Ɛstɛrə 7 - Yálá laawoo hɛɓɛHaman haa mɛ̨nį 1 Tɔɔmun da Haman də li tɔɔmun nɛ̨ą pɔɔli, ə gɛ, di kɔ̨nɔ̨n mįi. 2 Volo veelɛ naa, kɔ̨nɔ̨n mįi kɛɛ kpɛɛ pulu, diɛ kɛa nɔɔ kpələ, tɔɔmun yɛ nwɔ̨nɔ̨ Ɛstɛrə ɓa: «Lə ɓə ə́ kaa bɔ ə́ vɛli mą́ą́, tɔɔmun nɛ̨ą? Ŋą́ dɛɛ ə́ pɔ. Lə kpɔ ɓə ə́ kaa bɔ ŋį́ gɛ yɛ́? Ə mą kɛ dɔɔlaa bələ tɔ̨nɔ̨ ɓə, ŋį́ dɛɛ ə́ pɔ.» 3 Tɔɔmun nɛ̨ą Ɛstɛrə yɛ tɔɔmun ma: «Nwɔ́ mɛ̨nį námu; akɛ ya hvaa mą, ə́ mɛ̨inɛ̨ɛ̨ kɛ mą́ą́, gɛ́, ə́ hvaa mą, ə́ nwún mąąɓo kwa ɉúwu. Yii kpɔ a gwə́inɛ̨ɛ̨ mɛ̨nį, yaa li. 4 Yaan, ɲą́ą́ kwa ɉúwuhu nuą ka tii daa ku kwɛlɛ, ə gɛ, di ku paa. Ə li kɛ, di kɛ diɛ, ku kɛ lɔ a luwɔɠaai, və́li hvaa, mąąhɔlɔɓo, və́ li ə́ hviikpɛɛ a yili mąą mɛ̨nį.» 5 Tɔɔmun Asuerusə yɛ nɛ̨ą ɓa: «Gbɛɛ ɓə giliŋąhiɛ yili kɛ? Mąą nu wɔɔ?» 6 Tɔɔmun nɛ̨ą Ɛstɛrə yɛ mą: «Ɲówo da gɔ́yɔwɔ, ya ka a: Haman, a mɛlɛkpɛ mąąmun ŋɛ̨i!» Haman ə lɛɛ heeni, ə kpɛlin, tɔɔmun da nɛ̨ą Ɛstɛrə di lííla. 7 Tɔɔmun níi ə kələn gwəi, ə muhəɠə, ə kulɔ dɔɔ kwəli hąąi. Haman kili ə pu ɉu yɛ tɔɔmun aa baa mɛ̨nį kili tee gwəi, ə lɛɛ laa yɛ nwun mąąkɔ̨nwɔ̨ mɛ̨nį hu hvɛli tɔɔmun nɛ̨ą Ɛstɛrə ɓa. 8 Ɓɛlɔwai tɔɔmun ə həɠə la ɲɛ̨nɛ̨ɛ̨ pələ, yɛ lɔ, ə Haman kaa, ə kpuluun yɛ li pɛlɛi Ɛstɛrə laakpəlin ma. Tɔɔmun ə nąą kaa lɔ tii, yɛ Haman ɓa: «Yɛ́ ə́ too Ɛstɛrə mɛ̨i, ə́ mɛ̨nį ɲɔ̨n da kɛ la ɲɛ̨́i ɓa, ɲəi bɛlɛ́n, dɔɔ pɛlɛ́ mu. Yii lɔ woo tii ə kulɔ tɔɔmun na, daa mąn Haman ɲɛ̨i yili.» 9 Tɔɔmun nwɔ kpɛtɛgbuwulu tɔ̨nɔ̨, yai naa ɓaa: Harbona; yɛ tɔɔmun ma: «Nwɔ́ mɛ̨nį námu! Haman ŋɛ̨i, aa wulu ta pɛli, ə gɛ, di pa kɛ Mardose hɛlɛn mą. Mardose ŋɛ̨i ta ə́ nwun mąąɓo lɔgilii nuą yəi. Nwului tii gaa tɔɔni Haman yəi gwəli, gwɛa yee kaa a yee laa mą pow hveelɛ kɔw lɔɔli.» Tɔɔmun yɛ mą: «'Ka li ka Haman hɛlɛn mą.» 10 Di nɛɛ mą di Haman hɛlɛn nwului tii ɓa, yaai ə bɛli Mardose laa ɓa. Nąąlɔwai, tɔɔmun lii ə laa. |