Ɛstɛrə 8 - Yálá laawoo hɛɓɛ

¹ Voló tɔ̨nɔ̨i tii hu, tɔɔmun Asuerusə ə nɛ̨ɛ̨ mą ə Haman yəi hɛnŋąą kəlee tɛɛ nɛ̨ą Ɛstɛrə pɔ, Haman ŋɛ̨i kɛ a Ɉuifəɠaa di yowo. Ɛstɛrə ə nɛ̨ɛ̨ mą, ə mo tɔɔmun ma: yɛ mą: «Mardose kaa a gúlɔɉu nąn, nwɔ nu leelee li. Tɔɔmun ə Mardose təli ə pa bɔɔli.»

² Dɔɔlaa gbono ŋɛ̨i tɔɔmun ə gulɔ Haman yəi, ə dɛɛ Mardose pɔ. Ɛstɛrə yaa kpɛli ə Mardose hee Haman nwɔ pɛ́lɛ́i mɛ̨i.

Ɉuifəɠaa mąą kɔ́nwɔ̨ woo

³ Ɛstɛrə ə pənə nwɔ̨nɔ̨ ə too tɔɔmun gɔwɔ mu, ə nɛ̨ɛ̨mąą hve ma; yɛ wɔlɔ, ə gɛ, mɛ̨nį ŋɛ̨i Agagə huwuta Haman ə giliŋąhiɛ kɛ yɛ hvilɛn na Ɉuifəɠaa diɛ, di ɉəɠə mą.

⁴ Tɔɔmun ə nwɔ hɛni tunwɔ̨n ɉaŋą Ɛstɛrə pɔ, Ɛstɛrə ə muhəɠə, ə hee.

⁵ Yɛ tɔɔmun ma: «Nwɔ́ mɛ̨nį námu, akɛ yaa ɲɛ̨́i mąąwɛli kaa, nwɛ́li aa too yɛ́! Agagə nu huwui ŋɛ̨i a Hamedata lon Haman, nwɔ hɛɓɛ́ ɲɔ̨nwɔ̨ɔ̨ ŋɛ̨i ə bɛ̨ɛ̨, ə daɠa taɠa ə́ wɔ lɔi nąą kəlee, Ɉuifəɠaa mąą mɛ̨nį ɓa, ə́ ɉəɠə mą, a hɛɓɛ́ ta yii ya bɛ̨ɛ̨.

⁶ Akɛ ya wala yili kɛ, ŋį́ pɛli lɛɛ pələ kɛi ləi heeni, ɲɛ̨i hiɛ ɉúwuhu nuą diɛ, diɛ di paa! Diɛ di huwu pu!»

⁷ Tɔɔmun Asuerusə yɛ Ɛstɛrə da Mardose ŋɛ̨i a Ɉuifəɠaa diɛ: «Ka ka wəli tɔɔ! Ɛstɛrə, Haman ŋɛ̨i Ɉuifəɠaa paa mɛ̨nį giliŋąhiɛ kɛ, ŋą́ą́ mo daa ɉɛlɛn wulu ɓa, ɛlɛɛ, ŋą́ą́ ɲəi hɛnŋąą kəlee tɛɛ ə́ pɔ.

⁸ Kɛlaa, yii ɓaa ɉɛɓɛ́i ŋɛ̨i di bɛ̨ɛ̨, di ɲéé pɔɔ too ɉu, vá pɛli yili həɠəi mą. Yáá mun, hɛɓɛ́ kɛ, yɛ bələi gaa la ə́ kwəi, ə́ nwɔ́ gbonoi pɔɔ kɛ ɉu, Ɉuifəɠaa mąą kɔ́nwɔ̨ mɛ̨nį ɓa.»

