Hanwon 14 - Yálá laawoo hɛɓɛ

¹ Kilimąą nɛ̨ɛ̨nu a nwɔ pɛ́lɛ́i tɔɔ; kilikpɛɛgwəi nɛ̨ɛ̨nu yɛ nwɔ pɛlɛ́i pu a gbɔwɔ yee.

² Nui a hiɛ a ɉaŋąą, a ɲɔw Yai-Laa ɓa. Túwɔ́ pələ ɲɔ̨n gulɔmun yɛ tɛɠɛ ɓo ɉu.

³ Kilikpɛɛɲəimun vaa woo a baa a kpɔwɔ ŋąą kɛnɛ̨. Kɛlaa, kilimąą nuą hvaa wooɠaa diɛ di mąą kpɛ.

⁴ Kɛɛhin nįŋɛ̨ a wala kɛ nu yəi, a kɛ tii, kɔ̨nɔ̨n və ɲəi, kɛɛhin nįŋɛ̨ɠaa di wɔ huwalawala háálai ɓə kɔ̨nɔ̨n a hɔlɔɓo la.

⁵ Kɛlai a tɛ̨ą ɓo, hva nu ɓowo. Kɛlaa, lɛɛ kɛla hvaa ɓomun, lɛɛ lɔ ɓə a gɛ.

⁶ Yɛlɛ kulɔ ɉumun a kili kwɛli, hva ɉɔlɔɓo. Kɛlaa, mɛ̨nį kɔ́lɔnmun nwɛi, a mɛ̨nį kpaɠala kaa ɉa.

⁷ Ə́ mąą kwɛa kilikpɛɛgwəi mun ma, mąąhɔlɔɓo, hvó pai mɛ̨nį ɲąąmąą lɔpee mɛ̨n ɉii na.

⁸ Kilimąą mun gwəi pələ, kili kɛ ɲəi laa, ɓaa: nu ə gbɔwɔ hiɛ pələ ɲɛlɛ kɛ. Kɛlaa, kilikpɛɛgwəi nuą di wɔ ɓowo laa a nu lan.

⁹ Kilikpɛɛɲəi nuą da di hɔn gɛ, di mąą kpaan və ɉu, Kɛlaa, Yálá nwɔ nɛ̨ɛ̨laa kaa a tələnmo nuą di wɔɔ.

¹⁰ Nu kili a gbɔwɔ nwɔ liiɲąnwąną kɔ́lɔn, ɛlɛɛ, da nu ta di hva kpɔn nwɔ kwəinɛ̨ɛ̨ ɓa.

¹¹ Nwąnąlɔ nuą di wɔ pɛ́lɛ́i a pu, nu haŋąąɠaa di wɔ kələ yɛ kɛ a hɛn gɔw pɛlɛ́.

¹² Nu kpəli a ɉiɛ pələ kaa a ɉaŋąą, Kɛlaa, gaa pai naa kulɔi haa wolo la.

¹³ Ə mą kɛ nu kaa yɛ́lɛ́i, líihɛlɛn hva kpɛɛ mą, ɛlɛɛ, kwəinɛ̨ɛ̨ laa yɛ kulɔ a mɔ̨nɔ̨.

¹⁴ Túwɔ́ pələ ɲɔ̨n gulɔmun a pilɛ ɉa túwɔ́ pələ ɲɔ̨n ɉu. Nu lɛlɛɛ nwɛi, a pilɛ a mɛ̨inɛ̨ɛ̨.

¹⁵ Nui gili hva li kwɛa la, yii lɔpee da mo mą, a hvaa lɔ ma. Kɛlaa, nui a mɛ̨nį hu kpɛ, a hiɛ a gili.

¹⁶ Kilimąą mun a ɲɔw mɛ̨nį ɲɔ̨n ma, yɛ mąąlaa. Kilikpɛɛɲəi mun nwɛi, a níiholi, ɲɔw hvo ɉu.

¹⁷ Nui a níiholi ɉa, a ɓowo mɛ̨nį kɛ, lamąnąnmun yɛ gbɔwɔ wɛli kpɛɛ nuą diɛ.

¹⁸ Nuąi di kili hva li kwɛa la, di hɔlɔɓo hɛn maa ɓowo, kilimąą nuą ɲɛ̨i a pɔ̨nɔ̨ a di wɔ kilii.

