa Yálá ɓa, nwɔɔ. Yili yaa kpɛli gaa lɔ a kpɛli-kpɛli mɛ̨nį, yɛ nu a kɛi hvaŋą tənən dɔɔ.

« အရင်

နောက်တစ်ခု »

Bible Society in Guinea-Conakry

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