⁹ Voló tɔ̨nɔ̨i tii hu, ə kɛ a ɲąnin ɉaaɓa naa ŋɛ̨i da kɛ mą Hebreu woo hu Siwan nwɔ hvolo pow hveelɛ kɔ́w haaɓa, di ɉɛɓɛ́ pɛ̨ɛ̨ nuą təli, di hɛɓɛ́ɠaa pɛ̨ɛ̨ yɛ pələi Mardose ə kɛ la bɔ. Di ɉɛɓɛ́ɠaa tɛɛ Ɉuifəɠaa diɛ, ɲɛ̨itɔwɔ nuą diɛ, da nɔi ɲąąwooɓo nuą diɛ, ə mą kɛ goɓitaa nwundɔ̨nɔ̨ ɲee hveelɛ kɔ́w mɛ̨ihveelɛi ɓa; Ə həɠə kpɔ Ɛndə lɔi ɓa, ə həli la Nubi lɔi ɓa. Di ɉɛɓɛ́ɠaa tii pɛ̨ɛ̨ a hį́iwoo tamąą, ə mą kɛ Ɉuifəɠaa lawoo hu, di ɲąąkwɛlɛ nɔi nąą kəlee, nuą diɛ.

¹⁰ Di ɉɛɓɛ́ɠaa tii pɛ̨ɛ̨ tɔɔmun naa hu, di tɔɔmun nwɔ gbonoi pɔɔ kɛ diɛ, di di tɛɛ ɉɛɓɛ́ laalɛ nuą pɔ, di tɛ ɉoo mɛ̨i diɛ li la.

¹¹ Ə kɛi mo Ɉuifəɠaa diɛ ɉɛɓɛ́i tii hu, diɛ kɛ diɛ: «'Ka ka yee lɛɛ ka yíi pələ ɓa, daa kəlee hu, ka ka keeni mąą kpɔnmąąɓo. Nui lɔpee da gaa kwɛli hɛn yɛ ɓo ɲəi, yɛ kɛ ə pɛlɛ diɛ, di mąą nu paa, nɛ̨ąą da lɛapɛlɛɛɠaa kəlee, di di yəi hɛnŋąą həɠə.

¹² Nɔi naa kəlee, hvolo tɔ̨nɔ̨ yee mu, ɲąnįn ŋɛ̨i da kɛ mą Hebreu woo hu: Adarə, nwɔ hvolo pow kɔ́w haaɓa yələ.

¹³ Ɉɛɓɛ́i tii dɔ̨nɔ̨ ə lɛɛ goɓitaa hu, yɛ tɔ́n ɉɛɓɛ́. Di ɉu woo ɓo nuą kəlee diɛ, volói tii ə ɉəli, Ɉuifəɠaa kəlee di di hąą yili, ə gɛ, di di nwąną kulɔ di yowoɠaa diɛ.»

¹⁴ Yii kɛa di ɉɛɓɛ́ tɛɛ nwɛlɛɛ ɓo nuą pɔ, di tɛ ɉoo mɛ̨i, də li kpɔlɔ ɉa-ɉa. Di pənə nwɔ̨nɔ̨ di noloɓo Susə daa naa kɔ́lɔ kəlee.

¹⁵ Mardose ə kulɔ tɔɔmun ɲəi bɛlɛ́n, mąą yiliɛ a tɔɔ həɠə kpɔluɔ mutɛɠiɛ, tɔɔ ɓɔlɔ ta pɛlɛɛ nwuɔ̨ yɛ ɓo a hɛni, da gbaawi kpɔluɔ kɛnɛ̨. Susə daai nuą kəlee di kwəi ə nɛ̨ɛ̨ kpɔ kɛnɛ̨.

¹⁶ Yii ɓaa Ɉuifəɠaa di wɛi, di kɛi gwəinɛ̨ɛ̨ kulɔ, diɛ pili yələi.

¹⁷ Goɓitaaɠaa kəlee hu, da daa pɛlɛɛɠaa kəlee hu, ɓɛi kpɔ tɔɔmun nwɔ wɛlɛɛ woo tii ə həli laa, yɛ hvilɛn na Ɉuifəɠaa diɛ, ə kɛ a kwəinɛ̨ɛ̨ da hɛli. Nu tamąą di di kpɔɔ kɛ a Ɉuifəɠaa, mąąhɔlɔɓo, Ɉuifəɠaa mąą mɛ̨nį ə di mąą ɲɔw kpɔ kɛnɛ̨.