¹⁹ Nwąnąlɔ nuą kaa pai pɛlɛi nu lɛlɛɛɠaa kɔ́wɔ mu, mɛ̨nį ɲɔ̨n gɛ nuą diɛ gɛ tii tələnmo nuą yəi bɛlɛ́ laaləi.

²⁰ Nui hɛn və ɲəi, nwɛli a kpɛɛ nuą diɛ, ə mą kɛ mɛlanmun mə, hɛn gɔw ną́mu nwɛi, mɛlaa da tamą.

²¹ Nui a tɛɠɛ ɓo mɛlan gaalon ɉu, nɛ̨ŋɛ̨n ni. Kɛlaa, nui a yeehvowolo nuą mąąwɛlikaa, lúwɔ́ lon ni.

²² Nu kɛɛ lɔ mɛ̨nį ɲɔ̨n bənəi gwəi yɛ doo, gɛɛ lan bələ mɛ̨i hvə li? Kɛlaa, nui a giliŋąhiɛ mɛ̨nį lɛlɛɛ ɓa, da di kili hvilɛn mą, diɛ di kwəi kwələ mą.

²³ Tɔ̨nɔ̨ kaa koló kəlee hu, Kɛlaa, howon gbɛli kpɛli, laa kulɔi ɓaa yeehvowololaa.

²⁴ Kilimąą nuą di wɔ tɔɔɓɔlɔ ɓaa di wɔ hɛn gɔwi, Kɛlaa, kilikpɛɛgwəi nuą di wɔ hupumąą laai, ɓowo lɔ ɓə.

²⁵ Kɛlai a tɛ̨ą ɓo, a nuą nwun gulɔ mɛ̨nį hu. Kɛlaa, nui a naa ɓo lɔ a lɛɛ, a nuą lan.

²⁶ Nui a ɲɔw Yai-Laa ɓa, dɔɔi a walawala, Yai-Laa kaa a mąą nu mąąkilɛi, nonnii wəli pulu laɠiɛ.

²⁷ Ɲɔw Yai-Laa ɓa, kaa a yɛnɛ̨ɛ̨ yáton, ya ɓə a gɛ nu yɛ haa nwɔ ɓaaləɠaa mąąlaa.

²⁸ Lɔi lonnii kpulu kɛnɛ̨ɛ kaa a tɔɔmun ɲɛ̨i pɔ̨nɔ̨ mɛ̨nį. Kɛlaa, nuą da kpɛɛ nɔi hu, nɔi nąmu toɔ li.

²⁹ Nui hva níiholi ɉa, kilimąą mun gɛnɛ̨ li. Nui níiholi laa nɛ̨ɛ̨i, a nwɔ ɓowo laa tɔɔ ɲɛ̨i.

³⁰ Líílaa kaa a nu kɔlɔi pɔ̨nɔ̨ hɛn, Kɛlaa, tolo kaa a kolo yɛ nu kɔ́w mįi.

³¹ Nui a hee mąąwɛlimun mɛ̨i, gaa mąąwɛlimun tii pɛli Yálá lalan ɉii. Kɛlaa, nui a mąąwɛli nuą mąąwɛli kaa, a Yálá mąąwiɛ.

³² Nwąnąlɔmun a too a nwɔ nwąnąlɔ kiliŋąhiɛ, Kɛlaa, tələnmomun nwɛi, ə mą kɛ haa yee kɔn ma, kilitɔɔi kaa ɲəi.

³³ Kili mɛ̨nį a ɉeei hɔlɔɓo mɛ̨nį kɔ́lɔnmun nii hu. Kɛlaa, kilikpɛɛgwəi nuą da mɔ̨ɔ̨ pɛli gɔlɔn ɉii?

³⁴ Tələnmolaa a lɔi mąąwiɛ, Kɛlaa, nɛ̨ŋɛ̨n ə ɓo a lɔi mąą nwumɛ̨.

³⁵ Tɔɔmun a ɲɛ̨i lɛlɛɛ hee, tímun gili kaa ɲəi, mą. Kɛlaa, a ɲɛ̨i ɲɔ̨nwɔ̨ɔ̨ hee nui a nwumɛ̨ tɛ nu, bɔ.